ಒಳ್ಳೆಯ ಬರವಣಿಗೆ ಇದ್ದರೆ ಕೃತಿ ಕೊಂಡು ಓದುವರು

ಹುಬ್ಬಳ್ಳಿ : ಒಳ್ಳೆಯ ಬರವಣಿಗೆ ಇದ್ದರೆ ಓದುಗರು ಮುಗಿಬಿದ್ದು ಕೃತಿ ಕೊಂಡು ಓದುತ್ತಾರೆ. ಪುಟಗಳ ಸಂಖ್ಯೆ ಹೆಚ್ಚಿದ್ದರೆ, ಬೆಲೆ ಹೆಚ್ಚಿದ್ದರೆ ಕೃತಿ ಕೊಳ್ಳಲಾರರು ಎಂಬ ಭಾವನೆ ಸುಳ್ಳು ಎಂದು ಸಾಹಿತಿ ವಸುಧೇಂದ್ರ ಹೇಳಿದರು.

ತಮ್ಮ ನೂತನ ಕೃತಿ 'ತೇಜೋ ತುಂಗಭದ್ರಾ' ಕುರಿತಾಗಿ ವಿಶೇಷ ರೀತಿಯಲ್ಲಿಅಭಿಯಾನ ಕೈಗೊಂಡ ಸಾಹಿತಿ ವಸುಧೇಂದ್ರ ಅವರು ಇಲ್ಲಿನ 'ಸಾಹಿತ್ಯ ಭಂಡಾರ'ದಲ್ಲಿಓದುಗರ ಜತೆ ಮುಕ್ತವಾಗಿ ಮಾತುಕತೆ ಮತ್ತು ಸಂವಾದ ನಡೆಸಿದರು.

ಈ ಸಂದರ್ಭದಲ್ಲಿಮಾತನಾಡಿದ ಅವರು, ಮೊದಲ ಬಾರಿ ಐತಿಹಾಸಿಕ ಕಾದಂಬರಿ ಬರೆದಿದ್ದೇನೆ. ಇದರಲ್ಲೀಗ ಹಿಡಿತ ಸಿಕ್ಕಂತಾಗಿದ್ದು, ಓದುಗರು ತುಂಬು ಮನಸ್ಸಿನಿಂದ ಇದನ್ನು ಸ್ವೀಕರಿಸುವ ವಿಶ್ವಾಸವಿದೆ. ಮುಂದಿನ ದಿನಗಳಲ್ಲಿಇತಿಹಾಸದ ಮೇಲೆ ಬೆಳಕು ಚೆಲ್ಲುವ ಕಾದಂಬರಿ ಬರೆಯುವೆ ಎಂದರು.

ಈವರೆಗಿನ ತಮ್ಮ ಇತರ ಕೃತಿಗಳಿಗೆ ಹೋಲಿಸಿದರೆ ಇದರ ಕಥಾಹಂದರ ಭಿನ್ನವಾಗಿದೆ. ಆದರೆ, ಎಂದಿನ ಶೈಲಿ ಮುಂದುವರೆದಿದೆ. ವಿಜಯನಗರದ ಕುರಿತಾಗಿ ಬರೆದ ಮೇಲೆ ಅವರ ಆಚೀಚೆಗಿನ ಕಾಲಮಾನದ ರಾಜಮನೆತನಗಳ ಕುರಿತಾಗಿ ಆಸಕ್ತಿ ಮೂಡುವುದು ಸಹಜ. ಹೀಗಾಗಿ ಮುಂದಿನ ದಿನಗಳಲ್ಲಿಇತಿಹಾಸದ ಬಗ್ಗೆ ಬರೆಯುವ ಇರಾದೆ ಇದೆ ಎಂದು ತಿಳಿಸಿದರು.

'ತೇಜೋ ತುಂಗಭದ್ರಾ' ಒಂದು ಸುಂದರ ಪ್ರೇಮಕತೆ. ಇದರಲ್ಲಿಸಮುದ್ರಯಾನದ ಕುರಿತಂತೆ, ಭಾರತದ ಮೇಲೆ ಪೋರ್ಚುಗೀಸರಿಂದಾದ ಪರಿಣಾಮ, ಭಾರತೀಯರಿಂದ ಪೋರ್ಚುಗೀಸರ ಮೇಲಾದ ಪರಿಣಾಮದ ಚಿತ್ರಣವಿದೆ. ಬಹುಮನಿ ಸುಲ್ತಾನರ ಮೇಲೆಯೂ ಬೆಳಕು ಚೆಲ್ಲಲಾಗಿದೆ. ಆಗಿನ ಜಾಗತೀಕರಣದ ಬಗೆಗೆ ಕುರಿತಾದ ಚಿತ್ರಣವನ್ನೂ ಕೃತಿ ಕಟ್ಟಿಕೊಡಲಿದೆ ಎಂದರು.