ಗದಗ ಜಿಲ್ಲೆಯಲ್ಲಿ 2,13,941 ಹೆಕ್ಟೇರ್‌ ಪ್ರದೇಶ ಬೆಳೆ ನಷ್ಟ, 1,500 ಕೋಟಿ ರೂ. ಹಾನಿ

ಗದಗ: ಮುಂಗಾರು ಮಳೆ ಕೈಕೊಟ್ಟ ಹಿನ್ನೆಲೆಯಲ್ಲಿರಾಜ್ಯ ಸರಕಾರ ಬರ ಘೋಷಣೆ ಮಾಡಿದ ನಂತರ ನಡೆದ ಸಮೀಕ್ಷೆಯಲ್ಲಿ ಜಿಲ್ಲೆಯ 2,13,941 ಹೆಕ್ಟೇರ್‌ ಬೆಳೆಹಾನಿ ಸಂಭವಿಸಿರುವುದು ಸ್ಪಷ್ಟವಾಗಿದೆ. ರಾಜ್ಯದ 191 ಬರಪೀಡಿತ ತಾಲೂಕುಗಳ ಪಟ್ಟಿಯಲ್ಲಿಗದಗ ಜಿಲ್ಲೆಯ ಆರು ತಾಲೂಕುಗಳು ಒಳಗೊಂಡಿವೆ. ಬರಪೀಡಿತ ತಾಲೂಕುಗಳ ಪಟ್ಟಿ ಬಿಡುಗಡೆ ನಂತರ ಹಾನಿಯ ಸಮೀಕ್ಷೆ ಕೈಗೊಳ್ಳಲಾಗಿತ್ತು. ಅಂದಾಜು ಶೇ. 94ರಷ್ಟು ಬೆಳೆ ಸಮೀಕ್ಷೆ ಪೂರ್ಣಗೊಂಡಿದ್ದು, ಆ ವರದಿ ಆಧಾರದ ಮೇಲೆ ಜಿಲ್ಲೆಯ 2.13 ಲಕ್ಷ ಹೆಕ್ಟೇರ್‌ ಬೆಳೆಹಾನಿ ಅಂದಾಜಿಸಲಾಗಿದೆ.

1500 ಕೋಟಿ ರೂ. ಹಾನಿ

ಮಳೆ ಕೊರತೆಯಿಂದಾಗಿ ಜಿಲ್ಲೆಯಲ್ಲಿ2,13,941 ಹೆಕ್ಟೇರ್‌ ಪ್ರದೇಶ ಹಾನಿಯಾಗಿದೆ. 1,38,898 ರೈತರಿಗೆ ತೊಂದರೆ ಆಗಿದೆ. ಜಿಲ್ಲೆಯಲ್ಲಿ1,515.25 ಕೋಟಿ ರೂ. ನೈಜ ಹಾನಿಯಾಗಿದೆ. ನೈಜ ಹಾನಿ ಹೊರತುಪಡಿಸಿ ಮಳೆ ಕೊರತೆಯಿಂದ ಜಿಲ್ಲೆಯಲ್ಲಿಒಟ್ಟು 215.53 ಕೋಟಿ ರೂ. ನಷ್ಟವಾಗಿದೆ ಎಂದು ಜಿಲ್ಲಾಡಳಿತ ಅಂದಾಜಿಸಿದೆ.

ಕೈಕೊಟ್ಟ ಹೆಸರು

ಗದಗ ಹೆಸರು ಬೆಳೆಯುವ ಪ್ರಮುಖ ಜಿಲ್ಲೆಗಳಲ್ಲಿಒಂದಾಗಿದೆ. ಆದರೆ, ಈ ಬಾರಿ ಮುಂಗಾರು ಕೈಕೊಟ್ಟ ಕಾರಣ ಹೆಸರು ಬೆಳೆ ಸಂಪೂರ್ಣ ಕೈಕೊಟ್ಟಿದೆ. ಅದೇ ರೀತಿ ಮೆಕ್ಕೆಜೋಳ ಬಿತ್ತನೆಯಾದರೂ ಇಳುವರಿ ಇಲ್ಲವಾಗಿದೆ. ಶೇಂಗಾ, ಸೂರ್ಯಕಾಂತಿ, ಮೆಣಸಿನಕಾಯಿ ಮತ್ತು ಈರುಳ್ಳಿ ಬೆಳೆಗೆ ನೀರಿನ ಕೊರತೆ ಎದುರಾಗಿದೆ. ಮಳೆ ಅಭಾವ ಹಿನ್ನೆಲೆ ಹೆಸರು ಬೆಳೆ ಶೇ.79ರಷ್ಟು ಬಿತ್ತನೆ ನಡೆದಿಲ್ಲ. ಜೋಳ ಶೇ.61, ಅವರೆ ಶೇ. 60 ರಷ್ಟು , ಹುರಳಿ ಶೇ. 45, ಉದ್ದು ಶೇ.86, ಶೇಂಗಾ ಶೇ. 45 ರಷ್ಟು, ಸೋಯಾಬೀನ್‌ ಶೇ. 58 ರಷ್ಟು, ಹತ್ತಿ ಶೇ.75 ರಷ್ಟು ಬಿತ್ತನೆಯೇ ಜರುಗಿಲ್ಲ.

ಗದಗ: ಮಳೆ ಕೊರತೆ; ರೈತರಿಗೆ ಬೆಳೆಗಳು ಕೈ ತಪ್ಪುವ ಆತಂಕ, ಸಂಕಷ್ಟದ ಭೀತಿ

ಇಂದು ಬರ ಅಧ್ಯಯನ ತಂಡ

ರಾಜ್ಯದ ಬೆಳೆಹಾನಿಗೆ ಕೇಂದ್ರ ತಂಡ ಆಗಮಿಸಲಿದ್ದು, ಅ. 6ರಂದು ಗದಗ ಜಿಲ್ಲೆಯಲ್ಲಿಪ್ರವಾಸ ಕೈಗೊಳ್ಳಲಿದೆ. ಅ. 6ರಂದು ಬೆಳಗ್ಗೆ 8 ಗಂಟೆಗೆ ಲಕ್ಷ್ಮೇಶ್ವರ ತಾಲೂಕಿನ ಗೋಜನೂರ ಗ್ರಾಮದಿಂದ ಸಮೀಕ್ಷೆ ಆರಂಭಿಸಿ, ಲಕ್ಷ್ಮೇಶ್ವರ, ದೊಡ್ಡೂರು, ಸೂರಣಗಿ, ಚಿಕ್ಕಸವಣೂರ, ಬೆಳ್ಳಟ್ಟಿ, ವಡವಿ, ದೇವಿಹಾಳ, ಛಬ್ಬಿ, ಶೆಟ್ಟಿಕೆರೆ ಕ್ರಾಸ್‌, ಮುಳಗುಂದ ಗ್ರಾಮದ ವ್ಯಾಪ್ತಿಯಲ್ಲಿಪರಿಶೀಲನೆ ನಡೆಸಲಿದೆ.