ತಾಂತ್ರಿಕ ಉಪಕರಣಗಳ ಸಂಪನ್ಮೂಲ ಕೇಂದ್ರ ಉದ್ಘಾಟನೆ

ಉಪ್ಪಿನ ಬೆಟಗೇರಿ : ವೈಜ್ಞಾನಿಕವಾಗಿ ಅಭಿವೃದ್ಧಿಪಡಿಸಲಾದ ತಾಂತ್ರಿಕ ಉಪಕರಣಗಳ ಸದುಪಯೋಗ ಪಡೆದುಕೊಳ್ಳುವಂತೆ ಕೃಷಿ ವಿಶ್ವ ವಿದ್ಯಾಲಯದ ಸಂಶೋಧನಾ ನಿರ್ದೇಶಕರು ಹಾಗೂ ಬೀಜ ವಿಭಾಗದ ವಿಶೇಷ ಅಧಿಕಾರಿ ಡಾ ಪಿ.ಎಲ್‌.ಪಾಟೀಲ್‌ ರೈತರಿಗೆ ಸಲಹೆ ನೀಡಿದರು.

ಅವರು ಇಲ್ಲಿನ ಗ್ರಾಮ ಪಂಚಾಯಿತಿ ಕಾರ್ಯಾಲಯದಲ್ಲಿ ಕೃಷಿ ವಿಶ್ವ ವಿದ್ಯಾಲಯದ ಅಖಿಲ ಭಾರತ ಸಮನ್ವ ಸಂಶೋಧನಾ ಯೋಜನೇಗೃಹ ವಿಜ್ಞಾನ ವಿಭಾಗದ ಕುಟುಂಬ ಸಂಪನ್ಮೂಲ ನಿರ್ವಹಣೆ ವಿಭಾಗದಿಂದ ಸ್ಥಾಪಿಸಲಾಗಿರುವ ಸಂಪನ್ಮೂಲ ಕೇಂದ್ರವನ್ನು ಉದ್ಘಾಟಿಸಿ ಮಾತನಾಡಿದರು.

ರೈತರು ಹಾಗೂ ಕೃಷಿ ಕೂಲಿ ಕಾರ್ಮಿಕರ ಶ್ರಮ ಕಡಿಮೆಗೊಳಿಸುವ ಉದ್ದೇಶದೊಂದಿಗೆ ಹಲವು ಸಾಧನಗಳನ್ನು ನಿರ್ಮಿಸಲಾಗಿದೆ. ಜನ ಇವುಗಳನ್ನು ಹೆಚ್ಚು ಹೆಚ್ಚು ಬಳಸಿ ತಾಂತ್ರಿಕತೆಯಲ್ಲಾದ ನ್ಯೂನತೆಗಳ ಬಗ್ಗೆ ತಿಳಿಸಿದರೆ ಪರಿಕರಗಳನ್ನು ಇನ್ನಷ್ಟು ಅಭಿವೃದ್ಧಿಪಡಿಸಲು ಸಾಧ್ಯ ಎಂದರು.

ಸಹಾಯಕ ಕೃಷಿ ನಿರ್ದೇಶಕಿ ಆಶಾ ಮಿಕ್ಲಿ ಮಾತನಾಡಿ ಕೃಷಿ ಕ್ಷೇತ್ರದಲ್ಲಿ ಶ್ರಮದ ಸರಳಿಕರಣದ ತುರ್ತು ಅಗತ್ಯತೆಯನ್ನು ಕೃಷಿ ವಿವಿ ಸಾಕಾರಗೊಳಿಸುತ್ತಿದೆ ಎಂದರು.

ಗ್ರಾಮ ಪಂಚಾಯಿತಿ ಅಧ್ಯಕ್ಷ ಮಹಾವೀರ ಅಷ್ಟಗಿ ಮಾತನಾಡಿ, ಸುಧಾರಿತ ಕೃಷಿ ಪರಿಕರಗಳನ್ನು ನೀಡುವ ಮೂಲಕ ಕೃಷಿ ವಿವಿ ನಮ್ಮ ರೈತರಿಗೆ ಅನೂಕೂಲ ಕಲ್ಪಿಸಿದೆ. ಜನ ಇದರ ಲಾಭ ಪಡೆಯಲು ಮುಂದೆ ಬರಬೇಕು ಎಂದರು.

ನಿಂತು ಶೆಂಗಾ ಒಡೆಯುವ ಸಾಧನ, ಕಳೆ ತೆಗೆಯುವ ಸಾಧನ ಸೇರಿದಂತೆ ವಿವಿಧ ಕೃಷಿ ಸಂಬಂಧಿತ ಪರಿಕರಗಳನ್ನು ಕೃಷಿಕರ ಅನುಕೂಲಕ್ಕಾಗಿ ಸಂಪನ್ಮೂಲ ಕೇಂದ್ರದಲ್ಲಿ ಈರಿಸಲಾಗಿದೆ.

ಗ್ರಾ.ಪಂ ಉಪಾಧ್ಯಕ್ಷೆ ರತ್ನವ್ವ ವಿಜಾಪೂರ, ಪಿಡಿಓ ಬಿ ಎ ಬಾವಾಖಾನ, ಡಾ ಸಣ್ಣಪಾಪಮ್ಮ, ಮಂಜುಳಾ ಪಿ, ಗೀತಾ ಚನಾಳ್‌, ವಿರುಪಾಕ್ಷ ಬಮ್ಮಶೆಟ್ಟಿ, ಪ್ರಕಾಶ ದೊಡಮನಿ, ಅಬ್ದುಲ ಸತ್ತರ ಲಾಡಮ್ಮನವರ ಸೇರಿದಂತೆ ರೈತ ಮಹಿಳೆಯರು ಹಾಗೂ ಕೃಷಿ ಕೂಲಿ ಕಾರ್ಮಿಕರು ಇದ್ದರು. ಹಿರಿಯ ವಿಜ್ಞಾನಿ ಡಾ ಗೀತಾ ಚಿಟಗುಬ್ಬಿ ಸ್ವಾಗತಿಸಿದರು, ಕಿರಿಯ ವಿಜ್ಞಾನಿ ಡಾ ರಾಜೇಶ್ವರಿ ದೇಸಾಯಿ ವಂದಿಸಿದರು. ಮೇಘನಾ ಕೆಲಗೇರಿ ನೀರೂಪಿಸಿದರು.