ಆಸ್ತಿ ಕರ ಹೆಚ್ಚಳ ವಾಪಸ್‌ಗೆ ಒತ್ತಾಯ

ಹುಬ್ಬಳ್ಳಿ : ಆರ್ಥಿಕ ಕುಸಿತ ಮತ್ತು ಕೋವಿಡ್‌ ಸಂಕಷ್ಟದ ನಡುವೆ ಮಹಾನಗರ ಪಾಲಿಕೆಯ ವ್ಯಾಪ್ತಿಯಲ್ಲಿನ ಆಸ್ತಿ ತೆರಿಗೆ ಹೆಚ್ಚಳ ವಿರೋಧಿಸಿ ಆಮ್‌ ಆದ್ಮಿ ಪಕ್ಷ (ಆಪ್‌) ಕಾರ್ಯಕರ್ತರು ಶುಕ್ರವಾರ ಮೊದಲ ಹಂತದ ಹೋರಾಟದ ಭಾಗವಾಗಿ ಪಾಲಿಕೆ ಕಚೇರಿ ಎದುರು ಪ್ರತಿಭಟನೆ ನಡೆಸಿದರು.

ಆಸ್ತಿ ಕರ ಹಿಂಪಡೆಯುವಂತೆ ಜನಸಾಮಾನ್ಯರು, ಸಂಘಟನೆಗಳು ಹಾಗೂ ಆಪ್‌ ಕಾರ್ಯಕರ್ತರು ರಾಜ್ಯ ಸರಕಾರ ಮತ್ತು ಧಾರವಾಡ ಜಿಲ್ಲಾ ಸಚಿವರಿಗೆ ಮನವಿ ಸಲ್ಲಿಸಿದರೂ, ಸರಕಾರ ಸಕಾರಾತ್ಮಕ ನಿರ್ಣಯ ಮಾಡಿಲ್ಲಎಂದು ಪ್ರತಿಭಟನಾಕಾರರು ಆರೋಪಿಸಿದರು.

ಬಿಜೆಪಿ ಸರಕಾರವು ತೆರಿಗೆ, ವಿವಿಧ ಶುಲ್ಕ, ಸುಂಕಗಳನ್ನು ಜನರ ಮೇಲೆ ಹೇರುತ್ತಿದೆ. ಹುಸಿ ಆಶ್ವಾಸನೆಗಳಿಂದ ಈಗ ಜನರು ಬಿಜೆಪಿ ಸರಕಾರದ ಮೇಲಿನ ಭರವಸೆ ಕಳೆದುಕೊಂಡಿದ್ದಾರೆ. ಆಸ್ತಿ ಕರ ಹೆಚ್ಚಳದಿಂದ ಪಾಲಿಕೆಗೆ ಕೇವಲ 12 ಕೋಟಿ ರೂ. ಆದಾಯ ಹೆಚ್ಚಾಗುವ ಅಂದಾಜು ಇದೆ. ಅದನ್ನೂ ಕೈ ಬಿಡಲು ಸರಕಾರ ತಯಾರಿಲ್ಲ. ಸರಕಾರ ಕರ ಹೆಚ್ಚಳ ಹಿಂಪಡೆಯದಿದ್ದರೆ, ಜನಮತ ಸಂಗ್ರಹಣೆ ಮಾಡಿ ಚಳವಳಿ ಮಾಡುತ್ತೇವೆ ಎಂದು ಎಎಪಿ ಜಿಲ್ಲಾ ಅಧ್ಯಕ್ಷ ಸಂತೋಷ ನರಗುಂದ ಎಚ್ಚರಿಸಿದರು.

ಈ ಪ್ರತಿಭಟನೆ ಆರಂಭ ಅಷ್ಟೇ, ಮುಂಬರುವ ದಿನಗಳಲ್ಲಿಜನರ ಬಳಿ ಹೋಗುವ ಕಾರ್ಯಕ್ರಮಗಳ ಮೂಲಕ ಜನ ವಿರೋಧಿ ನೀತಿಗಳನ್ನು ಬಯಲುಗೊಳಿಸುತ್ತೇವೆ. ದೆಹಲಿಯ ಜನಪರ ಶ್ರೇಷ್ಠ ಆಡಳಿತ ರಾಜ್ಯ ಸರಕಾರಕ್ಕೆ ಮಾದರಿಯಾಗಬೇಕಿತ್ತು ಎಂದು ಪಕ್ಷದ ಮುಖಂಡ ವಿಕಾಸ ಸೊಪ್ಪಿನ ಹೇಳಿದರು.

ಪಾಲಿಕೆ ಆಯುಕ್ತರ ಮೂಲಕ ಜಿಲ್ಲಾ ಉಸ್ತುವಾರಿ ಸಚಿವ ಜಗದೀಶ ಶೆಟ್ಟರ್‌ ಅವರಿಗೆ ಮನವಿ ಪತ್ರ ಸಲ್ಲಿಸಲಾಯಿತು. ಶಶಿಕುಮಾರ ಸುಳ್ಳದ, ವಿವೇಕಾನಂದ ಸಾಲಿನ್ಸ್‌, ಶಿವಲಿಂಗಪ್ಪ ಜಡೆಣ್ಣವರ, ವಿಜಯ ಸಾಯಿ, ತ್ಯಾಗರಾಜ ಅಲ್ಲಂಪಟ್ಟಿ, ಲಕ್ಷ್ಮಣ ರಾಠೋಡ, ಪ್ರತಿಭಾ ದಿವಾಕರ, ಹರಿಕೃಷ್ಣ, ಡೇನಿಯಲ್‌, ರಮೇಶ ಜಮಾದಾರ, ಸ್ಟಾಲಿನ್‌, ಆದಿತ್ಯ ನಾಯಕ, ನವೀನ ರಜಪೂತ ಸೇರಿದಂತೆ ಪಕ್ಷದ ಅನೇಕ ಮುಖಂಡರು ಹಾಗೂ ಕಾರ್ಯಕರ್ತರು ಸಾಮಾಜಿಕ ಅಂತರ ಕಾಯ್ದುಕೊಂಡು ಪ್ರತಿಭಟನೆಯಲ್ಲಿಪಾಲ್ಗೊಂಡಿದ್ದರು.