ತೋಡಿದ ಈ ಗುಂಡಿಗೆ ಮುಕ್ತಿ ಎಂದು...?!

ಧಾರವಾಡ : ಒಳಚರಂಡಿ ಪೈಪ್‌ ಅಳವಡಿಸಲು ನಗರದ ಕೆಲಗೇರಿ ನಗರ ಒಳಪ್ರವೇಶದ ಮುಖ್ಯ ರಸ್ತೆಯಲ್ಲಿಯೇ ತೋಡಿದ ಗುಂಡಿಗೆ ತಿಂಗಳಾದರೂ ಮುಕ್ತಿ ಸಿಕ್ಕಿಲ್ಲಿ. ಜನ ಸಂಚರಿಸಲು ಪರಿತಪಿಸುತ್ತಿದ್ದು, ಶಾಲೆ ಮಕ್ಕಳು, ವೃದ್ಧರು, ಮಹಿಳೆಯರು ಅಪಾಯ ಎದುರಿಸುತ್ತಿದ್ದಾರೆ.

ನಗರದ 1ನೇ ವಾರ್ಡ್‌ ವ್ಯಾಪ್ತಿಯ ಕೆಲಗೇರಿ ನಗರ ಒಳಪ್ರವೇಶದ ಮುಖ್ಯ ರಸ್ತೆಯನ್ನೇ ಅಗೆಯಲಾಗಿದೆ. ತಿಂಗಳಾದರೂ ರಸ್ತೆ ದುರಸ್ತಿ ಕಾರ್ಯ ಪೂರ್ಣಗೊಳಿಸಲು ಯಾರೂ ಮುಂದಾಗುತ್ತಿಲ್ಲ. ಹೀಗಾಗಿ ಸಾರ್ವಜನಿಕರು ಅಧಿಕಾರಿಗಳ ಮೇಲೆ ಹಿಡಿಶಾಪ ಹಾಕುತ್ತಿದ್ದಾರೆ.

ಇಲ್ಲಿ ಒಳಚರಂಡಿ ನೀರು ಹೋಗಲು 6 ಇಂಚಿನ ಡ್ರೈನೇಜ್‌ ಪೈಪ್‌ ಇರುವುದರಿಂದ ನೂತನವಾಗಿ 9 ಇಂಚಿನ ಡ್ರೈನೇಜ್‌ ಮಾಡಲು ರಸ್ತೆ ಅಗೆಯಲಾಗಿದೆ. ಆದರೆ, ಪಾಲಿಕೆ ಸದಸ್ಯರು ಹಾಗೂ ಕೆಲ ಸ್ಥಳೀಯರ ಸ್ವಹಿತಾಸಕ್ತಿಗಾಗಿ ಸಾರ್ವಜನಿಕರು ಸಮಸ್ಯೆ ಎದುರಿಸುವಂತಾಗಿದೆ. ಈ ಕುರಿತು ಹಲವು ಬಾರಿ ಸಂಬಂಧಿಸಿದ ಅಧಿಕಾರಿಗಳ ಗಮನಕ್ಕೆ ತಂದರೂ ಪ್ರಯೋಜನವಾಗಿಲ್ಲ ಎನ್ನುತ್ತಾರೆ ಸ್ಥಳೀಯರು.

ಸದ್ಯ ಮಳೆಗಾಲ ಆರಂಭವಾಗಿರುವುದರಿಂದ ಈ ರಸ್ತೆಯಲ್ಲಿ ನಡೆದಾಡುವುದು ಕಷ್ಟವಾಗುತ್ತಿದೆ. ಇದರಿಂದ ಪ್ರತಿದಿನ ವ್ಯಾಪಾರ, ವಹಿವಾಟು ಮಾಡುವ ಜನರು ಪರದಾಡಬೇಕಾಗಿದೆ. ಪರಿಣಾಮ ಇಲ್ಲಿನ ವ್ಯಾಪಾರ ಸಹ ಕುಂಠಿತವಾಗಿದೆ. ಈ ಗುಂಡಿಯಲ್ಲಿ ಈಗಾಗಲೇ ಹಲವು ಮಕ್ಕಳು, ವೃದ್ಧರು ಬಿದ್ದು ಸಣ್ಣಪುಟ್ಟ ಗಾಯ ಮಾಡಿಕೊಂಡಿದ್ದಾರೆ ಎಂದು ಸ್ಥಳೀಯರು ಅಳಲು ತೋಡಿಕೊಂಡರು.

ನಡು ರಸ್ತೆಯಲ್ಲಿಯೇ ನೂರಾರು ಮೀಟರ್‌ ಉದ್ದ, 3-4 ಅಡಿ ಆಳ ಅಗೆದಿರುವ ಒಳಚರಂಡಿಯ ಗುಂಡಿಯ ಮಣ್ಣಿನ ಮೇಲೆ ಪ್ರತಿದಿನ ಶಾಲೆ, ಕಾಲೇಜು ವಿದ್ಯಾರ್ಥಿಗಳು ಭಯದಲ್ಲಿಯೇ ನಡೆದುಕೊಂಡು ಹೋಗುತ್ತಿದ್ದಾರೆ. ರಾತ್ರಿ ಸಂಚರಿಸುವುದಂತೂ ಇನ್ನೂ ಕಷ್ಟವಾಗುತ್ತಿದೆ. ಅಲ್ಲದೆ ನೀರು ನಿಂತು ಸಾಕ್ರಾಮಿಕ ರೋಗ ಹರಡುವ ಆತಂಕ ಎದುರಾಗಿದೆ. ರಸ್ತೆ ದುಸ್ಥಿತಿಯಿಂದಾಗಿ ಸ್ಥಳೀಯರು ವಾಹನಗಳನ್ನು ಊರ ಹೊರಗೆ ನಿಲ್ಲಿಸುತ್ತಿದ್ದಾರೆ. ಸಂಬಂಧಿಸಿದ ಅಧಿಕಾರಿಗಳು ಕೂಡಲೇ ಕ್ರಮ ಕೈಗೊಳ್ಳಬೇಕು ಎಂಬುದು ಸ್ಥಳೀಯರ ಒತ್ತಾಸೆ.