ಮೂರು ರೈಲ್ವೆ ನಿಲ್ದಾಣಗಳಿಗೆ ಐಎಸ್‌ಒ ಪ್ರಶಸ್ತಿ

ಹುಬ್ಬಳ್ಳಿ : ಪರಿಸರ ನಿರ್ವಹಣಾ ವ್ಯವಸ್ಥೆಯನ್ನು ಯಶಸ್ವಿಯಾಗಿ ನಿರ್ವಹಿಸಿದ್ದಕ್ಕೆ ನೈರುತ್ಯ ರೈಲ್ವೆ ವಲಯ ಹುಬ್ಬಳ್ಳಿ ವಿಭಾಗದ ಧಾರವಾಡ, ಬೆಳಗಾವಿ ಮತ್ತು ವಾಸ್ಕೋ ಡಾ ಗಾಮಾ ನಿಲ್ದಾಣಗಳಿಗೆ ಐಎಸ್‌ಒ 14001- 2015 ಪ್ರಮಾಣೀಕರಣ ಪತ್ರ ದೊರೆತಿದೆ. ಆಯಾ ನಿಲ್ದಾಣ ವ್ಯವಸ್ಥಾಪಕರಿಗೆ ವಿಭಾಗೀಯ ವ್ಯವಸ್ಥಾಪಕ ಅರವಿಂದ ಮಳಖೇಡ ಪ್ರಮಾಣ ಪತ್ರಗಳನ್ನು ವಿತರಿಸಿದರು.

ರಾಷ್ಟ್ರೀಯ ಹಸಿರು ನ್ಯಾಯಾಧಿಕರಣ(ನ್ಯಾಷನಲ್‌ ಗ್ರೀನ್‌ ಟ್ರಿಬ್ಯೂನಲ್‌-ಎನ್‌ಜಿಟಿ) ಒದಗಿಸಿದ ಮಾರ್ಗಸೂಚಿಗಳನ್ನು ಅನುಸರಿಸಿ ಮತ್ತು ಇಂಟರ್‌ನ್ಯಾಷನಲ್‌ ಆರ್ಗನೈಸೇಶನ್‌ ಫಾರ್‌ ಸ್ಟ್ಯಾಂಡರ್ಡೈಸೇಶನ್‌ (ಐಎಸ್‌ಒ) ನಿಗದಿಪಡಿಸಿದ ನಂತರ ಈ ಪ್ರಮಾಣಪತ್ರವನ್ನು ನೀಡಲಾಗುತ್ತದೆ. ಪ್ರಮಾಣ ಪತ್ರವು ಮೂರು ವರ್ಷಗಳವರೆಗೆ ಮಾನ್ಯತೆ ಹೊಂದಿರುತ್ತದೆ. ನಿಲ್ದಾಣಗಳಲ್ಲಿನ ಕಾಯ್ದಿರಿಸಿದ ಕೋಣೆ, ವೇಟಿಂಗ್‌ ರೂಂ, ಉಪಹಾರ ಕೊಠಡಿಗಳು, ಉತ್ತಮ ಕುಡಿಯುವ ನೀರು, ನೈರ್ಮಲ್ಯ ಮತ್ತು ಪರಿಸರ ಸ್ನೇಹಿ ರೀತಿಯಲ್ಲಿಉತ್ಪತ್ತಿಯಾಗುವ ತ್ಯಾಜ್ಯ ನಿರ್ವಹಿಸಿದ್ದಕ್ಕಾಗಿ ಪ್ರಮಾಣ ಪತ್ರ ದೊರೆತಿದೆ.

ಐಎಸ್‌ಒ 14001-2015 (ಪರಿಸರ ನಿರ್ವಹಣಾ ವ್ಯವಸ್ಥೆ) ಪ್ರಮಾಣಪತ್ರಗಳನ್ನು ಅಂತಾರಾಷ್ಟ್ರೀಯ ನಿರ್ವಹಣಾ ವ್ಯವಸ್ಥೆ ಪ್ರಮಾಣೀಕರಣದ ಪ್ರತಿನಿಧಿಗಳು ವಿಭಾಗೀಯ ವ್ಯವಸ್ಥಾಪಕರಿಗೆ ನೀಡಿದ್ದರು.

ಎಡಿಆರ್‌ಎಂ ಎಸ್‌.ಕೆ. ಝಾ, ವಡೋದರ ಅಂತಾರಾಷ್ಟ್ರೀಯ ಮ್ಯಾನೇಜಮೆಂಟ್‌ ಸಿಸ್ಟಮ್‌ ಸರ್ಟಿಫಿಕೇಶನ್‌ನ ಅಧಿಕಾರಿಗಳಾದ ಎಸ್‌.ಕೆ.ಭಟ್ಟಾಚಾರ್ಯ, ವೀರೇಂದ್ರ ಶರ್ಮಾ ಈ ಸಂದರ್ಭದಲ್ಲಿದ್ದರು.