ಕರೋಕೆ ಗಾಯನ ಸ್ಪರ್ಧೆ ವಿಜೇತರು

ಧಾರವಾಡ : ನಗರದ ರಂಗಾಯಣದ ಸುವರ್ಣ ಸಮುಚ್ಛಯ ಸಭಾಂಗಣದಲ್ಲಿ ಪ್ರಿಮಿಯರ್‌ ಸಿಟಿಜನ್ಸ್‌ ಕ್ಲಬ್‌ ದಿ. ಜಾನಕಿ ಜೋಶಿ ಸ್ಮರಣಾರ್ಥ ಕರೋಕೆ ಚಲನಚಿತ್ರ ಗಾಯನ ಸ್ಪರ್ಧೆ ನಡೆಸಲಾಯಿತು.

ಕರೋಕೆ ಚಲನಚಿತ್ರ ಗಾಯನÜ ಸ್ಪರ್ಧೆಯಲ್ಲಿ ಕಾಲೇಜು ವಿದ್ಯಾರ್ಥಿಗಳಿಗೆ 1975ಕ್ಕೂ ಪೂರ್ವದಲ್ಲಿ ಬಿಡುಗಡೆಯಾದ ಹಿಂದಿ ಚಲನಚಿತ್ರ ಗೀತೆಗಳ ಸ್ಪರ್ಧೆಯಲ್ಲಿ ನಗರದ ಅನೇಕ ಮಹಾವಿದ್ಯಾಲಯಗಳಿಂದ 25ಕ್ಕೂ ಹೆಚ್ಚು ಕಲಾವಿದರು ಪಾಲ್ಗೊಂಡಿದ್ದರು.

ಅಂತಿಮವಾಗಿ ಪ್ರಶಸ್ತಿಗೆ ಮುತ್ತಿಟ್ಟವರು ಜೆಎಸ್‌ಎಸ್‌ ಕಾಲೇಜಿನ ಹರೀಶ್‌ ಅಬ್ಬಿಗೇರಿ (ಪ್ರ), ಕರ್ನಾಟಕ ಕಾಲೇಜಿನ ಮೇಘಾ ಕೊತ್ವಾಲ್‌ (ದ್ವಿ), ಜೆಎಸ್‌ಎಸ್‌ ಕಾಲೇಜಿನ ಸ್ನೇಹಾ ಪೊರವಾಲ್‌ (ತೃ) ಸ್ಥಾನ ಪಡೆದ ವಿದ್ಯಾರ್ಥಿಗಳಿಗೆ ನಗದು ಬಹುಮಾನ, ಸ್ಮರಣಿಕೆ ಹಾಗೂ ಪ್ರಶಸ್ತಿ ಪತ್ರ ನೀಡಿ ಗೌರವಿಸಲಾಯಿತು.

ಸಂಗೀತಗಾರ ಶ್ರೀನಿವಾಸ ಜೋಶಿ ಹಾಗೂ ಜಗದೀಶ್‌ ಮಳಗಿ ಸ್ಪರ್ಧೆಯ ನಿರ್ಣಾಯಕರಾಗಿದ್ದರು. ರಾಮಚಂದ್ರ ಜೋಶಿ, ಕ್ಲಬ್‌ನ ಅಧ್ಯಕ್ಷ ಸಿ.ಎಸ್‌. ಅಂಗಡಿ, ಕಾರ್ಯದರ್ಶಿ ಸುಧೀಂದ್ರ ಜಾಲಿಹಾಳ, ಸಂಘಟಕ ರಮೇಶ ತಂಡಿ ಸೇರಿದಂತೆ ಕ್ಲಬ್‌ನ ಸದಸ್ಯರು ಇದ್ದರು.