ಆಕಾಶವಾಣಿಯಿಂದ ಭಾಷಾ ತಾರತಮ್ಯ; ಪಾಫು ಕಿಡಿ

ಧಾರವಾಡ : ಆಕಾಶವಾಣಿಯು ದೇಶವೆಂದರೆ ಉತ್ತರ ಭಾರತ ಅಷ್ಟೇ ಎಂದು ತಿಳಿದುಕೊಂಡಿರುವಂತಿದೆ ಎಂದು ನಾಡೋಜ ಡಾ.ಪಾಟೀಲ ಪುಟ್ಟಪ್ಪ ಆರೋಪಿಸಿದ್ದಾರೆ. ಈ ಕುರಿತು ಪತ್ರಿಕಾ ಪ್ರಕಟಣೆ ನೀಡಿರುವ ಅವರು, ಅದು ಪ್ರತಿನಿತ್ಯ ಬೆಳಿಗ್ಗೆ ಸುದ್ದಿ ಬಿತ್ತರಣೆಯಲ್ಲಿ ಕೇವಲ ಪಂಜಾಬ, ಹರಿಯಾಣಾ, ದಿಲ್ಲಿ, ಹಿಮಾಚಲ ಪ್ರದೇಶ, ರಾಜಸ್ತಾನ, ಉತ್ತರ ಪ್ರದೇಶ ಮತ್ತು ಮಧ್ಯಪ್ರದೇಶ ಮಾತ್ರ ಎಂದು ತಿಳಿದುಕೊಂಡಿರುತ್ತದೆ. ಭಾರತದ ಜನರು ಆ ರಾಜ್ಯಗಳ ಪತ್ರಿಕೆಗಳ ಅಭಿಪ್ರಾಯ ಏನೆಂಬುದನ್ನು ತಿಳಿದುಕೊಳ್ಳುತ್ತವೆ. ಆದರೆ ಭಾರತದ ಬೇರೆ ರಾಜ್ಯಗಳ ದೇಶಿಯ ಭಾಷೆಯ ಪತ್ರಿಕೆಗಳು ಏನು ಹೇಳುತ್ತವೆ ಎನ್ನುವುದನ್ನು ತಿಳಿಸುವುದೇ ಇಲ್ಲ.

ಬೆಳಗಿನ ಸುದ್ದಿಯಲ್ಲಿ ಗುಜರಾತ, ಮಹಾರಾಷ್ಟ್ರ, ಕರ್ನಾಟಕ, ಕೇರಳ, ತಮಿಳುನಾಡು, ಆಂಧ್ರಪ್ರದೇಶ, ತೆಲಂಗಾಣ, ಓರಿಸ್ಸಾ ಮೊದಲಾದ ರಾಜ್ಯಗಳು ಏನು ಆಲೋಚಿಸುತ್ತವೆ ಎನ್ನುವುದನ್ನು ಆಕಾಶವಾಣಿ ತಿಳಿಸುವುದೇ ಇಲ್ಲ. ಈ ದೇಶಿಯ ಭಾಷೆಗಳ ರಾಜ್ಯಗಳಲ್ಲಿಯ ಜನರು ಏನು ಅಭಿಪ್ರಾಯ ಹೊಂದಿದ್ದಾರೆ ಎನ್ನುವುದು ತಿಳಿಯುವುದೇ ಇಲ್ಲ. ಆ ದೇಶಿಯ ಭಾಷೆಗಳ ರಾಜ್ಯಗಳು ಭಾರತದಲ್ಲಿ ಇಲ್ಲವೋ ಹೇಗೆ ? ಅಥವಾ ಭಾರತದಿಂದ ಸಿಡಿದು ಬೇರೆ ಹೋಗಿವೆಯೋ ಹೇಗೆ ? ಆಕಾಶವಾಣಿಗೆ ಅವೆಲ್ಲ ದೇಶಿಯ ಭಾಷೆಯ ಪತ್ರಿಕೆ ಏನು ಹೇಳುತ್ತಿವೆ ಎನ್ನುವುದು ಅಖಿಲ ಭಾರತಕ್ಕೆ ತಿಳಿಸುವದು ಆಕಾಶವಾಣಿಗೇಕೆ ಸಾಧ್ಯವಿಲ್ಲ ? ಹೀಗಿದ್ದು ಅದು ಅವೆಲ್ಲ ರಾಜ್ಯಗಳು ಭಾರತದಲ್ಲಿ ಇಲ್ಲ ಎನ್ನುವಂತೆ ಅವು ಅಭಿವದ್ಧಿ ಹೊಂದಿವೆ ಎನ್ನುವುದನ್ನು ತಿಳಿಸುವುದೇ ಇಲ್ಲ. ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ‘ಮನ್ ಕಿ ಬಾತ್’ ಕಾರ್ಯಕ್ರಮವನ್ನು ಇಡೀ ದೇಶಕ್ಕೆ ತಿಳಿಸುವಂತೆ ಈ ದೇಶಿಯ ಪತ್ರಿಕೆಗಳ ಅಭಿಪ್ರಾಯವನ್ನೇಕೆ ದೇಶಕ್ಕೆ ತಿಳಿಸುವುದಿಲ್ಲ. ಆ ರಾಜ್ಯಗಳು ಭಾರತದಲ್ಲಿ ಇಲ್ಲವೋ ಹೇಗೆ ಎಂದು ನಾಡೋಜ ಪಾಟೀಲ ಪುಟ್ಟಪ್ಪ ಪ್ರಶ್ನಿಸಿದ್ದಾರೆ.