ಗ್ರಾಪಂ ನೌಕರರ ಬೇಡಿಕೆ ಈಡೇರಿಸಿ

ಧಾರವಾಡ : ಗ್ರಾಮ ಪಂಚಾಯತಿ ನೌಕರರ ವಿವಿಧ ಬೇಡಿಕೆಗಳನ್ನು ಈಡೇರಿಸುವಂತೆ ಆಗ್ರಹಿಸಿ ಕರ್ನಾಟಕ ರಾಜ್ಯ ಗ್ರಾಮ ಪಂಚಾಯತಿ ನೌಕರರ ಸಂಘದವರು ಜಿಲ್ಲಾಧಿಕಾರಿ ಕಚೇರಿ ಎದುರು ಮಂಗಳವಾರ ಪ್ರತಿಭಟನೆ ಮಾಡಿದರು.

ರಾಜ್ಯದ 6024 ಗ್ರಾ.ಪಂ.ಗಳಲ್ಲಿ61,114 ಸಿಬ್ಬಂದಿ ಕೆಲಸ ಮಾಡುತ್ತಿದ್ದಾರೆ. ಅವರ ಕನಿಷ್ಠ ವೇತನಕ್ಕೆ 900 ಕೋಟಿ ರೂ. ವರ್ಷಕ್ಕೆ ಬೇಕಾಗುತ್ತದೆ. ಆದರೆ ಸಕಾರ ಕೇವಲ 518 ಕೋಟಿ ರೂ. ನೀಡಿದ್ದು, ಬಾಕಿ ಇರುವ 382 ಕೋಟಿ ರೂ.ಗಳನ್ನು ಶೀಘ್ರ ಬಿಡುಗಡೆ ಮಾಡಬೇಕು. ಗ್ರಾ.ಪಂ. ಸಿಬ್ಬಂದಿ ಕೊರೊನಾ ಹಾವಳಿಯಲ್ಲೂಪ್ರಾಮಾಣಿಕವಾಗಿ ಕೆಲಸ ಮಾಡಿ, ಸಾರ್ವಜನಿಕರಿಗೆ ಕೊರೊನಾ ಜಾಗೃತಿ ಮೂಡಿಸಿದ್ದಾರೆ. ಆದರೂ ಸರಕಾರ 2018- 19ರಲ್ಲಿ4 ತಿಂಗಳು ಹಾಗೂ 2019-2020ರಲ್ಲಿಮತ್ತೆ 4 ತಿಂಗಳ ವೇತನವನ್ನು ನೀಡಿಲ್ಲ. ಆದ್ದರಿಂದ ಸರಕಾರ ಗ್ರಾ.ಪಂ. ಸಿಬ್ಬಂದಿಗೆ ಸೂಕ್ತ ಸೌಲಭ್ಯಗಳನ್ನು ನೀಡಿ, ಬಾಕಿ ಇರುವ ವೇತನವನ್ನು ಬಿಡುಗಡೆ ಮಾಡಬೇಕು ಎಂದು ಪ್ರತಿಭಟನಾಕಾರರು ಒತ್ತಾಯಿಸಿದರು

ಬಿ.ಐ. ಈಳಿಗೇರ, ಮಹೇಶ ಪತ್ತಾರ, ಎನ್‌.ಎಂ.ಪಾಟೀಲ, ಮನೋಜ ತೋರಣಗಾ, ಶಿವಪ್ಪ ಹಳೆಮನಿ, ಮಹೇಶ ಹುಲಗೋಡ, ಇತರರು ಇದ್ದರು.