ಭಯ ಇದ್ದದ್ದಕ್ಕೆ ಶಾಸಕರು ರೆಸಾರ್ಟ್‌ಗೆ: ದೇಶಪಾಂಡೆ

ಧಾರವಾಡ : ನಮ್ಮ ಶಾಸಕರು ಭಯ ಇದೆ ಎಂದು ದೂರು ನೀಡಿದ್ದರಿಂದ ಅವರನ್ನು ರೆಸಾರ್ಟ್‌ಗೆ ಕರೆದೊಯ್ಯಲಾಗಿದೆ ಎಂದು ಕಂದಾಯ ಸಚಿವ ಆರ್‌.ವಿ. ದೇಶಪಾಂಡೆ ಸ್ಪಷ್ಟಪಡಿಸಿದ್ದಾರೆ.

ನಗರದಲ್ಲಿ ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ''ನಮ್ಮ ಸರಕಾರದ ಆಡಳಿತ ಸರಿಯಾಗಿ ನಡೆಯುತ್ತಿದೆ. ಸ್ಥಿರವಾಗಿ ಇದೆ ಕೂಡ. ಆದರೆ ನಮ್ಮ ಶಾಸಕರು ಒತ್ತಡ ಇದೆ ಎಂದು ಅಳಲು ತೋಡಿಕೊಂಡಿದ್ದಕ್ಕೆ ಶುಕ್ರವಾರ ಅವರನ್ನು ರೆಸಾರ್ಟ್‌ಗೆ ಕರೆದೊಯ್ಯಲಾಯಿತು'' ಎಂದರು.

''ನಮ್ಮ ಶಾಸಕರು ಯಾರೂ ಪಕ್ಷ ಬಿಡುವುದಿಲ್ಲ. ಯಾವುದೇ ಸರಕಾರ ಇರಲಿ. ಅತೃಪ್ತರು ಇರುವುದು ಸಹಜ. ಹಾಗಂತ ನಮ್ಮವರಾರೂ ಪಕ್ಷ ಬಿಡುವುದಿಲ್ಲ. ಸಿಎಲ್‌ಪಿ ಮೀಟಿಂಗ್‌ಗೆ ಹಾಜರಾಗಲು ಆಗಲ್ಲ ಎಂದು ಶಾಸಕ ಜಾಧವ ಪತ್ರ ಬರೆದು ತಿಳಿಸಿದ್ದಾರೆ. ಇನ್ನು ರಮೇಶ ಜಾರಕಿಹೊಳಿ ನಮ್ಮ ಸಂಪರ್ಕಕ್ಕೆ ಸಿಕ್ಕಿಲ್ಲ. ಬಿಜೆಪಿಯವರ ಕ್ಷೇತ್ರದಲ್ಲಿ ಬರಗಾಲವಿದೆ. ಆ ಶಾಸಕರೂ ಜನರ ಸಂಪರ್ಕಕ್ಕೆ ಸಿಗಬೇಕು'' ಎಂದು ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು.

''ರೆಸಾರ್ಟ್‌ ರಾಜಕಾರಣ ಹಾಗೂ ಸರಕಾರ ಅಸ್ಥಿರಗೊಳಿಸುವವರ ಬಗ್ಗೆ ಹೆಚ್ಚು ತಲೆ ಕೆಡಿಸಿಕೊಳ್ಳುವ ಅಗತ್ಯವಿಲ್ಲ. ನಮ್ಮ ಸರಕಾರ ಅಭಿವೃದ್ಧಿ ಕಡೆಗೆ ಹೆಚ್ಚು ಗಮನಹರಿಸುತ್ತದೆ. ನಾನೂ ಕೂಡ ಬರ ಪರಿಸ್ಥಿತಿ ಬಗ್ಗೆ ಕ್ರಮ ಕೈಗೊಳ್ಳುತ್ತೇನೆ. ಈಗಾಗಲೇ ನಮ್ಮ ಸರಕಾರ ಕೆಲ ತಾಲೂಕುಗಳನ್ನು ಬರಪೀಡಿತ ಎಂದು ಘೋಷಣೆ ಮಾಡಿದೆ. ಆ ತಾಲೂಕುಗಳ ಜನತೆಗೆ ಅನುಕೂಲವಾಗುವ ಕಾರ್ಯಕ್ರಮಗಳನ್ನು ಜಾರಿಗೆ ತರಲಾಗುವುದು'' ಎಂದು ದೇಶಪಾಂಡೆ ತಿಳಿಸಿದರು.