ರಾಷ್ಟ್ರೀಯ ಬಾಲಕಿಯರ ಬ್ಯಾಡ್ಮಿಂಟನ್‌ ಕ್ರೀಡಾಕೂಟ

ಹುಬ್ಬಳ್ಳಿ: ಇಲ್ಲಿನ ವಿಜಯನಗರದ ಲಯನ್ಸ್‌ ಆಂಗ್ಲಮಾಧ್ಯಮ ಶಾಲೆಯ ಮೂವರು ವಿದ್ಯಾರ್ಥಿನಿಯರು ಮಧ್ಯಪ್ರದೇಶದಲ್ಲಿಸ್ಕೂಲ್‌ ಗೇಮ್‌ ಫೆಡರೇಶನ್‌ ಆಫ್‌ ಇಂಡಿಯಾ ಸಂಸ್ಥೆ ಆಯೋಜಿಸಿದ್ದ ರಾಷ್ಟ್ರಮಟ್ಟದ ಬಾಲಕಿಯರ ಬ್ಯಾಡ್ಮಿಂಟನ್‌ ಕ್ರೀಡಾಕೂಟದಲ್ಲಿದ್ವಿತೀಯ ಸ್ಥಾನ ಪಡೆದಿದ್ದಾರೆ.

ಹುಬ್ಬಳ್ಳಿಯಿಂದ ಗ್ಲೋರಿಯಾ ವಿ.ಅಠವಾಲೆ, ಅಲ್ಫಿಯಾ ಆರ್‌. ಬಸರಿ ಹಾಗೂ ಸಾಚಿ ಎನ್‌. ದೇಸಾಯಿ ಎಂಬ ಕ್ರೀಡಾಪಟುಗಳು ಕರ್ನಾಟಕ ತಂಡದ ಪರವಾಗಿ ಪ್ರತಿನಿಧಿಸಿದ್ದರು. ಅವರ ಜತೆ ಮಂಗಳೂರಿನ ಇಬ್ಬರು ಬಾಲಕಿಯರು ತಂಡದಲ್ಲಿದ್ದರು.

ನ.13ರಂದು ಮಧ್ಯಪ್ರದೇಶದ ಚಿಂದ್ವಾರ ಕ್ರೀಡಾಂಗಣದಲ್ಲಿಮಹಾರಾಷ್ಟ್ರದ ವಿರುದ್ಧ ನಡೆದ ಅಂತಿಮ ಪಂದ್ಯದಲ್ಲಿಕರ್ನಾಟಕ ತಂಡ ತೀವ್ರ ಪೈಪೋಟಿ ನೀಡುವ ಮೂಲಕ ರನ್ನರ್‌ ಅಪ್‌ಗೆ ಆಗಿ ಹೊರಹೊಮ್ಮಿದೆ. 17 ವರ್ಷದೊಳಗಿನ ಬಾಲಕಿಯ ಬ್ಯಾಡ್ಮಿಂಟನ್‌ ಸ್ಪರ್ಧೆಯಲ್ಲಿಒಟ್ಟು 33 ತಂಡಗಳು ಸ್ಪರ್ಧೆಯಲ್ಲಿಭಾಗವಹಿಸಿದ್ದರು.

ಡಬಲ್ಸ್‌ ಬ್ಯಾಡ್ಮಿಂಟನ್‌ ಸ್ಪರ್ಧೆಯಲ್ಲಿಗ್ಲೋರಿಯಾ ಅಠವಾಲೆ ಮತ್ತು ಅಲ್ಫಿಯಾ ಬಸರಿ ಕಂಚಿನ ಪದಕ ಪಡೆದಿದ್ದಾರೆ. 2020ರ ಜನವರಿಯಲ್ಲಿನಡೆಯಲಿರುವ ಖೇಲೋ ಇಂಡಿಯಾ ಸ್ಪರ್ಧೆಯಲ್ಲಿ ಈ ಸಾಧಕ ಕ್ರೀಡಾಪಟುಗಳು ಸ್ಪರ್ಧಿಸಲಿದ್ದಾರೆ.

ಆತ್ಮೀಯ ಸ್ವಾಗತ
ಮಧ್ಯಪ್ರದೇಶದಿಂದ ಸೋಮವಾರ ಮಧ್ಯಾಹ್ನ ನಗರದ ರೈಲ್ವೆ ನಿಲ್ದಾಣಕ್ಕೆ ಆಗಮಿಸಿದ ಸಾಧಕ ಕ್ರೀಡಾಪಟುಗಳನ್ನು ಲಯನ್ಸ್‌ ಕ್ಲಬ್‌ ಶಾಲೆಯ ಆಡಳಿತ ಮಂಡಳಿ ಹಾಗೂ ಪಾಲಕರು ಆತ್ಮೀಯ ಸ್ವಾಗತ ಕೋರಿದರು.

ಲಯನ್ಸ್‌ ಸ್ಕೂಲ್‌ ಕಾರ್ಯದರ್ಶಿ ಜಯಪ್ರಕಾಶ ಟೆಂಗಿನಕಾಯಿ ಮಾತನಾಡಿ, ಓದಿನಲ್ಲಿಯೂ ಮುಂದೆ ಇರುವ ಈ ವಿದ್ಯಾರ್ಥಿನಿಯರು ಮತ್ತಷ್ಟು ಸಾಧನೆ ಮಾಡಲಿ ಎಂದು ಶುಭ ಹಾರೈಸಿದರು.ಭಾಸ್ಕರ ಸೋಲಾಪುರಕರ, ಪ್ರಾಚಾರ್ಯೆ ಸುಧಾ ನಾಯಕ, ಶ್ರೀಕಾಂತ ಜೋಶಿ, ರಾಜೇಶ ಹೆಬಸೂರು, ದೈಹಿಕ ಶಿಕ್ಷಕಿ ಕಾಂಚನಾ ಕುಂದಗೊಳ ಸೇರಿದಂತೆ ವಿದ್ಯಾರ್ಥಿನಿಯರ ಪಾಲಕರು ಹಾಜರಿದ್ದರು.