ಭಿತ್ತಿ ಪತ್ರ ಹಂಚಿಕೆಗೆ ಆಕ್ಷೇಪ

ಧಾರವಾಡ : ಮುರುಘಾಮಠದ ಟ್ರಸ್ಟ್‌ ಕಮಿಟಿ ಪದಾಧಿಕಾರಿಗಳ ಬಗ್ಗೆ ಅವಹೇಳನಕಾರಿ ಆರೋಪಗಳಿರುವ ಭಿತ್ತಿಪತ್ರಗಳನ್ನು ಹಂಚುತ್ತಿದ್ದ ಶ್ರೀಮಠದ ಮಾಜಿ ಪೀಠಾಧಿಪತಿ ಶಿವಯೋಗಿ ಸ್ವಾಮೀಜಿ ಅವರನ್ನು ಶನಿವಾರ ಪೊಲೀಸರು ಶಹರಠಾಣೆಗೆ ಕರೆತಂದು ಕಾನೂನು ಸುವ್ಯವಸ್ಥೆ ಧಕ್ಕೆ ತರುವ ಯಾವ ಕೆಲಸವನ್ನೂ ಮಾಡದಂತೆ ತಾಕೀತು ಮಾಡಿ ಕಳುಹಿಸಿದ್ದಾರೆ.

ಶ್ರೀ ಶಿವಯೋಗಿ ಸ್ವಾಮೀಜಿ ಶನಿವಾರ ನಗರದ ಶಿವಾಜಿವೃತ್ತ, ರೀಗಲ್‌ ಸರ್ಕಲ್‌, ಮಾರ್ಕೆಟ್‌ ಪ್ರದೇಶಗಳಲ್ಲಿಭಿತ್ತಿ ಪತ್ರಗಳನ್ನು ಹಂಚುತ್ತಿದ್ದರು. ಇದಕ್ಕೆ ಕೆಲವರು ಆಕ್ಷೇಪ ವ್ಯಕ್ತಪಡಿಸಿದ್ದರಿಂದ ಸ್ವಲ್ಪ ಹೊತ್ತು ಗೊಂದಲದ ವಾತಾವರಣ ನಿರ್ಮಾಣ ಆಗಿತ್ತು. ಮಾತ್ರವಲ್ಲದೇ ಕೆಲವರು ಈ ಬಗ್ಗೆ ಶಹರ ಠಾಣೆಗೆ ದೂರು ನೀಡುತ್ತಿದ್ದಂತೆಯೇ ಸ್ವಾಮೀಜಿಗಳನ್ನು ಠಾಣೆಗೆ ಕರೆತಂದ ಪೊಲೀಸರು ನಿಮ್ಮಲ್ಲಿನ ವೈಮನಸ್ಸು ಏನೇ ಇದ್ದರು ಅದನ್ನು ಕಾನೂನಾತ್ಮಕವಾಗಿ ವ್ಯಕ್ತಪಡಿಸಿ. ಕಾನೂನು ಸುವ್ಯವಸ್ಥೆಗೆ ಧಕ್ಕೆ ಆಗದಂತೆ ಯಾವುದೇ ನಿರ್ಧಾರ ತೆಗೆದುಕೊಳ್ಳಬೇಡಿ ಎಂದು ಶಿವಯೋಗಿ ಶ್ರೀಗಳಿಗೆ ತಿಳಿಸಿ ಕಳಿಸಲಾಯಿತು ಎಂದು ಪೊಲೀಸರು ವಿಕ ಕ್ಕೆ ತಿಳಿಸಿದ್ದಾರೆ.