ಆ್ಯಪ್ನಗರ

ಹುಬ್ಬಳ್ಳಿ ನನಗೆ 2ನೇ ತವರು ಎಂದಿದ್ದ ಪರಿಕ್ಕರ್‌

ಹುಬ್ಬಳ್ಳಿಯ ಹೊಸೂರದಲ್ಲಿ 'ನಮ್ಮ ಚಿಕ್ಕಮ್ಮ ಇದ್ದರು, ಅವರ ಮನೆಗೆ ಆಗಾಗ್ಗೆ ಬರುತ್ತಿದ್ದೆ. ಶಾಲಾ ಕಾಲೇಜು ದಿನಗಳಲ್ಲಿ ರಜೆ ಅವಧಿಯನ್ನು ಇಲ್ಲಿಯೇ ಕಳೆಯುತ್ತಿದ್ದೆ. ಇದು ನನಗೆ ಎರಡನೇ ತವರು ಮನೆ ಇದ್ದಂತೆ' ಎಂದು ಪರಿಕ್ಕರ್‌ ಹೇಳಿದ್ದನ್ನು ಎಸ್‌ಡಿಎಂ ಮುಖ್ಯ ಆರ್ಥಿಕ ಕಾರ್ಯದರ್ಶಿ ವಿ.ಜಿ. ಪ್ರಭು 'ವಿಕ' ಜೊತೆ ಹಂಚಿಕೊಂಡರು. ಆದರೆ, ಸದ್ಯ ಪರಿಕ್ಕರ್‌ ಅವರ ಸಂಬಂಧಿಗಳ ಬಗ್ಗೆ ಮಾಹಿತಿ ಇಲ್ಲ ಎಂದು ಹೇಳಿದರು.

Vijaya Karnataka 18 Mar 2019, 1:42 pm
ಹುಬ್ಬಳ್ಳಿ : ''ಹುಬ್ಬಳ್ಳಿ-ಧಾರವಾಡ ನನಗೇನೂ ಹೊಸದಲ್ಲ, ಶಾಲಾ-ಕಾಲೇಜು ದಿನಗಳಲ್ಲಿ ರಜೆ ದಿನಗಳನ್ನು ಹುಬ್ಬಳ್ಳಿಯಲ್ಲಿಯೇ ಕಳೆಯುತ್ತಿದ್ದೆ. ಹಾಗಾಗಿ ಇಲ್ಲಿಯ ಪ್ರತಿ ರಸ್ತೆಗಳು ಗೊತ್ತು''..ಹೀಗೆಂದು ಭಾನುವಾರ ನಿಧನ ಹೊಂದಿದ ಗೋವಾ ಮುಖ್ಯಮಂತ್ರಿ ಮನೋಹರ ಪರಿಕ್ಕರ್‌, ರಕ್ಷಣಾ ಸಚಿವರಾಗಿದ್ದ ವೇಳೆ ಹುಬ್ಬಳ್ಳಿ ಮತ್ತು ಧಾರವಾಡದಲ್ಲಿ ಆಯೋಜಿಸಿದ್ದ ಸಮಾರಂಭದಲ್ಲಿ ಪಾಲ್ಗೊಂಡು ಹೇಳಿಕೊಂಡಿದ್ದರು.
Vijaya Karnataka Web Parikkar


ಹುಬ್ಬಳ್ಳಿಯ ಹೊಸೂರದಲ್ಲಿ 'ನಮ್ಮ ಚಿಕ್ಕಮ್ಮ ಇದ್ದರು, ಅವರ ಮನೆಗೆ ಆಗಾಗ್ಗೆ ಬರುತ್ತಿದ್ದೆ. ಶಾಲಾ ಕಾಲೇಜು ದಿನಗಳಲ್ಲಿ ರಜೆ ಅವಧಿಯನ್ನು ಇಲ್ಲಿಯೇ ಕಳೆಯುತ್ತಿದ್ದೆ. ಇದು ನನಗೆ ಎರಡನೇ ತವರು ಮನೆ ಇದ್ದಂತೆ' ಎಂದು ಪರಿಕ್ಕರ್‌ ಹೇಳಿದ್ದನ್ನು ಎಸ್‌ಡಿಎಂ ಮುಖ್ಯ ಆರ್ಥಿಕ ಕಾರ್ಯದರ್ಶಿ ವಿ.ಜಿ. ಪ್ರಭು 'ವಿಕ' ಜೊತೆ ಹಂಚಿಕೊಂಡರು. ಆದರೆ, ಸದ್ಯ ಪರಿಕ್ಕರ್‌ ಅವರ ಸಂಬಂಧಿಗಳ ಬಗ್ಗೆ ಮಾಹಿತಿ ಇಲ್ಲ ಎಂದು ಹೇಳಿದರು.

ಪರಿಕ್ಕರ್‌ ಜತೆ ಕೆಲಸ:


ಸಂಘ ಪರಿವಾರದ ಮುಖಂಡ ಮತ್ತು ಬಿಜೆಪಿ ನಾಯಕ ರಾಜೇಂದ್ರ ಗೋಖಲೆ ಅವರು ಮನೋಹರ ಪರಿಕ್ಕರ ಜತೆ ಉತ್ತಮ ಸಂಬಂಧ ಹೊಂದಿದ್ದರು.

'ವಿಕ' ಜೊತೆಗೆ ಮಾತನಾಡಿದ ಗೋಖಲೆ, ''2002-2003ರಲ್ಲಿ ಗೋವಾ ವಿಧಾನಸಭೆ ಚುನಾವಣೆಯಲ್ಲಿ ಉಸ್ತುವಾರಿಯಾಗಿ ಕೆಲಸ ನಿರ್ವಹಿಸಿದ್ದೆ. ಪರಿಕ್ಕರ ಅವರು ಪ್ರತಿನಿಧಿಸುವ ಕ್ಷೇತ್ರವೂ ನನ್ನ ಉಸ್ತುವಾರಿ ವ್ಯಾಪ್ತಿಯಲ್ಲಿತ್ತು. ಆ ಚುನಾವಣೆಯಲ್ಲಿ ಬಿಜೆಪಿ ಸ್ಪಷ್ಟ ಬಹುಮತದೊಂದಿಗೆ ಮೊದಲ ಬಾರಿಗೆ ಅಧಿಕಾರಕ್ಕೆ ಬಂದಿತ್ತು'' ಎಂಬುದನ್ನು ನೆನಪಿಸಿಕೊಂಡರು.

ವಿವಾದ ಸೃಷ್ಟಿಸಿದ್ದ ಪರಿಕ್ಕರ್‌ ಪತ್ರ


ಮಹದಾಯಿ ನದಿ ನೀರು ಹಂಚಿಕೆ ವಿವಾದ ಕಾವೇರಿದ್ದ ಸಂದರ್ಭದಲ್ಲಿ ಗೋವಾ ಸಿಎಂ ಆಗಿದ್ದ ಮನೋಹರ ಪರಿಕ್ಕರ್‌, ಕರ್ನಾಟಕ ಬಿಜೆಪಿ ಅಧ್ಯಕ್ಷ ಬಿ.ಎಸ್‌. ಯಡಿಯೂರಪ್ಪ ಅವರಿಗೆ ಪತ್ರ ಬರೆದಿದ್ದು ದೊಡ್ಡ ವಿವಾದಕ್ಕೆ ಕಾರಣವಾಗಿತ್ತು.

ಕುಡಿಯುವ ನೀರಿಗಾಗಿ ಮಹದಾಯಿ ನದಿಯಿಂದ ಕರ್ನಾಟಕಕ್ಕೆ 7.56 ಟಿಎಂಸಿ ನೀರು ಒದಗಿಸಲು ಗೋವಾ ಸರಕಾರ ಬದ್ಧವಿದೆ ಎಂದು ಪರಿಕ್ಕರ್‌ ಪತ್ರ ಬರೆದಿದ್ದರು. ಈ ಪತ್ರವನ್ನು ಕಳೆದ ವಿಧಾನಸಭೆ ಚುನಾವಣೆ ಸಂದರ್ಭದಲ್ಲಿ ಬಿಜೆಪಿ ಅಧ್ಯಕ್ಷ ಯಡಿಯೂರಪ್ಪ ಹುಬ್ಬಳ್ಳಿಯಲ್ಲಿ ಬಿಡುಗಡೆ ಮಾಡಿದ್ದರು. ಈ ವಿಷಯ ಕಾಂಗ್ರೆಸ್‌-ಬಿಜೆಪಿ ಮಧ್ಯೆ ಭಾರಿ ವಾಕ್ಸಮರಕ್ಕೆ ಕಾರಣವಾಗಿದ್ದನ್ನು ಇಲ್ಲಿ ಸ್ಮರಿಸಬಹುದು.

''ಗೋವಾ ಸಿಎಂ ಬಿಜೆಪಿ ಅಧ್ಯಕ್ಷರಿಗೆ ಬರೆದಿರುವ ಪತ್ರಕ್ಕೆ ಯಾವುದೇ ಮಾನ್ಯತೆ ಇಲ್ಲ. ಸರಕಾರದ ಮುಖ್ಯಮಂತ್ರಿಯಾದ ನನಗೆ ಪತ್ರ ಬರೆಯಬೇಕಿತ್ತು. ಇದೇ ಪತ್ರವನ್ನು ಪರಿಕ್ಕರ್‌ ನ್ಯಾಯಾಧಿಕರಣದಲ್ಲಿ ಸಲ್ಲಿಸಲಿ'' ಎಂದು ಹೇಳುವ ಮೂಲಕ ರಾಜ್ಯದ ಆಗಿನ ಸಿಎಂ ಸಿದ್ದರಾಮಯ್ಯ ಸವಾಲು ಹಾಕಿದ್ದರು.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ