ಯೋಗ ಮಾಡಿದ ಹುಬ್ಬಳ್ಳಿ ಬಾಲಕಿಗೆ ಪ್ರಧಾನಿ ಮೋದಿ ಮೆಚ್ಚುಗೆ

ಹುಬ್ಬಳ್ಳಿ: ಆರು ವರ್ಷದ ಬಾಲಕಿಯ ಯೋಗಾಸನದ ವಿಡಿಯೋ ಸಖತ್ ವೈರಲ್‌ ಆಗಿದ್ದು, ಪ್ರಧಾನಿ ನರೇಂದ್ರ ಮೋದಿಯವರು ಸಹ ಬಾಲಕಿಯ ಯೋಗಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಅಷ್ಟೇ ಅಲ್ಲದೇ ಆ ವಿಡಿಯೋವನ್ನು ಶೇರ್‌ ಮಾಡುವ ಮೂಲಕ ದೇಶದ ಜನತೆಗೆ ಮನೆಯಲ್ಲಿಯೇ ಇರಿ ಎಂಬ ಸಂದೇಶವನ್ನು ನೀಡಿದ್ದಾರೆ.

ಹುಬ್ಬಳ್ಳಿಯ ನಿವಾಸಿ ಇಫ್ರಾ ಮುಲ್ಲಾ ಎಂಬ ಬಾಲಕಿಯೇ ಪ್ರಧಾನಿ ಮೋದಿಯವರ ಮೆಚ್ಚುಗೆಗೆ ಪಾತ್ರಳಾದ ಬಾಲಕಿ. ಲಾಕ್‌ ಡೌನ್‌ ಸಮಯದಲ್ಲಿಮಗಳು ಇಫ್ರಾ ಮನೆಯೊಳಗೆ ಯೋಗ ಮಾಡುತ್ತಿರುವ ವಿಡಿಯೋವನ್ನು ಅವರ ತಂದೆ ಇಮ್ತಿಯಾಜಹಮದ್‌ ಮುಲ್ಲಾ ಟ್ವೀಟ್‌ ಮಾಡಿದ್ದರು. ಅದನ್ನು ನೋಡಿದ ಪ್ರಧಾನಿಗಳು ತಮ್ಮ ಟ್ವಿಟ್ಟರ್‌ ಖಾತೆಯಲ್ಲಿಅದನ್ನು ಹಂಚಿಕೊಂಡಿದ್ದಾರೆ.


ಒಂದನೇ ತರಗತಿ ಮುಗಿಸಿರುವ ಇಫ್ರಾ ಮುಲ್ಲಾ ಲಾಕ್ಡೌನ್‌ ಮಧ್ಯೆ ಒಂದು ದಿನ ಟಿವಿ ನೋಡುತ್ತಾ ಯೋಗ ಮಾಡುತ್ತಿದ್ದಳು. ಅದನ್ನು ಅವರ ತಾಯಿ ನೋಡಿ ವಿಡಿಯೋ ಮಾಡಿದ್ದರು. ಅದನ್ನು ಏಪ್ರಿಲ್‌ 16ರಂದು ಇಮ್ತಿಯಾಜ್ ಅಹಮ್ಮದ್‌ ಮುಲ್ಲಾ ಟ್ವಿಟ್ಟರ್‌ನಲ್ಲಿ ಶೇರ್‌ ಮಾಡಿದ್ದರು.

ಟ್ವೀಟ್‌ ಮಾಡುವಾಗ ಪಿಎಂ ನರೇಂದ್ರ ಮೋದಿ, ಬಾಲಿವುಡ್‌ ನಟ ಅಕ್ಷಯ್‌ ಕುಮಾರ್‌ ಅವರನ್ನು ಟ್ಯಾಗ್‌ ಮಾಡಿದ್ದರು. ಇದನ್ನು ಮರುದಿನ ನೋಡಿದ ಮೋದಿಯವರು ರೀಟ್ವೀಟ್‌ ಮಾಡಿ 'ಗ್ರೇಟ್, ಸ್ಟೇ ಹೋಂ ಸ್ಟೇ ಹೆಲ್ದಿ ಅಂಡ್‌ ಫಿಚ್‌' ಎಂದು ಬರೆಯುವ ಮೂಲಕ ಬಾಲಕಿಗೆ ಅಭಿನಂದನೆ ಸಲ್ಲಿಸಿದ್ದಾರೆ. ಲಕ್ಷಾಂತರ ಮಂದಿ ಅನುಯಾಯಿಗಳನ್ನು ಹೊಂದಿರುವ ಪ್ರಧಾನಿ ಮೋದಿಯವರು ಅದನ್ನು ಹಂಚಿಕೊಂಡಿದ್ದರಿಂದ ಲಕ್ಷಾಂತರ ಜನರು ಲೈಕ್‌ ಮಾಡಿದ್ದಾರೆ.

ಬಾಲಕಿ ಇಫ್ರಾ ಮುಲ್ಲಾ ಅವರ ತಂದೆ ಹುಬ್ಬಳ್ಳಿಯಲ್ಲಿನೈರುತ್ವ ರೈಲ್ವೆ ಪ್ರಧಾನ ಮುಖ್ಯ ವೈದ್ಯಕೀಯ ನಿರ್ದೇಶಕರ ಕಚೇರಿಯಲ್ಲಿ ಸೂಪರಿಂಡೆಂಟ್‌ ಆಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಪ್ರಧಾನಿ ಮೋದಿಯವರು ಮಗಳ ವೀಡಿಯೊ ಶೇರ್‌ ಮಾಡಿದ್ದು, ಇಡೀ ಕುಟುಂಬಕ್ಕೆ ಬಹಳಷ್ಟು ಖುಷಿಯಾಗಿದೆ ಎಂದು ಅವರು ಸಂತಸ ಹಂಚಿಕೊಂಡಿದ್ದಾರೆ.