ಕಲಘಟಗಿ: ಜಿಲೆಟಿನ್‌ ಅಕ್ರಮ ಸಂಗ್ರಹ ಹೊಂದಿದ್ದ ಆರೋಪಿಯನ್ನು ವಶಕ್ಕೆ ಪಡೆದ ಪೊಲೀಸರು!

ಧಾರವಾಡ: ಕಲಘಟಗಿ ತಾಲೂಕಿನ ಮುತ್ತಗಿ ಗ್ರಾಮದ ಶಿವಚಂದ್ರನ್‌ ಸ್ಟೋನ್‌ ಮತ್ತು ಕ್ರಶರ್‌ ಇಂಡಸ್ಟ್ರಿಯ ಖಡಿ ಮಶಿನ್‌ ಕ್ವಾರಿಯಲ್ಲಿಅಕ್ರಮವಾಗಿ ಇಟ್ಟಿದ್ದ ಜಿಲೆಟಿನ್‌ ಎಂಬ ಸ್ಫೋಟಕ ವಸ್ತು ಸಿಕ್ಕಿದ್ದು, ಪೊಲೀಸರು ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರೋಪಿಯನ್ನು ಬಂಧಿಸಿ ಸ್ಫೋಟಕ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ.

ಹುಬ್ಬಳ್ಳಿ- ಧಾರವಾಡ ಆಂತರಿಕ ಭದ್ರತಾ ವಿಭಾಗಕ್ಕೆ ಬಂದ ದೂರು ಆಧರಿಸಿ ದಾಳಿ ನಡೆಸಿದ ಆಂತರಿಕ ಭದ್ರತಾ ವಿಭಾಗದ ಇನ್ಸಪೆಕ್ಟರ್‌ ಜಯಶ್ರೀ ಎಸ್‌.ಮಾನೆ ನೇತೃತ್ವದ ಅಧಿಕಾರಿಗಳು ನಿನ್ನೆ(ಜ.23-ಶನಿವಾರ) ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿದ್ದರು.

ಹುಣಸೋಡು ಸ್ಫೋಟ: ಶಿವಮೊಗ್ಗ ಸುತ್ತಮುತ್ತ ಕಲ್ಲು ಕ್ವಾರಿಯ ಕರಾಳ ಕಥೆಗಳು...

ಧಾರವಾಡ ಜಯನಗರದ ಪ್ರೇಮಾ ವೀರನಗೌಡ ಪಾಟೀಲ ಎಂಬುವರಿಗೆ ಸೇರಿದ ಈ ಕ್ವಾರಿಯಲ್ಲಿಅಕ್ರಮವಾಗಿ ಜಿಲೆಟಿನ್‌ ಎಂಬ ಸ್ಫೋಟಕ ವಸ್ತುಗಳನ್ನು ಇಟ್ಟಿರುವುದು ದೃಢಪಟ್ಟಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಈ ಬಗ್ಗೆ ತನಿಖೆ ನಡೆಸಿದ ಪೊಲೀಸ್‌ ಅಧಿಕಾರಿಗಳು ಪ್ಲಾಸ್ಟಿಕ್‌ ಚೀಲ ಹಾಗೂ ರಟ್ಟಿನ ಬಾಕ್ಸ್‌ಗಳಲ್ಲಿಇಟ್ಟಿದ್ದ 234 ಜಿಲೆಟಿನ್‌ ಕಡ್ಡಿಗಳು, 675 ಇಲೆಕ್ಟ್ರಾನಿಕ್‌ ಡೆಟೋನೇಟರ್‌ಗಳು ಹಾಗೂ ಒಂದು ಮೆಗ್ಗರ್‌ ಮಶಿನ್‌ ವಶಕ್ಕೆ ಪಡೆದಿದ್ದಾರೆ.

ಪ್ರತಿಯೊಂದು ಜೀವಕ್ಕೂ ಬೆಲೆಯಿದೆ, ಘಟನೆ ಬಗ್ಗೆ ತನಿಖೆಯಾಗಬೇಕು; ಬಿವೈ ರಾಘವೇಂದ್ರ

ಆರೋಪಿ ಶಿವಕುಮಾರ ವೀರನಗೌಡ ಪಾಟೀಲ ಎಂಬುವರನ್ನು ಕಲಘಟಗಿ ಪೊಲೀಸರಿಗೆ ಒಪ್ಪಿಸಲಾಗಿದೆ. ಈ ಕುರಿತು ಕಲಘಟಗಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ ಎಂದು ಆಂತರಿಕ ಭದ್ರತಾ ವಿಭಾಗ, ಉತ್ತರವಲಯದ ಉಸ್ತುವಾರಿ ಡಿವೈಎಸ್‌ಪಿ ಅನಿಲಕುಮಾರ್‌ಎಸ್‌.ಭೂಮರಡ್ಡಿ ತಿಳಿಸಿದ್ದಾರೆ.