ಪೌರತ್ವ ತಿದ್ದುಪಡಿ ಕಾಯ್ದೆ ವಿರೋಧಿಸಿ ಪ್ರತಿಭಟನೆ

ಅಳ್ನಾವರ: ಪೌರತ್ವ ತಿದ್ದುಪಡಿ ಕಾಯ್ದೆ ಮತ್ತು ರಾಷ್ಟ್ರೀಯ ಪೌರತ್ವ ನೋಂದಣಿ ವಿರೋಧಿಸಿ ಇಲ್ಲಿನ ಅಂಜುಮನ್‌ ಏ ಇಸ್ಲಾಂ ಸಂಸ್ಥೆ ನಡೆಸುತ್ತಿರುವ ಪ್ರತಿಭಟನೆ ನಾಲ್ಕನೇ ದಿನಕ್ಕೆ ಕಾಲಿಟ್ಟಿದೆ.

ಪಟ್ಟಣ ಪಂಚಾಯಿತಿ ಕಾರ್ಯಾಲಯದ ಎದುರು ಬೆಳಿಗ್ಗೆಯಿಂದ ಸಂಜೆಯವರೆಗೆ ಧರಣಿ ಕುಳಿತ ಪ್ರತಿಭಟನಾಕಾರರು, ಕೇಂದ್ರ ಸರ್ಕಾರದ ಧೋರಣೆಯನ್ನು ಖಂಡಿಸಿ ತಕ್ಷಣ ಇಂತಹ ಮಸೂದೆಯನ್ನು ರದ್ದು ಪಡಿಸಬೇಕು. ಈ ಕಾಯ್ದೆ ಜಾತ್ಯಾತೀತ ನಿಲುವಿಗೆ ವಿರುದ್ಧವಾಗಿದೆ ಎಂದರು.

ನೂರಾನಿ ಮಸಜಿದ್‌, ರೆಹಮತ್‌ ಮಸಜಿದ್‌, ಇರ್ಶಾದ್‌ ಮಸಜಿದ್‌, ಚೋಟಿ ಮಸಜಿದ್‌, ಆಶ್ರಯ ಕಾಲೋನಿಯ ಮಸಜಿದ್‌ ಏ ರಸೀದ್‌ ಹಾಗೂ ಅಂಬೊಳ್ಳಿ, ಅರವಟಗಿ, ಹೊನ್ನಾಪೂರ ಗ್ರಾಮಗಳ ಮಸೀದಿಗಳ ಮುತವಲ್ಲಿಗಳು, ಪದಾಧಿಕಾರಿಗಳು ಭಾಗವಹಿಸಿದ್ದರು. ಕಾಯ್ದೆ ರದ್ದು ಪಡಿಸಲು ಆಗ್ರಹಿಸಿ ರಾಷ್ಟ್ರಪತಿಗಳಿಗೆ ನೀಡಿದ ಮನವಿಯನ್ನು ಉಪ ತಹಸೀಲ್ದಾರ್‌ ಶಿವಾನಂದ ಹೆಬ್ಬಳ್ಳಿ ಸ್ವೀಕರಿಸಿದರು.