‘ಉದ್ಯೋಗವಿಲ್ಲದ ಬಡಿಗ’ ಶಬ್ದ ಬಳಕೆಗೆ ಹೊರಟ್ಟಿ ವಿಷಾದ

ಹುಬ್ಬಳ್ಳಿ : ಜೆಡಿಎಸ್‌ ಮುಖಂಡ ಎಚ್‌.ವಿಶ್ವನಾಥ ಅವರ ಬಗ್ಗೆ ಮಾತನಾಡುವ ಭರದಲ್ಲಿ ಲೋಕಾರೂಢಿಯಾಗಿ 'ಉದ್ಯೋಗವಿಲ್ಲದ ಬಡಿಗ' ಎಂಬ ಶಬ್ದ ಬಳಸಿದ್ದಕ್ಕೆ ವಿಷಾದ ವ್ಯಕ್ತಪಡಿಸಿರುವ ವಿಧಾನ ಪರಿಷತ್‌ ಸದಸ್ಯ ಬಸವರಾಜ ಹೊರಟ್ಟಿ ತಮ್ಮ ಹೇಳಿಕೆಯನ್ನು ವಾಪಸ್‌ ಪಡೆದಿದ್ದಾರೆ.

ಈ ಕುರಿತು ಪತ್ರಿಕಾ ಪ್ರಕಟಣೆ ಮೂಲಕ ಸ್ಪಷ್ಟೀಕರಣ ನೀಡಿರುವ ಅವರು, ''ಯಾವುದೇ ಸಮಾಜದ ಹಾಗೂ ವೃತ್ತಿಗೆ ನೋವಾಗುವಂತೆ ಹೇಳಿಕೆ ನೀಡುವ ಉದ್ದೇಶ ನನ್ನದಾಗಿರಲಿಲ್ಲ. ಲೋಕಾರೂಢಿಯಂತೆ ಆ ಶಬ್ದವನ್ನು ಬಳಕೆ ಮಾಡಿದ್ದೇನೆ. ಅದರಿಂದ ಕೆಲ ಬಡಿಗೇರ ಸಮಾಜದ ಮಿತ್ರರು ಹಾಗೂ ಮುಖಂಡರು ತಮಗೆ ನೋವಾಗಿದೆ ಎಂದು ತಿಳಿಸಿದ್ದಾರೆ'' ಎಂದರು.

''ರಾಜ್ಯದ ಎಲ್ಲ ಧರ್ಮ, ಜಾತಿ ಹಾಗೂ ಜನಾಂಗಗಳ ಬಗ್ಗೆ ನಾನು ಸಮಾನ ಗೌರವ ಹೊಂದಿದ್ದೇನೆ. ರಾಷ್ಟ್ರಕವಿ ಕುವೆಂಪು ಹೇಳಿದಂತೆ ನಮ್ಮ ದೇಶ ಹಾಗೂ ರಾಜ್ಯ ಸರ್ವಜನಾಂಗದ ಶಾಂತಿಯ ತೋಟವಾಗಲಿ ಎಂಬ ಭಾವನೆಯೊಂದಿಗೆ 40 ವರ್ಷದಿಂದ ಸಾರ್ವಜನಿಕ ಜೀವನದಲ್ಲಿದ್ದೇನೆ. ನನ್ನ ಹೇಳಿಕೆ ಯಾವುದೇ ವ್ಯಕ್ತಿ ಹಾಗೂ ಜನಾಂಗ ಗುರಿಯಾಗಿಸಿಕೊಂಡಿಲ್ಲ. ನನ್ನ ಹೇಳಿಕೆಯಿಂದ ಸಮಾಜಕ್ಕೆ ಅಥವಾ ಯಾರಿಗಾರದರೂ ವೈಯಕ್ತಿಕವಾಗಿ ನೋವಾಗಿದ್ದರೆ ಸಾರ್ವಜನಿಕವಾಗಿ ನನ್ನ ಹೇಳಿಕೆ ಹಿಂಪಡೆಯುತ್ತೇನೆ'' ಎಂದು ಹೊರಟ್ಟಿ ತಿಳಿಸಿದ್ದಾರೆ.