ಮತದಾನ ಬಹಿಷ್ಕಾರಕ್ಕೆ ನಿವಾಸಿಗಳ ನಿರ್ಧಾರ

ಹುಬ್ಬಳ್ಳಿ : ಉಣಕಲ್‌ ಬಳಿಯ ದೇವಪ್ರಿಯ ನಗರಕ್ಕೆ ರಸ್ತೆ, ಕುಡಿಯುವ ನೀರು ಸೇರಿದಂತೆ ಮೂಲ ಸೌಕರ್ಯ ಕಲ್ಪಿಸದ ಜನಪ್ರತಿನಿಧಿಗಳ ನಡೆ ಖಂಡಿಸಿ ಅಲ್ಲಿನ ನಿವಾಸಿಗಳು ಲೋಕಸಭಾ ಚುನಾವಣೆಗೆ ಮತದಾನ ಬಹಿಷ್ಕರಿಸುವ ನಿರ್ಧಾರ ಕೈಗೊಂಡಿದ್ದಾರೆ.

ಈ ಕುರಿತು ಪತ್ರಿಕಾ ಪ್ರಕಟಣೆ ನೀಡಿರುವ ದೇವಪ್ರಿಯ ನಗರ ಹಿತಾಭಿವೃದ್ಧಿ ಸಂಘವು, ಸುಮಾರು 200ಕ್ಕೂ ಹೆಚ್ಚು ಕುಟುಂಬಗಳು ವಾಸಿಸುತ್ತಿರುವ ದೇವಪ್ರಿಯ ನಗರಕ್ಕೆ ಸ್ಥಳೀಯ ಜನಪ್ರತಿನಿಧಿಗಳು ಯಾವುದೇ ಸೌಲಭ್ಯ ಕಲ್ಪಿಸುತ್ತಿಲ್ಲ. ಕಳೆದ 35 ವರ್ಷಗಳಿಂದ ಅಲ್ಲಿನ ನಿವಾಸಿಗಳ ಬೇಡಿಕೆಯಾದ ನೀರು, ರಸ್ತೆ ಹಾಗೂ ದೀಪ ಅಳವಡಿಕೆ, ಡ್ರೈನೇಜ್‌ ವ್ಯವಸ್ಥೆ ಕಲ್ಪಿಸಿಲ್ಲ ಎಂದು ಆರೋಪಿಸಿದ್ದಾರೆ.

ಪ್ರತಿ ಮಳೆಗಾಲದಲ್ಲಿ ದೇವಪ್ರಿಯ ನಗರದ ರಸ್ತೆಗಳು ಕೇಸರು ಗದ್ದೆಯಂತಾಗಿ ಜನರು ಓಡಾಡಲೂ ಹರಸಾಹಸ ಪಡುವಂತಾಗುತ್ತದೆ. 35 ವರ್ಷಗಳಿಂದ ಅಭಿವೃದ್ಧಿ ಕಾಮಗಾರಿ ಮಾಡುವುದಾಗಿ ದೇವಪ್ರಿಯ ನಗರಕ್ಕೆ ಬರುವ ಸ್ಥಳೀಯ ಜನಪ್ರತಿನಿಧಿಗಳು ಯಾವುದೇ ಅಭಿವೃದ್ಧಿ ಮಾಡುತ್ತಿಲ್ಲ. ಕೇವಲ ತೋರಿಕೆಗೆ ಎಂಬಂತೆ ರಸ್ತೆ ನಿರ್ಮಾಣಕ್ಕೆ ಭೂಮಿ ಪೂಜೆ ಮಾಡಿ ಹೋದವರು ಮತ್ತೇ ಕಣ್ಣೆತ್ತಿಯೂ ನೋಡುತ್ತಿಲ್ಲ. ಈ ಎಲ್ಲ ಕಾರಣಕ್ಕೆ ದೇವಪ್ರಿಯ ನಗರ ನಿವಾಸಿಗಳು ಲೋಕಸಭಾ ಸೇರಿದಂತೆ ಮುಂಬರುವ ಎಲ್ಲ ಚುನಾವಣೆಗಳಿಗೂ ಮತ ಹಾಕದಿರಲು ಒಗ್ಗಟ್ಟಿನ ನಿರ್ಧಾರ ಕೈಗೊಂಡಿದ್ದಾರೆ ಎಂದು ಸಂಘದ ಅಧ್ಯಕ್ಷ ಎನ್‌.ಜಿ.ಮಾಳಗಿ ಹಾಗೂ ಕಾರ್ಯದರ್ಶಿ ಆರ್‌.ಎಫ್‌ ರೇವಡಿ ತಿಳಿಸಿದ್ದಾರೆ.