ಐಪಿ ಸೆಟ್‌ಗಳಿಗೆ ಆರ್‌ಆರ್‌ ಸಂಖ್ಯೆ: ಡಿ. 15 ಕೊನೆ ದಿನ

ಹುಬ್ಬಳ್ಳಿ : ವಿದ್ಯುತ್‌ ಜಾಲಕ್ಕೆ ಸಂಪರ್ಕ ಹೊಂದಿದ್ದರೂ ಆರ್‌ಆರ್‌ ಸಂಖ್ಯೆಯನ್ನು ಪಡೆಯದಿರುವ ನೀರಾವರಿ ಪಂಪ್‌ಸೆಟ್‌ಗಳ ಗ್ರಾಹಕರಿಗೆ ಆರ್‌ಆರ್‌ ಸಂಖ್ಯೆ ಪಡೆದುಕೊಳ್ಳಲು ಹೆಸ್ಕಾಂ ಅವಕಾಶ ಕಲ್ಪಿಸಿದೆ.

ಹಸ್ಕಾಂ ವ್ಯಾಪ್ತಿಯ ಧಾರವಾಡ, ಗದಗ, ಹಾವೇರಿ, ಕಾರವಾರ, ಬೆಳಗಾವಿ, ವಿಜಯಪುರ ಹಾಗೂ ಬಾಗಲಕೋಟ ಜಿಲ್ಲೆಗಳ ಗ್ರಾಹಕರು ಜಮೀನಿನ ಉತಾರ ನೀಡಿ 50 ರೂ. ನೋಂದಣಿ ಶುಲ್ಕ ಪಾವತಿಸಿ ಆರ್‌ಆರ್‌ ಸಂಖ್ಯೆ ಪಡೆದುಕೊಳ್ಳಬಹುದು. ಈ ಅವಕಾಶ ಡಿ.15 ರವರಿಗೆ ಜಾರಿ ಇರಲಿದೆ ಎಂದು ಹೆಸ್ಕಾಂ ಪ್ರಕಟಣೆ ತಿಳಿಸಿದೆ.

ಸೇವಾ ಮಾರ್ಗದ ಮೂಲಕ ಸಂಪರ್ಕ ಹೊಂದಿರುವ ಗ್ರಾಹಕರು ಮೂಲ ಸೌಕರ್ಯ ಪಡೆದುಕೊಳ್ಳಲು 10,000 ರೂ. ಭದ್ರತಾ ಠೇವಣಿ ಇಡಬೇಕು. ಒಂದು ಎಚ್‌ಪಿಗೆ 1250 ರೂ. ಸೇರಿದಂತೆ ಮಾಪಕ ಭದ್ರತಾ ಠೇವಣಿ (ಮಾಪಕ ಪೆಟ್ಟಿಗೆ )ಸೇರಿ 2,724 ರೂ. ಶುಲ್ಕ ಪಾವತಿಸಬೇಕಾಗುತ್ತದೆ.

ಅದಕ್ಕಾಗಿ 200 ರೂ. ಮೌಲ್ಯದ ಬಾಂಡ್‌ಪೇಪರ್‌ನಲ್ಲಿ ಒಪ್ಪಂದ ಪತ್ರ, ಟೆಸ್ಟ್‌ ರಿಪೋರ್ಟ್‌ ಮತ್ತು ವೈರಿಂಗ್‌ ಡೈಗ್ರಾಮ್‌ ದಾಖಲೆ ಸಲ್ಲಿಸಬೇಕು. ಮೂಲಸೌಕರ್ಯ ಕಲ್ಪಿಸಲು 10,000 ರೂ. ಪಾವತಿಸಿದ ನಿಗದಿತ ದಿನದ ಒಳಗೆ ಜ್ಯೇಷ್ಠತಾ ಆಧಾರದ ಮೇಲೆ ಕಾಮಗಾರಿ ಮಾಡಲಾಗುತ್ತದೆ.

ಈ ಶುಲ್ಕದ ಹೊರತಾಗಿ ಬೇರೆ ಯಾವುದೇ ಹಣವನ್ನು ಹೆಸ್ಕಾಂಗೆ ಪಾವತಿಸುವ ಅವಶ್ಯಕತೆ ಇಲ್ಲ. ಆದ್ದರಿಂದ, ಯಾರಾದರೂ ಹೆಚ್ಚಿನ ಶುಲ್ಕ ಭರಿಸಲು ತಿಳಿಸಿದಲ್ಲಿ ಹಾಗೂ ಯಾವುದೇ ದೂರುಗಳಿದ್ದಲ್ಲಿ ಸಂಬಂಧಪಟ್ಟ ಕಾರ್ಯನಿರ್ವಾಹಕ ಎಂಜಿನಿಯರ್‌(ವಿ), ಅಧೀಕ್ಷ ಕ ಎಂಜಿನಿಯರ್‌ (ವಿ) ಅವರನ್ನು ಸಂಪರ್ಕಿಸಬಹುದು ಎಂದು ಹೆಸ್ಕಾಂ ಪ್ರಕಟಣೆ ತಿಳಿಸಿದೆ.