ಮಲ್ಟಿಪ್ಲೆಕ್ಸ್‌ಗಳಲ್ಲಿ ಮಾತ್ರ ಶೋ?

ಹುಬ್ಬಳ್ಳಿ: ಕೋವಿಡ್‌-19 ಹಿನ್ನೆಲೆಯಲ್ಲಿ7 ತಿಂಗಳಿನಿಂದ ಬಂದ್‌ ಆಗಿರುವ ಸಿನಿಮಾ ಮಂದಿರಗಳ ಆರಂಭಕ್ಕೆ ಕೇಂದ್ರ ಸರಕಾರ ಗ್ರೀನ್‌ ಸಿಗ್ನಲ್‌ ನೀಡಿದೆ. ಕೊರೊನಾ ಮಾರ್ಗಸೂಚಿ ಅನುಸಾರ ಚಿತ್ರಮಂದಿರಗಳ ಆರಂಭಕ್ಕೆ ಮಾಲೀಕರು ಎಲ್ಲರೀತಿಯ ಸಿದ್ಧತೆ ಮಾಡಿಕೊಂಡಿದ್ದಾರೆ.

ರಾಜ್ಯದಲ್ಲೀಗ ಯಾವುದೇ ಹೊಸ ಚಿತ್ರಗಳು ಬಿಡುಗಡೆ ಆಗದ ಹಿನ್ನೆಲೆಯಲ್ಲಿಹಾಗೂ ಹಳೇ ಚಿತ್ರಗಳನ್ನು ಹಾಕಿದರೆ, ಜನರು ಚಿತ್ರಮಂದಿರಗಳತ್ತ ಬರುತ್ತಾರೋ ಇಲ್ಲವೋ ಎನ್ನುವ ಅನುಮಾನದಿಂದ ಬಹುತೇಕ ಮಾಲೀಕರು ಈ ವಾರ ಚಿತ್ರಮಂದಿರಗಳನ್ನು ಆರಂಭ ಮಾಡುತ್ತಿಲ್ಲ. ಆದರೆ, ಮಲ್ಟಿಪ್ಲೆಕ್ಸ್‌ ಚಿತ್ರ ಮಂದಿರಗಳನ್ನು ಮಾತ್ರ ಆರಂಭಿಸುವ ಸಾಧ್ಯತೆಯಿದೆ.

ನಗರದಲ್ಲಿನ ಸುಜಾತಾ, ಅಪ್ಸರಾ, ಸುಧಾ, ರೂಪಂ ಹಾಗೂ ಶೃಂಗಾರ್‌ ಚಿತ್ರಮಂದಿರಗಳು ಹಾಗೂ ಪಿವಿಆರ್‌, ಸಿನಿಪೊಲಿಸ್‌ ಮಲ್ಟಿಪ್ಲೆಕ್ಸ್‌ಗಳು ಚಿತ್ರ ಪ್ರದರ್ಶನ ಆರಂಭಿಸಲು ಅಗತ್ಯ ಸಿದ್ಧತೆ ಮಾಡಿಕೊಂಡಿವೆ. ಅಲ್ಲದೇ ಪ್ರೇಕ್ಷಕರನ್ನು ಥೇಟರಿನತ್ತ ಆಕರ್ಷಿಸಲು ಹಾಗೂ ಅವರಿಗೆ ಸೂಕ್ತ ರಕ್ಷಣೆ ಒದಗಿಸಲು ಎಲ್ಲರೀತಿಯ ಮುಂಜಾಗ್ರತೆ ಕ್ರಮಗಳನ್ನು ಕೈಗೊಂಡಿವೆ.

ಜನರು ಕೊರೊನಾ ಹಾವಳಿಯಿಂದ ಮನರಂಜನೆ ಇಲ್ಲದೇ ಮನೆಯಲ್ಲಿಯೇ ಕುಳಿತಿದ್ದಾರೆ. ಅವರಿಗೆ ಉತ್ತಮ ಮನರಂಜನೆ ಒದಗಿಸುವ ಚಿತ್ರಗಳನ್ನು ಹಾಕಬೇಕು. ಆಗ ಮಾತ್ರ ಜನರು ಚಿತ್ರಮಂದಿರಗಳತ್ತ ಬರಲು ಸಾಧ್ಯ. ಅದಕ್ಕಾಗಿ ಉತ್ತಮವಾದ ಹಳೆಯ ಇಲ್ಲವೇ ಹೊಸ ಚಿತ್ರಗಳ ಹುಡುಕಾಟದಲ್ಲಿದ್ದೇವೆ ಎನ್ನುತ್ತಾರೆ ಟಾಕೀಜ್‌ ಮಾಲೀಕರು.

ಈಗಾಗಲೇ ಚಿತ್ರಮಂದಿರಗಳನ್ನು ಸ್ಯಾನಿಟೈಸ್‌ ಮಾಡಲಾಗಿದೆ. ಸಿಬ್ಬಂದಿಗೂ ಅಗತ್ಯ ರಕ್ಷಣಾ ಪರಿಕರ ನೀಡಲಾಗಿದೆ. ಪ್ರೇಕ್ಷಕರಿಗೆ ಟಿಕೆಟ್‌ ಪಡೆಯಲು ಆನ್‌ಲೈನ್‌ ವ್ಯವಸ್ಥೆ ಮಾಡಲಾಗಿದೆ. ಆದರೆ, ಸೂಕ್ತ ಚಿತ್ರಗಳ ಬಿಡುಗಡೆ ಇಲ್ಲದ ಕಾರಣ ಈ ವಾರ ಚಿತ್ರಮಂದಿರ ಆರಂಭ ಮಾಡುತ್ತಿಲ್ಲ ಎಂದು ಅಪ್ಸರಾ ಟಾಕೀಜ್‌ ಮಾಲೀಕರಾದ ಕಿಶೋರ ರಾಯ್ಕರ್‌ ಹೇಳುತ್ತಾರೆ.