ಕೆಲ ರೈಲು ಸಂಚಾರ ರದ್ದು, ಮಾರ್ಗ ಬದಲಾವಣೆ

ಹುಬ್ಬಳ್ಳಿ: ದೂದ್‌ಸಾಗರ ಬಳಿ ಗುಡ್ಡ ಕುಸಿದು ಬೃಹತ್‌ ಕಲ್ಲುಗಳು ರೈಲ್ವೆ ಹಳಿ ಮೇಲೆ ಉರುಳಿ ಬಿದ್ದ ಕಾರಣ ಗೋವಾ ಮತ್ತು ಕರ್ನಾಟಕ ನಡುವಣ ರೈಲು ಸಂಪರ್ಕ ಕಡಿತಗೊಂಡಿದ್ದು, ಕೆಲ ರೈಲುಗಳ ಸಂಚಾರ ರದ್ದುಗೊಳಿಸಲಾಗಿದೆ. ಅಲ್ಲದೇ ಕೆಲ ರೈಲುಗಳ ಮಾರ್ಗ ಬದಲಾವಣೆ ಮಾಡಲಾಗಿದೆ.
ಹುಬ್ಬಳ್ಳಿ-ಹಜರತ್‌ ನಿಜಾಮುದ್ದೀನ್‌(17305), ಹುಬ್ಬಳ್ಳಿ-ವಾಸ್ಕೋ ಡಿ ಗಾಮಾ(06948) ಮತ್ತು ವಾಸ್ಕೋ ಡಿ ಗಾಮಾ-ಬೆಂಗಳೂರು(02779) ರೈಲುಗಳ ಸಂಚಾರ ರದ್ದುಪಡಿಸಲಾಗಿದೆ.

ವಾಸ್ಕೋ ಡಿ ಗಾಮಾ-ಹಜರತ್‌ ನಿಜಾಮುದ್ದಿನ ಎಕ್ಸಪ್ರೆಸ್‌ (12779) ರೈಲು ಮಡಗಾವ್‌, ಮಜೋರ್ಡಾ, ಕುಡಾಲ, ಸಾವಂತವಾಡಿ, ರತ್ನಾಗಿರಿ, ಚಿಪ್ಲು, ಖೇಡ, ರೊಹಾ, ಪನ್ವೇಲ್‌, ಕಲ್ಯಾಣ, ಇಜತಪುರಿ, ಮ್ಯಾನ್ಮಾಡ, ಕುಲೇಂ, ಕ್ಯಾಸಲ್‌ರಾಕ್‌, ಲೋಂಡಾ, ಮಿರಜ್‌, ಸಾತಾರ ಮಾರ್ಗವಾಗಿ ಸಂಚರಿಸಲಿದೆ.

ತೆರವು ಕಾರ್ಯಾಚರಣೆ:

ಹಳಿ ಮೇಲೆ ಬಿದ್ದಿರುವ ಬೃಹತ್‌ ಗಾತ್ರದ ಕಲ್ಲುಗಳನ್ನು ತೆರವುಗೊಳಿಸುವ ಕಾರ್ಯಾಚರಣೆ ಯುದ್ಧೋಪಾದಿಯಲ್ಲಿ ನಡೆದಿದೆ. ಮಂಗಳವಾರ ರಾತ್ರಿ ವೇಳೆಗೆ ಈ ಮಾರ್ಗ ಸಂಚಾರಕ್ಕೆ ಮುಕ್ತವಾಗುವ ವಿಶ್ವಾಸವಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ. ವಿಭಾಗೀಯ ವ್ಯವಸ್ಥಾಪಕ ರಾಜೇಶ ಮೋಹನ ಸೇರಿದಂತೆ ಹಿರಿಯ ಅಧಿಕಾರಿಗಳು ಮೊಕ್ಕಾಂ ಹೂಡಿದ್ದಾರೆ.