ಹುಬ್ಬಳ್ಳಿ: ಸೌತ್ ವೆಸ್ಟರ್ನ್ ರೇಲ್ವೆ ಮಜೂರ ಯೂನಿಯನ್ (SWRMU), ಹುಬ್ಬಳ್ಳಿಯಲ್ಲಿಂದು 75ನೇ ಸ್ವಾತಂತ್ರೋತ್ಸವದ ಅಮೃತ ಮಹೋತ್ಸವವನ್ನು ಅರ್ಥಪೂರ್ಣವಾಗಿ ಆಚರಿಸಿತು. ಇದೇ ಸಂಧರ್ಭದಲ್ಲಿ, ಭಾರತೀಯ ಸೈನ್ಯದ ಭೂಸೇನೆ, ವಾಯುಪಡೆ, ನೌಕಾಪಡೆ ಹಾಗೂ ವಿವಿಧ ಅರೆಸೇನಾಪಡೆಗಳಲ್ಲಿ ಸೇವೆ ಸಲ್ಲಿಸಿ ನಿವೃತ್ತಿ ಹೊಂದಿ, ಪ್ರಸ್ತುತ ರೇಲ್ವೆಯಲ್ಲಿ ಸೇವೆ ಸಲ್ಲಿಸುತ್ತಿರುವ ಮಾಜಿ ಸೈನಿಕರನ್ನು ಗೌರವಿಸಿ ಸನ್ಮಾನಿಸಲಾಯಿತು.
ನೈರುತ್ಯ ರೇಲ್ವೆ ವಲಯದ ಹುಬ್ಬಳ್ಳಿ ವಿಭಾಗ, ಹುಬ್ಬಳ್ಳಿ ಕಾರ್ಯಾಗಾರ, ರೇಲ್ವೆ ಭಂಡಾರ, ವಲಯ ಕಚೇರಿ ಹಾಗೂ ಟ್ರಾಕ್ ಮಷೀನ್ ಶಾಖೆಯಲ್ಲಿ 300ಕ್ಕೂ ಹೆಚ್ಚು ಮಾಜಿ ಸೈನಿಕರನ್ನು ಕಾರ್ಯಕ್ರಮಕ್ಕೆ ಆಹ್ವಾನಿಸಿ, ದೇಶಕ್ಕೆ ಅವರು ಸಲ್ಲಿಸಿದ ಪವಿತ್ರ ಹಾಗೂ ಸಾರ್ಥಕ ಸೇವೆಯನ್ನು ಗೌರವಿಸಿ ಅವರನ್ನು ಸನ್ಮಾನಿಸಲಾಯಿತು.
ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ಈ ಸಂಧರ್ಭದಲ್ಲಿ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ, ಬಲಿದಾನಗೈದ ಮಹನಿಯರನ್ನು ಸ್ಮರಿಸಿ ಗೌರವಿಸಲು SWRMನ ಕೇಂದ್ರ ಕಚೇರಿಯಿಂದ ನೈರುತ್ಯ ರೇಲ್ವೆಯ ವಲಯ ಕಛೇರಿಯ ವರೆಗೂ ಗದಗ ರಸ್ತೆ ಉದ್ದಕ್ಕೂ ಸ್ವಾತಂತ್ರ್ಯ ಹೋರಾಟಗಾರರ ಭಾವಚಿತ್ರದ ಬ್ಯಾನರ್‌ಗಳನ್ನು ರಸ್ತೆ ಮಧ್ಯದ ವಿದ್ಯುತ್ ಕಂಬಗಳಿಗೆ ಕಟ್ಟಿ ದೇಶಪ್ರೇಮವನ್ನು ಮೆರೆದಿದೆ.
SWRMUನ ಪ್ರಧಾನ ಕಾರ್ಯದರ್ಶಿ, ಕಾ.ಡಾ.ಎ.ಎಮ್.ಡಿ'ಕ್ರೂಜ್, ಅಧ್ಯಕ್ಷರಾದ ಕಾ.ಅಶೋಕ ಕುಮಾರ, ಖಜಾಂಚಿ ಕಾ.ವಿ.ಈ.ಚಾರಖಾನಿ, ಸಹಾಯಕ ಪ್ರಧಾನ ಕಾರ್ಯದರ್ಶಿಗಳಾದ ಕಾ.ವೆಂಕಟೇಶ, ಕಾ.ಜಯಲಕ್ಷ್ಮಿ, ಕಾ.ಆ್ಯಂಥೋನಿ ಜೆನ್ನಿ ಡಿ'ಕ್ರೂಜ್, ಕಾ.ಮುರಗನ್, ಹುಬ್ಬಳ್ಳಿ ವಿಭಾಗೀಯ ಅಧ್ಯಕ್ಷರಾದ ಕಾ.ಜಾಕೀರ ಸನದಿ, ವಿಭಾಗೀಯ ಕಾರ್ಯದರ್ಶಿ ಕಾ.ಕುಮಾರವೇಲನ, ವರ್ಕ್ ಶಾಪ್ ವಿಭಾಗೀಯ ಕಾರ್ಯದರ್ಶಿ ಕಾ.ಪ್ರವೀಣ ಪಾಟೀಲ್‌, ವರ್ಕ್ ಶಾಪ್ ಕಾರ್ಯದರ್ಶಿ ಕಾ.ಜಾಕೋಬ್ ಸೇರಿದಂತೆ ಇತರ ವಿಭಾಗೀಯ, ಶಾಖೆಯ ಪದಾಧಿಕಾರಿಗಳು, ಬಿಈಸಿ ಸದಸ್ಯರು, ಮತ್ತು 600ಕ್ಕೂ ಹೆಚ್ಚು ರೇಲ್ವೆ ಕಾರ್ಮಿಕರು ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ಈ ಸಮಾರಂಭದಲ್ಲಿ ಭಾಗವಹಿಸಿ ದೇಶಪ್ರೇಮ ಮೆರೆದರು.