ಬಿಆರ್‌ಟಿಎಸ್‌ ಹಿನ್ನೆಡೆಗೆ ಕಾಂಗ್ರೆಸ್‌ ಸರಕಾರ ಕಾರಣ

ಹುಬ್ಬಳ್ಳಿ : ಹಿಂದಿನ ಕಾಂಗ್ರೆಸ್‌ ಸರಕಾರದ ಅಸಹಕಾರದಿಂದ ಬಿಆರ್‌ಟಿಎಸ್‌ ಕಾಮಗಾರಿಗೆ ಹಿನ್ನಡೆಯಾಗಿದೆಯಲ್ಲದೇ, ಅವಳಿನಗರದಲ್ಲಿ ನೀರಿನ ಸಮಸ್ಯೆ ಉಂಟಾಯಿತು ಎಂದು ಮಾಜಿ ಸಿಎಂ ಜಗದೀಶ ಶೆಟ್ಟರ್‌ ಆರೋಪಿಸಿದರು.

ಇಲ್ಲಿನ ವಾರ್ಡ್‌ ನಂ 34ರ ನಮ್ಮ ಸ್ವಚ್ಛ ಸುಂದರ ವಾರ್ಡ್‌ ಅಭಿವೃದ್ಧಿ ಪಥ ಉದ್ಘಾಟನಾ ಸಮಾರಂಭದಲ್ಲಿ ಗಾರ್ಡನ್‌ ಉದ್ಘಾಟಿಸಿ ಮಾತನಾಡಿದ ಅವರು, ಪಾಲಿಕೆಗೆ ಬರಬೇಕಿದ್ದ 138 ಕೋಟಿ ರೂ. ಪಿಂಚಣಿ ಹಣ ಒಂದು ವಾರದಲ್ಲಿ ಬಿಡುಗಡೆ ಮಾಡುತ್ತೇನೆ ಎಂದು ಹೇಳಿದ್ದ ಸಿದ್ಧರಾಮಯ್ಯ ಮಾತು ಮರೆತರು. ಜಿಲ್ಲಾ ಉಸ್ತುವಾರಿ ಸಚಿವ ಆರ್‌.ವಿ. ದೇಶಪಾಂಡೆ ಹಣ ಬಿಡುಗಡೆ ಮಾಡಿಸುವುದಾಗಿ ಹೇಳಿದ್ದಾರೆ. ಒಂದು ವೇಳೆ ಹಣ ಬಿಡುಗಡೆ ಮಾಡದಿದ್ದರೇ ಡಿ.21ರಂದು ಮತ್ತೆ ಹೋರಾಟ ಆರಂಭಿಸುತ್ತೇವೆ ಎಂದು ಎಚ್ಚರಿಸಿದರು.

ಕುಂಭಕೊಣಂ ಪ್ಲಾಟ್‌ನಲ್ಲಿ ನಿರ್ಮಿಸಿದ ಗಾರ್ಡ್‌ನ್‌ ಅವಳಿನಗರಕ್ಕೆ ಮಾದರಿ ಗಾರ್ಡನ್‌ ಆಗಿದೆ.ಗಾರ್ಡನ್‌ ಅಭಿವೃದ್ಧಿಗೆ ಎಲ್ಲ ಸಹಕಾರ ನೀಡುತ್ತೇನೆ ಎಂದು ಜಗದೀಶ ಶೆಟ್ಟರ್‌ ಭರವಸೆ ನೀಡಿದರು.

ಕಮ್ಯುನಿಸ್ಟ್‌ ಪಕ್ಷದಿಂದ ಅನ್ಯಾಯ : ಕೇಳರ ರಾಜ್ಯದಲ್ಲಿ ಸ್ವಾಮಿ ಅಯ್ಯಪ್ಪ ಭಕ್ತರಿಗೆ ಕಮ್ಯುನಿಸ್ಟ್‌ ಪಕ್ಷದಿಂದ ಅನ್ಯಾಯವಾಗುತ್ತಿದೆ. ಭಕ್ತರ ಭಾವನೆ ಧಕ್ಕೆ ಬರುವ ನಿರ್ಧಾರ ತೆಗೆದುಕೊಳ್ಳುವ ಮೂಲಕ ಭಕ್ತರಿಗೆ ಅನ್ಯಾಯ ಮಾಡುತ್ತಿದೆ ಎಂದು ಸಂಸದ ಪ್ರಹ್ಲಾದ್‌ ಜೋಶಿ ತಿಳಿಸಿದರು.

ಮಾಜಿ ಪಾಲಿಕೆ ಸದಸ್ಯ ಲಕ್ಷ್ಮಣ ಉಪ್ಪಾರ, ಗೌತಮ್‌ ಬೇತಾಳ ಮಾತನಾಡಿದರು. ವಿಧಾನಪರಿಷತ್‌ ಸದಸ್ಯ ಪ್ರದೀಪ ಶೆಟ್ಟರ್‌, ಶಾಸಕ ಅರವಿಂದ ಬೆಲ್ಲದ, ಪಾಲಿಕೆ ಸದಸ್ಯೆ ಲಕ್ಷ್ಮಿ ಉಪ್ಪಾರ, ಜಿಲ್ಲಾ ಬಿಜೆಪಿ ಅಧ್ಯಕ್ಷ ನಾಗೇಶ ಕಲಬುರ್ಗಿ, ಬಿಜೆಪಿ ಸೆಂಟ್ರಲ್‌ ಅಧ್ಯಕ್ಷ ತಿಪ್ಪಣ್ಣ ಮಜ್ಜಗಿ, ಎಸ್‌.ಜಿ. ಕೆಮತೂರ, ಡಿ.ಬಿ. ಕಂದಕೂರ, ಪಿ.ಜಿ. ಪವಾರ, ಬಾಲಕೃಷ್ಣ ಪೈ ಸೇರಿದಂತೆ ಅನೇಕರು ಇದ್ದರು.