ಮಹಾನಗರಕ್ಕೆ ತಂಪೆರೆದ ಮಳೆ

ಹುಬ್ಬಳ್ಳಿ : ಹುಬ್ಬಳ್ಳಿ-ಧಾರವಾಡ ಅವಳಿನಗರದಲ್ಲಿ ಬುಧವಾರ ಬೆಳಗ್ಗೆಯಿಂದಲೂ ತುಂತುರು ಮಳೆ ಆರಂಭವಾಗಿದೆ. ದಿನವಿಡಿ ಮೋಡ ಕವಿದ ವಾತಾವರಣವಿದ್ದು, ಜಿಟಿಜಿಟಿ ಮಳೆ ಮುಂಗಾರು ಅನುಭವ ನೀಡಿತು.

ಬಿಸಿಲಿನ ತಾಪಕ್ಕೆ ಬೇಸತ್ತಿದ್ದ ಜನತೆಗೆ ಮಳೆ ತಂಪೆರೆಯಿತು. ಬೆಳಗ್ಗೆ ಆರಂಭವಾದ ಮಳೆ ಮಧ್ಯಾಹ್ನ ಸ್ವಲ್ಪ ಕಡಿಯಾದಂತೆ ಕಂಡು ಬಂದರೂ ಸಂಜೆಯಾಗುತ್ತಲೇ ಮತ್ತೆ ಕಪ್ಪು ಮೋಡಗಳಿಂದ ಸುರಿದ ಮಳೆ ಮುಂಗಾರು ಆರಂಭದ ಮುನ್ಸೂಚನೆ ನೀಡಿತು. ಆದರೆ, ತಾಲೂಕು ಪ್ರದೇಶಗಳಲ್ಲಿ ಆದ ಜಿಟಿಜಿಟಿ ಮಳೆ ನೋಡಿದರೆ ರೈತರ ಮನದಲ್ಲಿದ್ದ ದೊಡ್ಡ ಮಳೆ ನಿರೀಕ್ಷೆಯನ್ನು ಹುಸಿಗೊಳಿಸಿತು. ಮೇ ಕೊನೆ ವಾರದಲ್ಲಾಗಬೇಕಾದ ಮಳೆ ತಡವಾಗಿ ಆದರೂ ಜೂನ್‌ ಎರಡನೇ ವಾರದಲ್ಲಿ ಬಂತು. ಆದರೆ, ಬಿತ್ತನೆಗೆ ಇನ್ನು ಹೆಚ್ಚಿನ ಮಳೆ ಅವಶ್ಯಕತೆ ಇದೆ. ಮಳೆ ಬಿತ್ತನೆಗೆ ಕಾರ್ಯ ಸಿದ್ಧತೆಯನ್ನು ಚುರುಕುಗೊಳಿಸುವಂತೆ ಮಾಡಿತು. ಮಳೆಯಿಂದ ತಪ್ಪಿಸಿಕೊಳ್ಳಲು ಕೆಲವರು ಛತ್ರಿಯ ಮೊರೆ ಹೊದರೆ, ಇನ್ನು ಕೆಲವರು ರಸ್ತೆ ಪಕ್ಕದಲ್ಲಿರುವ ಮರಗಳ ಕೆಳಗೆ ನಿಂತರು.