ಇಂದಿನಿಂದ ಪಾರ್ಕಿಂಗ್‌ಗೆ ಶುಲ್ಕ ಇಲ್ಲ

ಹುಬ್ಬಳ್ಳಿ : ಅವಳಿ ನಗರದಲ್ಲಿ ವಾಹನ ನಿಲ್ಲಿಸಲು ಸವಾರರು ಜು.28ರಿಂದ ಯಾವುದೇ ಶುಲ್ಕ ಕೊಡಬೇಕಿಲ್ಲ. ಏಕೆಂದರೆ, ಮಹಾನಗರ ಪಾಲಿಕೆ ಪಾರ್ಕಿಂಗ್‌ಗೆ ನಿಗದಿಪಡಿಸಿದ್ದ ಟೆಂಡರ್‌ ಅವಧಿ ಜು.27ರಂದು ಪೂರ್ಣಗೊಂಡಿದೆ. ಹಾಗಾಗಿ ಸವಾರರು ಪಾರ್ಕಿಂಗ್‌ ಫೀ ಕೊಡಬೇಡಿ ಎಂದು ಪಾಲಿಕೆ ಆಯುಕ್ತ ಸುರೇಶ ಇಟ್ನಾಳ್‌ ಮನವಿ ಮಾಡಿದ್ದಾರೆ.

ಹುಬ್ಬಳ್ಳಿಯ ಕೊಪ್ಪಿಕರ ರಸ್ತೆ, ದುರ್ಗದ ಬೈಲ್‌ ಹಾಗೂ ಧಾರವಾಡದ ಸುಭಾಸ್‌ ರಸ್ತೆಯಲ್ಲಿ ಪಾರ್ಕಿಂಗ್‌ ಶುಲ್ಕ ಆಕರಿಸಲು ಪಾಲಿಕೆಯು ಗುತ್ತಿಗೆ ನೀಡಿತ್ತು. ಈ ಅವಧಿ ಮುಗಿದಿರುವುದರಿಂದ ಶುಲ್ಕ ಆಕರಣೆ ರದ್ದುಪಡಿಸಲಾಗಿದೆ ಎಂದು ಪಾಲಿಕೆ ಸ್ಪಷ್ಟಪಡಿಸಿದೆ.

ಪಾಲಿಕೆಯು ಪಾರ್ಕಿಂಗ್‌ ಫೀ ರದ್ದುಪಡಿಸಿರುವ ಕುರಿತಾಗಿ ಭಿತ್ತಿಪತ್ರಗಳನ್ನು ನಿಗದಿಪಡಿಸಿದ ಪ್ರದೇಶದಲ್ಲಿ ಅಂಟಿಸಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಈ ಬಗ್ಗೆ ಪಾಲಿಕೆ ಅಧಿಕಾರಿಗಳನ್ನು ಸಂಪರ್ಕಿಸಿದಾಗ ನಿಜ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಅವಧಿ ಮುಗಿದ ಪಾರ್ಕಿಂಗ್‌ ಶುಲ್ಕ ಆಕರಣೆ ಪ್ಯಾಕೆಜ್‌ಗಳನ್ನು ಪುನಃ ಟೆಂಡರ್‌ ಕರೆಯಲು ಆಡಳಿತಾಧಿಕಾರಿಯೂ ಆದ ಬೆಳಗಾವಿ ಪ್ರಾದೇಶಿಕ ಆಯುಕ್ತರಿಗೆ ಪ್ರಸ್ತಾವನೆ ಸಲ್ಲಿಸಲಾಗಿದ್ದು, ಒಪ್ಪಿಗೆ ನೀಡಿದ ಬಳಿಕ ಟೆಂಡರ್‌ ಕರೆದು ಗುತ್ತಿಗೆ ನೀಡಲಾಗುವುದು ಎಂದು ಆಯುಕ್ತ ಇಟ್ನಾಳ್‌ ತಿಳಿಸಿದ್ದಾರೆ.