ಅಪಘಾತ ತಡೆಗೆ ತ್ರಿವಳಿ ಬೈಪಾಸ್‌!

ಧಾರವಾಡ :ಹು-ಧಾ ಮಹಾನಗರದಲ್ಲಿ ವಾಹನ ದಟ್ಟಣೆ ಹಾಗೂ ರಸ್ತೆ ಅಪಘಾತ ನಿಯಂತ್ರಿಸುವ ನಿಟ್ಟಿನಲ್ಲಿ ಹು-ಧಾ ಹೊರವಲಯದಲ್ಲಿ ಮತ್ತೆ ಮೂರು ಬೈಪಾಸ್‌ ರಸ್ತೆ ನಿರ್ಮಿಸಲು ಉದ್ದೇಶಿಸಲಾಗಿದೆ. ಈ ಕುರಿತು ಎನ್‌ಎಚ್‌ಎಐ (ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ) ವಿಸ್ತೃತ ಯೋಜನಾ ವರದಿ ಸಿದ್ಧಪಡಿಸಲು ಅಣೆಯಾಗಿದೆ.

ಬೆಳಗಾವಿ, ಗದಗ, ಹಾವೇರಿ, ಉತ್ತರ ಕನ್ನಡ ಜಿಲ್ಲೆಗಳಿಂದ ಪ್ರತಿ ದಿನ ಹು-ಧಾ ನಗರ ಮಾರ್ಗವಾಗಿ ಸಾವಿರಾರು ವಾಹನಗಳು ಸಂಚರಿಸುತ್ತಿವೆ. ಹೊರರಾಜ್ಯ, ಜಿಲ್ಲೆಗಳಿಗೆ ತೆರಳುವ ಭಾರಿ ವಾಹನಗಳಿಗೆ ಹು-ಧಾ ಬೈಪಾಸ್‌ ರಸ್ತೆ ನಿರ್ಮಾಣಗೊಂಡರೂ ಅದು ವೈಜ್ಞಾನಿಕವಾಗಿಲ್ಲ. ಪುಣೆ ಬೆಂಗಳೂರು ಚಥುಷ್ಪಥ ಹೆದ್ದಾರಿಯಲ್ಲಿ ಬರುವ ವಾಹನಗಳು ಬೈಪಾಸ್‌ ಡಬಲ್‌ ರಸ್ತೆ ಹೋಗುವುದು ಅನಿವಾರ್ಯವಾಗಿ ಅಪಘಾತಕ್ಕೂ ಕಾರಣ ಆಗುತ್ತಿವೆ. ಹೀಗಾಗಿ ಈ ಸಮಸ್ಯೆಗೆ ಪರಿಹಾರವಾಗಿ ಮೂರು ಬೈಪಾಸ್‌ ರಸ್ತೆಗಳ ನಿರ್ಮಾಣಕ್ಕೆ ಪ್ರಸ್ತಾವನೆ ರೂಪುಗೊಳ್ಳುತ್ತಿದೆ.

ತಡಸ ಕ್ರಾಸ್‌ನಿಂದ ಕಲಘಟಗಿ- ಧಾರವಾಡ- ಹೆಬಸೂರ- ಅಣ್ಣಿಗೇರಿಗೆ ಸಂಪರ್ಕ ಕಲ್ಪಿಸುವ ಬೈಪಾಸ್‌ ರಸ್ತೆ ನಿರ್ಮಾಣದ ಸಾಧ್ಯತಾ ವರದಿಯ ಪಡೆಯಲು ಎನ್‌ಎಚ್‌ಎಐ ಮುಂದಾಗಿದೆ. ಈ ಕುರಿತು ಡಿಪಿಆರ್‌ ಸಿದ್ಧಪಡಿಸಲು ಹೈದರಾಬಾದ್‌ನ ಎಚ್‌ಬಿಎಸ್‌ ಕಂಪೆನಿಗಳಿಗೆ ನೀಡಲಾಗಿದೆ. ಹಾಗೆಯೇ ದಾಂಡೇಲಿ- ಹಳಿಯಾಳ- ಧಾರವಾಡ- ರಾಮದುರ್ಗ- ವಿಜಯಪುರ ಬೈಪಾಸ್‌ ಡಿಪಿಆರ್‌ ಸಿದ್ಧಪಡಿಸಲು ಸಾತ್ರಾ ಕಂಪನಿಗೆ ನೀಡಲಾಗಿದೆ. ಇವೆರಡೂ ಕಂಪನಿಗಳು ಡಿಪಿಆರ್‌ ಸಿದ್ಧಪಡಿಸುವ ಪ್ರಕ್ರಿಯೆ ಅಂತಿಮ ಹಂತದಲ್ಲಿದೆ.

ತೇಗೂರ- ತಡಸ ಹೊಸ ಪ್ರಸ್ತಾವ

ಅಷ್ಟೇ ಅಲ್ಲದೇ, ಈಗಾಗಲೇ ನರೇಂದ್ರ ಬೈಪಾಸ್‌ನಿಂದ ಗಬ್ಬೂರ ಕ್ರಾಸ್‌ವರೆಗೆ ಇರುವಂತೆಯೇ ತಡಸ್‌ಕ್ರಾಸ್‌ನಿಂದ- ಕಲಘಟಗಿ- ತೇಗೂರ ಮಾರ್ಗದಲ್ಲಿ 70 ಕಿ.ಮೀ ಉದ್ದದ ರಸ್ತೆ ನಿರ್ಮಿಸಲು ಯೋಜಿಸಲಾಗಿದೆ. ಇದು ಈಗ ಪ್ರಸ್ತಾಪಗೊಂಡ ಹೊಸ ಯೋಜನೆ. ಇದರಿಂದ ಹು-ಧಾ ಬೈಪಾಸ್‌ ರಸ್ತೆಯ ವಾಹನ ದಟ್ಟನೆ ಕಡಿಮೆ ಮಾಡಬಹುದಾಗಿದೆ. ಹೀಗಾಗಿ ಈ ಬೈಪಾಸ್‌ ನಿರ್ಮಾಣಕ್ಕೆ ಡಿಪಿಆರ್‌ ಸಿದ್ಧಪಡಿಸಲು ಏಜೆನ್ಸಿ ನೇಮಿಸಲು ಸರಕಾರ ಅನುಮೋದನೆ ಪಡೆಯಲಾಗುತ್ತಿದೆ ಎಂದು ಎನ್‌ಎಚ್‌ಎಐ ಅಧಿಕಾರಿಗಳು ವಿಕ ಕ್ಕೆ ತಿಳಿಸಿದ್ದಾರೆ.

ಬೈಪಾಸ್‌ ಯೋಜನೆಗಳ ಅನುಷ್ಠಾನದಿಂದ ಹು-ಧಾ ನಗರದಲ್ಲಿನ ವಾಹನ ದಟ್ಟಣೆ ಪ್ರಮಾಣ ಕಡಿಮೆ ಆಗಲಿದೆ. ಗದಗ, ವಿಜಯಪುರ, ಕಾರವಾರ ಜಿಲ್ಲೆಗಳಿಂದ ಬೆಳಗಾವಿ ಹಾಗೂ ಕಾರವಾರ ಸಂಪರ್ಕಿಸುವ ವಾಹನಗಳು ಹು-ಧಾ ನಗರ ಪ್ರವೇಶಿಸದೇ ನೇರವಾಗಿ ತೆರಳಲಿವೆ. ಇದರಿಂದ ಪ್ರಯಾಣದ ದೂರು ಕಡಿಮೆ ಆಗುವ ಜತೆಗೆ ಇಂದನ ಉಳಿತಾಯವೂ ಆಗಲಿದೆ. ಹೀಗಾಗಿ ಈ ಯೋಜನೆಗಳ ಅನುಷ್ಠಾನಕ್ಕೆ ಕೇಂದ್ರ ಹಾಗೂ ರಾಜ್ಯ ಸರಕಾರಗಳು ಹೇಗೆ ಸ್ಪಂದಿಸಲಿವೆ ಎಂಬುದು ಕುತೂಹಲ ಮೂಡಿಸಿದೆ.

ದಾಂಡೇಲಿ- ವಿಜಯಪೂರ ಬೈಪಾಸ್‌ಗೆ ಪೂರಕವಾಗಿ ಮಾಜಿ ಸಚಿವ ವಿನಯ ಕುಲಕರ್ಣಿ ಅವರು ಮುಮ್ಮಿಗಟ್ಟಿಯಿಂದ ಸವದತ್ತಿ ರಸ್ತೆವರೆಗಿನ 6 ಕಿ.ಮೀ. ಉದ್ದದ ರಸ್ತೆಯಲ್ಲಿ 3.75ಮೀ ಅಗಲದ ರಸ್ತೆ ಕಾಮಗಾರಿ ಪೂರ್ಣಗೊಂಡಿತ್ತು. ಆದರೆ, ಸವದತ್ತಿ ರಸ್ತೆ ಮೂಲಕ ನವಲಗುಂದ ಸೇರುವ ರಸ್ತೆಗೆ ಇನ್ನೂ ಭೂಸ್ವಾಧೀನ ಆಗದೇ ನನೆಗುದಿಗೆ ಬಿದ್ದಿದೆ. ಈಗ ಆ ಯೋಜನೆಯನ್ನೂ ಪೂರ್ಣಗೊಳಿಸಲು ಅಗತ್ಯವಾದ ಹಣ ಹಾಗೂ ಸಾಧ್ಯತಾ ವರದಿಯನ್ನು ಎನ್‌ಎಚ್‌ಎಐ ಅಧಿಕಾರಿಗಳು ಪಡೆಯುತ್ತಿದ್ದಾರೆ. ಹೀಗೆ ಉಳಿದ ಯೋಜನೆಗಳ ಸ್ಥಿತಿ ಆಗಬಾರದು ಎಂಬುದು ಪ್ರಯಾಣಿಕರ ಆಗ್ರಹ.

ಪರ್ಯಾಯ ಆಗ್ದಿದ್ರೆ ಅಪಾಯ ಗ್ಯಾರಂಟಿ

ಪುಣಾ- ಬೆಂಗಳೂರು ಸಂಪರ್ಕಿಸುವ ರಾಷ್ಟ್ರೀಯ ಹೆದ್ದಾರಿ ನಂ, 4 ಹು-ಧಾ ನಗರ ಮೂಲಕ ಹೋಗಿದೆ. ಸದ್ಯ ಬೈಪಾಸ್‌ ಆಗಿದ್ದರಿಂದ ಭಾರಿ ವಾಹನಗಳು ನಗರ ಪ್ರವೇಶಿಸುತ್ತಿಲ್ಲ ಅಷೆÜ್ಟ. ಪೊಲೀಸ್‌ ವರದಿ ಪ್ರಕಾರ ಧಾರವಾಡ ಜಿಲ್ಲಾ ವ್ಯಾಪ್ತಿಯ ಎನ್‌ಎಚ್‌- 4 ಒಂದು ರೀತಿ ಮೃತ್ಯು ಕೂಪದಂತಾಗಿದೆ. ಕಳೆದ 10 ವರ್ಷದ ಅಂಕಿ ಸಂಖ್ಯೆ ಗಮನಿಸಿದರೆ ಈ ರಸ್ತೆಯಲ್ಲಿ ಬರೋಬ್ಬರಿ 393 ಮಾರಣಾಂತಿಕ ಅಪಘಾತ 983 ಮಾರಣಾಂತಿಕ ಅಲ್ಲದ ಅಪಘಾತಗಳು ಸಂಭವಿಸಿವೆ. ಇದರಲ್ಲಿ 453 ಜನ ಮೃತಪಟ್ಟಿದ್ದರೆ 2326 ಜನ ಗಾಯಗೊಂಡಿದ್ದಾರೆ. ಹು-ಧಾ ಬೈಪಾಸ್‌ ರಸ್ತೆ ಅಪಘಾತಗಳು ಇದರಲ್ಲಿವೆ. ಹೀಗಾಗಿ ಇದರ ಪ್ರಮಾಣ ತಡೆಗೆ ಪ್ರಸ್ತಾವಿತ ಮೂರು ಬೈಪಾಸ್‌ ರಸ್ತೆಗಳು ಆಗಲೇಬೇಕಾಗಿದೆ. ಇಲ್ಲದಿದ್ದರೆ ಅಪಾಯ ಪ್ರಮಾಣ ಹೆಚ್ಚುವುದು ಗ್ಯಾರಂಟಿ.

ಕಿರಿಕಿರಿ

ಹು-ಧಾ ಮಧ್ಯೆ ನಿರ್ಮಾಣಗೊಂಡ ಬೈಪಾಸ್‌ ರಸ್ತೆ ಖಾಸಗಿ ಸಹಭಾಗಿತ್ವದಲ್ಲಿ ಆಗಿದೆ. ನಂದಿ ಇನ್ಫ್ರಾಸ್ಟಕ್ಷರ್‌ ಕಂಪನಿಯು ಈ ರಸ್ತೆ ನಿರ್ಮಿಸಿದೆ. ಆಗಿನ ಒಪ್ಪಂದದ ಪ್ರಕಾರ 2024ರವರೆಗೆ ಇಲ್ಲಿ ಟೋಲ್‌ ಸಂಗ್ರಹಿಸಲಾಗುತ್ತಿದೆ. ಅಲ್ಲದೇ, ಆ ಒಪ್ಪಂದದ ಪ್ರಕಾರ ಅಲ್ಲಿಯವರೆಗೂ 20 ಕಿ.ಮೀ. ವ್ಯಾಪ್ತಿಯಲ್ಲಿ ಪರ್ಯಾಯ ರಸ್ತೆ ನಿರ್ಮಿಸಬಾರದು. ಹೀಗಾಗಿ ಈಗ ಹೊಸ ಪ್ರಸ್ತಾವಕ್ಕೆ ನಂದಿ ಕಂಪನಿಯು ತಗಾದೆ ತೆಗೆಯುವ ಸಾಧ್ಯತೆಗಳಿವೆ. ಈ ಸಮಸ್ಯೆಯನ್ನು ಬಗೆಹರಿಸಿಕೊಡುವ ಕೆಲಸ ಜನಪ್ರತಿನಿಧಿಗಳಿಂದ ಆಗಬೇಕಿದೆ ಎಂಬುದು ಅಧಿಕಾರಿಗಳ ಅಭಿಪ್ರಾಯ.