ನವೆಂಬರ್‌ ಅಂತ್ಯದೊಳಗೆ ಯುಜಿಡಿ ಕಾಮಗಾರಿ ಪೂರ್ಣ :ಶೆಟ್ಟರ್‌

ಹುಬ್ಬಳ್ಳಿ : ಕೇಂದ್ರ ಸರಕಾರದ ಅಮೃತ ಯೋಜನೆಯಡಿ ಹು-ಧಾ ನಗರದಲ್ಲಿ 156 ಕೋಟಿ ವೆಚ್ಚದಲ್ಲಿ ಕೈಗೊಂಡ ಯುಜಿಡಿ ಕೊಳವೆ ಮಾರ್ಗದ ನಿರ್ಮಾಣ ಕಾಮಗಾರಿ ಬಹುತೇಕ ಮುಕ್ತಾಯದ ಹಂತಕ್ಕೆ ತಲುಪಿದೆ. ಬರುವ ನವೆಂಬರ್‌ ಅಂತ್ಯದೊಳಗೆ ಯುಜಿಡಿ ಕಾಮಗಾರಿ ಪೂರ್ಣಗೊಳ್ಳಲಿವೆ ಎಂದು ಮಾಜಿ ಸಿಎಂ ಜಗದೀಶ ಶೆಟ್ಟರ್‌ ಹೇಳಿದರು.

ನಗರದಲ್ಲಿ ನಡೆಯುತ್ತಿರುವ ಒಳಚರಂಡಿ ಕೊಳವೆ ಮಾರ್ಗದ ನಿರ್ಮಾಣ ಕಾಮಗಾರಿಗಳನ್ನು ಸೋಮವಾರ ಪರಿಶೀಲಿಸಿದ ನಂತರ ಸುದ್ದಿಗೋಷ್ಠಿಯಲ್ಲಿ ಅವರು ಮಾತನಾಡಿದರು.

ಅಮೃತ ಯೋಜನೆಯಡಿ ಸದ್ಯ 202 ಕೀಮಿ ಪ್ರದೇಶದಲ್ಲಿ (15,500 ಮನೆಗೆ)ಯುಜಿಡಿ ಕೊಳವೆ ಮಾರ್ಗದ ಕಾಮಗಾರಿ ಮಾಡಲಾಗುತ್ತಿದೆ. ಈ ಯೋಜನೆಗೆ ಕೇಂದ್ರ ಸರಕಾರ 78 ಕೋಟಿ (ಶೇ.50ರಷ್ಟು) ವೆಚ್ಚ ಭರಿಸಿದರೇ, ರಾಜ್ಯ ಸರಕಾರ 31.20 (ಶೇ.20) ಹಾಗೂ ಮಹಾನಗರ ಪಾಲಿಕೆ 46.80 (ಶೇ.30) ಅನುದಾನ ನೀಡುತ್ತಿದೆ ಎಂದರು.

ಈವರೆಗೆ 177.50 ಕಿಲೋ ಮೀಟರ್‌ ಕಾಮಗಾರಿ ಮುಕ್ತಾಯವಾಗಿದೆ. ಇನ್ನುಳಿದ ಕಾಮಗಾರಿಯೂ ನವೆಂಬರ್‌ ಒಳಗೆ ಪೂರ್ಣಗೊಳ್ಳಲಿದೆ. ಒಟ್ಟು 7900 ಚೆಂಬರ್‌ ನಿರ್ಮಾಣಗಳ ಪೈಕಿ 7004 ಚೆಂಬರ್‌ಗಳನ್ನು ಅಳವಡಿಸಲಾಗಿದೆ ಎಂದರು.

ಹುಬ್ಬಳ್ಳಿ ನವೀನ್‌ ಪಾರ್ಕ, ವಿಮಾನ ನಿಲ್ದಾಣ ರಸ್ತೆ ಸೇರಿದಂತೆ ಹುಬ್ಬಳ್ಳಿ-ಧಾರವಾಡದಲ್ಲಿ 15-20ಕಡೆ ಯುಜಿಡಿ ನಿರ್ಮಾಣ ಕಾರ್ಯ ಆಗಬೇಕಿದೆ. ಅದಕ್ಕಾಗಿಯೇ 350 ಕೋಟಿ ರೂ. ಯೋಜನೆಯಡಿ ಒಟ್ಟು 180 ಕಿಲೋ ಮೀಟರ್‌ ಒಳಚರಂಡಿ ಸಂಪರ್ಕ ಕಲ್ಪಿಸುವ ಯೋಜನೆ ರೂಪಿಸುವಂತೆ ಅಧಿಕಾರಿಗಳ ಸೂಚಿಸಲಾಗಿದೆ. ಅಧಿಕಾರಿಗಳಿಂದ ವರದಿ ಬಂದ ನಂತರ ಕೇಂದ್ರ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸುವ ಜತೆಗೆ ಅನುದಾನ ತರುವ ಪ್ರಯತ್ನ ಮಾಡಲಾಗುವುದು ಎಂದರು.

5ಎಸ್‌ಟಿಪಿ ಪ್ಲಾಂಟ್‌

ಅಮೃತ ಯೋಜನೆಯಡಿ ಮಲೀನ ನೀರು ಶುದ್ಧೀಕರಣದ 5 ಘಟಕಗಳ ನಿರ್ಮಾಣ ಕಾರ್ಯ ನಡೆದಿದೆ. ಇದರಲ್ಲಿ ಕೃಷಿ ವಿವಿ ಆವರಣದಲ್ಲಿ ನಡೆಯುತ್ತಿರುವ 10 ಎಂಎಲ್‌ಡಿ ತ್ಯಾಜ್ಯ ನೀರು ಶುದ್ಧೀಕರಣ ಘಟಕದ ಸಿವಿಲ್‌ ಕಾಮಗಾರಿ ಮುಕ್ತಾಯಗೊಂಡಿದ್ದು, ಇಲೆಕ್ಟ್ರೋ ಮೆಕ್ಯಾನಿಕ್‌ ಕಾಮಗಾರಿ ಮುಕ್ತಾಯದ ಹಂತದಲ್ಲಿದೆ. ಕೆಲಗೇರಿಯಲ್ಲಿ ನಿರ್ಮಾಣವಾಗುತ್ತಿರುವ 3 ಎಂಎಲ್‌ಡಿ ತ್ಯಾಜ್ಯ ನೀರು ಶುದ್ಧೀಕರಣ ಘಟಕ ಕಾಮಗಾರಿ ಪ್ರಗತಿಯಲ್ಲಿದೆ ಎಂದರು.

ಹುಬ್ಬಳ್ಳಿಯ ಉಣಕಲ್‌ನಲ್ಲಿನ 3 ಎಂಎಲ್‌ಡಿ ತ್ಯಾಜ್ಯ ನೀರು ಶುದ್ಧೀಕರಣ ಘಟಕದ ಕಾಮಗಾರಿ ಶೇ.60ರಷ್ಟು ಪೂರ್ಣಗೊಂಡಿದೆ. ತೋಳನಕೆರೆಯಲ್ಲಿ ನಿರ್ಮಾಣದಲ್ಲಿರುವ ಘಟಕ ಶೇ.80ರಷ್ಟು ಕಾಮಗಾರಿ ಮುಕ್ತಾಯವಾಗಿದೆ. ಇನ್ನು ರಾಮನಗರದಲ್ಲಿ 0.25 ಎಂ.ಎಲ್‌ಡಿ ಸಾಮರ್ಥ್ಯ‌ದ ಘಟಕದ ಸಿವಿಲ್‌ ಕಾಮಗಾರಿ ಪೂರ್ಣಗೊಂಡಿದೆ. ಇದು ಮುಕ್ತಾಯವಾದ ಬಳಿಕ ಉಣಕಲ್‌, ತೋಳನಕೆರೆಗಳಿಗೆ ಕೊಳಚೆ ನೀರು ಸೇರುವುದು ತಪ್ಪಲಿದೆ ಎಂದು ಶೆಟ್ಟರ್‌ ವಿವರಿಸಿದರು.

202 ಕಿಲೋ ಮೀಟರ್‌ ಕೊಳವೆ ಬಾವಿ ಮಾರ್ಗದಲ್ಲಿ 6 ವೆಟ್‌ವೆಲ್ಸ್‌ ಬರುತ್ತವೆ. ಇವು ತ್ಯಾಜ್ಯ ನೀರು ಸರಾಗ ಹರಿದು ಹೋಗದ ಪ್ರದೇಶದಲ್ಲಿ ಈ ವೆಟ್‌ವೆಲ್ಸ್‌ ನಿರ್ಮಿಸಲಾಗುವುದು. ಅವು ತ್ಯಾಜ್ಯ ನೀರನ್ನು ಶುದ್ಧೀಕರಣ ಘಟಕಕ್ಕೆ ಹಾಕುತ್ತವೆ. ಶುದ್ಧೀಕರಣಗೊಂಡ ನೀರಿನ ಬಳಕೆ ಕುರಿತು ಇನ್ನು ಯಾವುದೇ ನಿರ್ಧಾರ ಕೈಗೊಂಡಿಲ್ಲ. ಸದ್ಯ ಕೆರೆಗಳಿಗೆ ತ್ಯಾಜ್ಯ ನೀರು ಕೆರೆ ಸೇರದಂತೆ ತಡೆಯಲಾಗುವುದು ಎಂದರು.

ಕಾಮಗಾರಿ ಪರಿಶೀಲನೆ..

ಅದಕ್ಕೂ ಮುನ್ನ ಹುಬ್ಬಳ್ಳಿ ರೈಲ್ವೆ ಕ್ವಾರ್ಟಸ್‌, ಉಣಕಲ್‌, ಭೈರಿದೇವರಕೊಪ್ಪ, ಸುಳ್ಳ ರಸ್ತೆಯಲ್ಲಿ ನಡೆಯುತ್ತಿರುವ ಒಳಚರಂಡಿ ಕಾಮಗಾರಿಗಳನ್ನು ಮಾಜಿ ಸಿಎಂ ಜಗದೀಶ ಶೆಟ್ಟರ್‌ ಹಾಗೂ ಅಧಿಕಾರಿಗಳ ತಂಡ ಪರಿಶೀಲನೆ ನಡೆಸಿದರು.

ಈ ವೇಳೆ ಮಾತನಾಡಿದ ಅವರು, ಕಾಮಗಾರಿ ಯಾವುದೇ ಕಾರಣಕ್ಕೂ ಕಳಪೆ ಆಗಬಾರದು. ಗುಣಮಟ್ಟದ ಕಾಮಗಾರಿಯಾಗಬೇಕು ಎಂದು ಸೂಚನೆ ನೀಡಿದರು.

ಕರ್ನಾಟಕ ಒಳಚರಂಡಿ ಅಭಿವೃದ್ಧಿ ಮಂಡಳಿಯ ಮುಖ್ಯ ಅಭಿಯಂತರ ಡಿ.ಎಲ್‌.ರಾಜು, ಪಾಲಿಕೆ ಆಯುಕ್ತ ಪ್ರಶಾಂತಕುಮಾರ ಮಿಶ್ರಾ ಸೇರಿದಂತೆ ಅನೇಕರು ಹಾಜರಿದ್ದರು.