ಫ್ಯಾಕ್ಟ್‌ ಚೆಕ್‌: ದುಬೈನ ಪಾಲ್ಮ್‌ ಜುಮೈರಾವನ್ನು ವಾರಣಾಸಿಯ ಅಧ್ಬುತ ಎಂದು ಹರಿಬಿಟ್ಟರು!

ಬಳಕೆದಾರರ ವಾದವೇನು?

Vijaya Karnataka Web

ಗಗನಚುಂಬಿ ಕಟ್ಟಡಗಳು, ಅತ್ಯುತ್ತಮ ರಸ್ತೆಗಳಿರುವ ಅದ್ಭುತ ದ್ವೀಪವೊಂದರ ಏರಿಯಲ್‌ ಫೋಟೋವನ್ನು ಹರಿಬಿಟ್ಟು, ಇದು ಗಂಗಾ ನದಿಯ ತಟದಲ್ಲಿರುವ ವಾರಣಾಸಿಯ ಅಧ್ಬುತ ದೃಶ್ಯ ಎಂದು ಹಲವಾರು ಜನರು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟಿದ್ದಾರೆ.


ಕೆಲವು ಫೇಸ್‌ಬುಕ್‌ ಬಳಕೆದಾರರಂತೂ ಇದರ ಚಿತ್ರವನ್ನು ಹಂಚಿಕೊಂಡು, ‘ದೇಶ ವಿರೋಧಿಗಳು ಮಾತ್ರ ಇದು ವಾರಣಾಸಿಯಲ್ಲ, ಯಾವುದೋ ವಿದೇಶದ ಚಿತ್ರ ಎನ್ನುತ್ತಾರೆ’ ಎಂದು ಬರೆದುಕೊಂಡಿದ್ದಾರೆ.



ವಾಸ್ತವವೇನು?

ವಾಸ್ತವದಲ್ಲಿ ಇದು ವಾರಣಾಸಿಯ ಚಿತ್ರವಲ್ಲ. ಇದು ದುಬೈನ ವಿಶ್ವವಿಖ್ಯಾತ ಪಾಲ್‌ ಜುಮೈರಾ ದ್ವೀಪದ ಆಕಾಶದಿಂದ ತೆಗೆದ ಚಿತ್ರವಾಗಿದೆ.

ಪತ್ತೆ ಹಚ್ಚಿದ ವಿಧಾನ

ರಿವರ್ಸ್‌ ಇಮೇಜ್‌ ಸರ್ಚ್‌ ಬಳಸಿಕೊಂಡಾಗ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡ ಫೋಟೋ ಪಾಲ್ಮ್‌ ಜುಮೈರಾದ್ದು ಎಂದು ತಿಳಿದು ಬಂತು. ಇದರ ಒರಿಜಿನಲ್‌ ಚಿತ್ರ ಒಂದು ಟ್ರಾವೆಲ್‌ ಪೋರ್ಟಲ್‌ನಲ್ಲಿ ಸಿಕ್ಕಿತು. ಅದರಲ್ಲಿ ಇದು ಪಾಲ್ಮ್‌ ಜುಮೈರಾ ಎಂದು ಸ್ಪಷ್ಟವಾಗಿ ಬರೆಯಲಾಗಿದೆ. ಹೀಗಿದ್ದೂ ಈ ಚಿತ್ರವನ್ನು ಬೇರೆ ಹೆಸರಿನಲ್ಲಿ ಹಂಚಿಕೊಳ್ಳಲಾಗಿದೆ!

ಪಾಲ್ಮ್‌ ಜುಮೈರಾ ಜಗತ್ತಿನಲ್ಲೇ ಅತೀ ದೊಡ್ಡ ಮಾನವ ನಿರ್ಮಿತ ದ್ವೀಪವಾಗಿದ್ದು, ಯುನೈಟೆಡ್‌ ಅರಬ್‌ ಎಮಿರೇಟ್ಸ್‌ (ಯುಎಇ)ನ ಖ್ಯಾತ ನಗರ ದುಬೈನಲ್ಲಿದೆ. ಯೂಟ್ಯೂಬ್‌ನಲ್ಲಿ ಆಕಾಶದಿಂದ ತೆಗೆದ ಇದರ ಸುಂದರ ವಿಡಿಯೋಗಳು ಬೇಕಾದಷ್ಟಿವೆ.

ನಿರ್ಣಯ

‘ವಿಕ’ ಫ್ಯಾಕ್ಟ್‌ಚೆಕ್‌ ಗೊತ್ತಾಗಿದ್ದೇನೆಂದರೆ ದುಬೈನ ಪಾಲ್ಮ್‌ ಜುಮೈರಾದ ಏರಿಯಲ್‌ ಚಿತ್ರವನ್ನು ಗಂಗಾ ನದಿಯ ತಟದಲ್ಲಿರುವ ವಾರಣಾಸಿಯ ಏರಿಯಲ್‌ ಚಿತ್ರ ಎಂದು ಹಂಚಿಕೊಳ್ಳಲಾಗಿದೆ.