ಎಚ್ಚೆತ್ತ ಕೃಷಿ ಇಲಾಖೆ; ಅಂತೂ ಬಂತು ರಸಗೊಬ್ಬರ; ಗದಗದಲ್ಲಿ 170 ಟನ್‌ ಗೊಬ್ಬರಕ್ಕೆ ಇಂಡೆಂಟ್‌!

ರೋಣ: ಕೃಷಿ ಇಲಾಖೆ ಅಧಿಕಾರಿಗಳು 170 ಟನ್‌ ಗೊಬ್ಬರಕ್ಕೆ ಇಂಡೆಂಟ್‌ ನೀಡುವ ಮೂಲಕ ರೋಣ ಪಟ್ಟಣ, ಗಜೇಂದ್ರಗಡ, ಹಾಲಕೆರೆ, ನರೆಗಲ್‌, ಹೊಳೆಆಲೂರ ಸೇರಿದಂತೆ ರಸಗೊಬ್ಬರ ಮಾರಾಟಗಾರರ ಬಳಿ ರೈತರಿಗೆ ಗೊಬ್ಬರ ದೊರೆಯುವಂತೆ ಮಾಡಿದರು.

ಎಲ್ಲಿ ಹುಡುಕಿದರೂ ಗೊಬ್ಬರ ಸಿಗದಿರುವ ಕುರಿತು ವಿಜಯ ಕರ್ನಾಟಕ ದಿನಪತ್ರಿಕೆಯಲ್ಲಿ ಮಂಗಳವಾರ 'ಗೊಬ್ಬರ ಅಭಾವ,ನಿಲ್ಲದ ಸಂಕಟ'ಎಂಬ ಸಮಗ್ರ ವರದಿ ಪ್ರಕಟಿಸಿತ್ತು.ಇದರಿಂದ ಎಚ್ಚೆತ್ತುಕೊಂಡ ಕೃಷಿ ಇಲಾಖೆ ಸಹಾಯಕ ನಿರ್ದೇಶಕ ಗೊಬ್ಬರ ಸಿಗುವಂತೆ ಮಾಡಿದರು.

ರೋಣ ನಗರದ ಮಹಾವೀರ ಟ್ರೇಡಿಂಗ್‌ ಕಂಪನಿಗೆ 17 ಟನ್‌,ಟಿಎಪಿಸಿಎಂ ಸೊಸೈಟಿಗೆ 15 ಟನ್‌, ಹಾಲಕೆರೆ ಸೊಸೈಟಿಗೆ 15 ಟನ್‌,ಮಾರನಬಸರಿ ವ್ಯವಸಾಯ ಸೇವಾ ಸೊಸೈಟಿಗೆ 15 ಟನ್‌, ಗಜೇಂದ್ರಗಡ ಫರ್ಟಿಲೈಜರ್‌ ಕಂಪನಿಗೆ 25 ಟನ್‌ ಹೀಗೆ ಹೊಳೆಆಲೂರ, ನರೆಗಲ್‌ ಸೇರಿದಂತೆ ವಿವಿಧ ಕಡೆಗಳನ್ನು ಅಧಿಕೃತ ಪರವಾನಗಿ ಹೊಂದಿರುವ ಮಾರಾಟಗಾರರಿಗೆ ಒಟ್ಟು 170 ಟನ್‌ ಡಿಎಪಿ ಸೇರಿದಂತೆ ಎಲ್ಲ ತರಹದ ಗೊಬ್ಬರ ಮಂಗಳವಾರ ಬೆಳಗ್ಗೆ ಬಂದಿದೆ.

ವಿಜಯ ಕರ್ನಾಟಕ ಪತ್ರಿಕೆಯಲ್ಲಿ ವರದಿಗೆ ಎಚ್ಚೆತ್ತುಕೊಂಡ ಅಧಿಕಾರಿಗಳು ಗೊಬ್ಬರ ಸಿಗುವಂತೆ ಮಾಡಿದ್ದು ಸಂತಸದ ವಿಷಯ ಎಂದು ಪುರಸಭೆ ಸದಸ್ಯ ಗದಿಗೆಪ್ಪ ಕಿರೇಸೂರ ಹೇಳುತ್ತಾರೆ.

ರೈತರಿಗೆ ಕೈಗೆಟುಕುವ ಸ್ಥಳಗಳಲ್ಲಿ ಗೊಬ್ಬರ ದೊರೆಯುವಂತೆ ಮಾಡುವಲ್ಲಿ ಪತ್ರಿಕೆ ಕಾರ್ಯ ಸ್ತುತ್ಯಾರ್ಹ. ಇದೀಗ ರೈತರಲ್ಲಿ ನಿರಾಳತೆ ಮೂಡಿದೆ ಎಂದು ಪುರಸಭೆ ಮಾಜಿ ಅಧ್ಯಕ್ಷ ಶಫೀಕ್‌ ಮುಗನೂರ ಹೇಳುತ್ತಾರೆ.

ಎಲ್ಲ ತರಹದ ಗೊಬ್ಬರ ಬಂದಿದೆ. ಸರಕಾರದ ನಿಗದಿತ ಬೆಲೆಯಲ್ಲಿ ರೈತರಿಗೆ ದೊರೆಯಬೇಕು. ಸ್ಟಾಕ್‌ ಇಟ್ಟುಕೊಂಡು ಹೆಚ್ಚಿನ ಬೆಲೆಗೆ ಮಾರಾಟ ಮಾಡುವುದನ್ನೂ ಮಾಡದಿರಲಿ.
ಕುತುಬುದ್ದಿನ್‌ ಜಲಾವರ, ಪ್ರಗತಿಪರ ರೈತ

ಹಿಂಗಾರು ಬಿತ್ತನೆಗೆ ರೈತರಿಗೆ ಬೇಕಾಗುವ ರಸಗೊಬ್ಬರ ಮಾರಾಟಗಾರರ ಸಭೆ ನಡೆಸಲಾಗಿದೆ. ಯಾವುದೇ ಕಾರಣಕ್ಕೂ ತೊಂದರೆಯಾಗದಂತೆ ಮಾರಾಟಗಾರರಿಗೆ ಇಂಡೆಂಟ್‌ ನೀಡಲಾಗುವುದು. ಹಿಂಗಾರು ಬಿತ್ತನೆ ಬೀಜಗಳನ್ನು ಸಾಕಷ್ಟು ಪ್ರಮಾಣದಲ್ಲಿ ಆರ್‌ಎಸ್‌ಕೆ ಮೂಲಕ ವಿತರಣೆ ಮಾಡಲಾಗುತ್ತಿದೆ. ಗೊಬ್ಬರಕ್ಕೆ ಅಭಾವವಾಗದಂತೆ ನೋಡಿಕೊಳ್ಳಲಾಗುವುದು.
ರವೀಂದ್ರ ಪಾಟೀಲ,ಎಡಿ ,ಕೃಷಿ ಇಲಾಖೆ ರೋಣ