ಟಿಕ್‌ಟಾಕ್‌ಗೆ ಯುವಕ ಬಲಿ: ಗದಗದಲ್ಲಿ ನೇಣು ಹಾಕಿಕೊಂಡಂತೆ ನಟಿಸಲು ಹೋಗಿ ಸಾವು

ಗದಗ: ಟಿಕ್‌ಟಾಕ್‌ ಹುಚ್ಚಿಗೆ ಬಲಿಯಾಗುತ್ತಿರುವ ಸಂಖ್ಯೆ ದೇಶದಲ್ಲಿ ಹೆಚ್ಚಾಗುತ್ತಿದ್ದು, ಇತ್ತ ಗದಗದಲ್ಲೂ ಟಿಕ್‌ಟಾಕ್‌ ಕ್ರೇಜ್‌ಗೆ ಯುವಕ ಸಾವನ್ನಪ್ಪಿದ್ದಾನೆ. ವಿಡಿಯೋದಲ್ಲಿ ನೇಣು ಹಾಕಿಕೊಂಡಂತೆ ನಟಿಸಲು ಹೋಗಿ ಯುವಕ ಮೃತಪಟ್ಟಿದ್ದಾನೆ.

ಮೃತನನ್ನು ಆಕಾಶ್‌ (26) ಎಂದು ಗುರುತಿಸಲಾಗಿದೆ. ಗದಗ ತಾಲೂಕಿನ ನರಸಾಪೂರ ಗ್ರಾಮದ ಕೈಗಾರಿಕಾ ಪ್ರದೇಶದಲ್ಲಿ ಘಟನೆ ನಡೆದಿದ್ದು, ಇಂಡಸ್ಟ್ರಿಯಲ್ ಏರಿಯಾದಲ್ಲಿನ ಬೇಕರಿಯಲ್ಲಿ ಕೆಲಸ ಮೃತ ಆಕಾಶ್‌ ಕೆಲಸ ಮಾಡುತ್ತಿದ್ದ ಎಂದು ತಿಳಿದು ಬಂದಿದೆ.

ಘಟನಾ ಸ್ಥಳಕ್ಕೆ ಬೆಟಗೇರಿ ಪೊಲೀಸರು ಭೇಟಿ ನೀಡಿ ಪರಿಶೀಲಿಸಿದ್ದು, ಗದಗನ ಬೆಟಗೇರಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಟಿಕ್‌ಟಾಕ್‌ನಲ್ಲಿ ಸಾಹಸ ಮಾಡಲು ಹೋಗಿ ಯುವಕರು ಪ್ರಾಣ ಕಳೆದುಕೊಳ್ಳುತ್ತಿರುವುದು ಇದೇ ಮೊದಲೇನಲ್ಲ. ಇದಕ್ಕೂ ಮುನ್ನ ಹಲವು ಕಡೆ ಟಿಕ್‌ಟಾಕ್‌ ಕ್ರೇಜ್‌ಗೆ ಯುವಕರು ಬಲಿಯಾಗಿದ್ದಾರೆ.