ಕರ್ತವ್ಯಕ್ಕೆ ಹಾಜರಾದ 92 ಮತಗಟ್ಟೆ ಸಿಬ್ಬಂದಿ

ನರಗುಂದ : ಪುರಸಭೆ ಚುನಾವಣೆಯಲ್ಲಿ ಬಿಜೆಪಿ ಕಾಂಗ್ರೆಸ್‌ ನೇರ ಸ್ಪರ್ಧೆ ತುರುಸಿನ ಪ್ರಚಾರ ಕಾವು ಏರ್ಪಟ್ಟಿದ್ದು, ಮೇ 29ರಂದು ಮತದಾನ ನಡೆಯಲಿದೆ. 23 ಮತಗಟ್ಟೆಗಳಿಗೆ 92 ಸಿಬ್ಬಂದಿ ಮಂಗಳವಾರ ಬೆಳಗ್ಗೆ ಮತಯಂತ್ರದೊಂದಿಗೆ ಹಾಜರಾದರು. ಮುಂಜಾಗೃತವಾಗಿ ಹೆಚ್ಚಿನ ಪೊಲೀಸರನ್ನು ನಿಯೋಜಿಸಲಾಗಿದೆ.

ಮತದಾನ ಬೆಳಗ್ಗೆ 7ರಿಂದ ಸಂಜೆ 6ರವರೆಗೆ ನಡೆಯಲಿದೆ. ಒಂದು ಮತಗಟ್ಟೆಗೆ 1ಪಿಆರ್‌ಓ, 1ಎಪಿಆರ್‌ರೋ, ಎರಡು ಪೋಲಿಂಗ್‌ ಕಚೇರಿ ಸೇರಿದಂತೆ 23 ಮತಗಟ್ಟೆಗಳಿಗೆ 92 ಚುನಾವಣೆ ಸಿಬ್ಬಂದಿ ಕರ್ತವ್ಯಕ್ಕೆ ಹಾಜರಾದರು. ಪಿಆರ್‌ಓ ಮತ್ತು ಎಪಿಆರ್‌ಓಗಳು ಮುಂಡರಗಿಯಿಂದ ಆಗಮಿಸಿದರೆ, ಇಲ್ಲಿನ ಸಿಬ್ಬಂದಿ ಮುಂಡರಗಿ ಪುರಸಭೆಗೆ ಕಳುಹಿಸಿಕೊಡಲಾಗಿದೆ. ಲೋಕಸಭೆಯಲ್ಲಿ ನಗರದಲ್ಲಿ ನಿರ್ಮಿಸಿದ್ದ 23ಮತಗಟ್ಟೆಗಳಲ್ಲೆ ಪುರಸಭೆ ಚುನಾವಣೆಗೆ ಮತದಾನ ನಡೆಯಲಿದೆ.

ಇಲ್ಲಿನ ಎಪಿಎಂಸಿಯಲ್ಲಿ ಮತಗಟ್ಟೆ ಸಿಬ್ಬಂದಿಗೆ ಬೆಳಗ್ಗೆ ಮತಯಂತ್ರಗಳೊಂದಿಗೆ ಮತದಾನ ಸಾಮಗ್ರಿ ವಿತರಿಸಲಾಯಿತು. ಮತದಾನ ಸಾಮಗ್ರಿಗಳೊಂದಿಗೆ ಬಾಲಕಿಯರ ಪ್ರೌಢ ಶಾಲೆ ಆವರಣಕ್ಕೆ ಬಂದ ಸಿಬ್ಬಂದಿ ಮುಂಡರಗಿ ಪುರಸಭೆ ಚುನಾವಣೆ ಕರ್ತವ್ಯಕ್ಕೆ ತೆರಳಿದರೆ ಮುಂಡರಗಿಯಿಂದ 50 ಚುನಾವಣೆ ಸಿಬ್ಬಂದಿ ನರಗುಂದಕ್ಕೆ ಆಗಮಿಸಿ ಸೂಚಿತ ಮತಗಟ್ಟೆಗಳಿಗೆ ಹಾಜರಾದರು. ಚುನಾವಣಾಧಿಕಾರಿಗಳಾದ ಸತೀಷ ನಾಗನೂರ, ಚನ್ನಪ್ಪ ಅಂಗಡಿ ತಿಳಿಸಿದರು.

ಬಂದು ಬಸ್ತಿಗೆ ಪೊಲೀಸರ ನೇಮಕ:23ಸ್ಥಾನಗಳಿಗೆ ನಡೆಯುವ ಪುರಸಭೆ ಚುನಾವಣೆ ಹಿನ್ನಲೆಯಲ್ಲಿ ಹೆಚ್ಚಿನ ಪೊಲೀಸರನ್ನು ನಿಯೋಜಿಸಿದ್ದು 1ಡಿಎಸ್‌ಪಿ, ಇನ್ಸಪೆಕ್ಟರ್‌, 2ಪಿಎಸ್‌ಐ, 1 ಕೆಎಸ್‌ಆರ್‌ಪಿ, 2ಡಿಆರ್‌ ತುಕುಡಿಗಳು, ಗದಗ, ಗಜೇಂದ್ರಗಡ, ರೋಣ ಭಾಗದಿಂದ 70ಕ್ಕೂ ಹೆಚ್ಚು ಎಎಸ್‌ಐ, ಪೊಲೀಸರು, ಹೋಮಗಾರ್ಡ್‌ಗಳು ಕರ್ತವ್ಯಕ್ಕೆ ಹಾಜರಾಗಿದ್ದಾಗಿ ಪೊಲೀಸರು ತಿಳಿಸಿದ್ದಾರೆ.