ಸತತ ಮಳೆಗೆ ಕೊಳೆಯುತ್ತಿರುವ ಬೆಳೆ

ವೀರಪ್ಪ ಸಿದ್ದನಗೌಡರ
ಮುಳಗುಂದ: ನಿರಂತರ ಮಳೆಯಿಂದ ಕಟಾವಿಗೆ ಬಂದ ಶೇಂಗಾ ಬೆಳೆ ಹಸ್ತ ಮಳೆಗೆ ಕೊಳೆಯುತ್ತಿದೆ.ಇದರಿಂದ ಮುಂಗಾರು ಬೆಳೆ ನಿರೀಕ್ಷೆಯಲ್ಲಿದ್ದ ರೈತರು ಕಂಗಾಲಾಗಿದ್ದಾರೆ.

ಮುಂಗಾರು ಮಳೆ ಸ್ವಲ್ಪು ತಡವಾಗಿ ಆರಂಭವಾಗಿದ್ದರಿಂದ ಒಂದು ತಿಂಗಳ ತಡವಾಗಿ ಬಿತ್ತನೆ ಮಾಡಿದ ರೈತರು ಈಗ ಶೇಂಗಾ ಬೆಳೆ ಕಟಾವು ಹಂತದಲ್ಲಿದ್ದು ಸತತ ಮಳೆಯಿಂದ ಶೇಂಗಾ ಕೊಳೆಯುತ್ತಿದ್ದು ಅದರ ಜತೆಯಲ್ಲಿಬಿತ್ತನೆ ಮಾಡಿದ ಬಿಟಿ ಹತ್ತಿ,ಮೆಣಸಿನಕಾಯಿ ಬೆಳೆ ಸಂಪೂರ್ಣವಾಗಿ ನೀರಿನಲ್ಲಿನಿಂತಿದೆ. ಇದರಿಂದ ಬಿತ್ತನೆ ಮಾಡಿದ ಬೀಜದ ಜತೆಗೆ ಮಾಡಿದ ಶ್ರಮ ವ್ಯರ್ಥವಾಗುತ್ತಿದೆ.

ಪ್ರಸಕ್ತ ವರ್ಷದ ಮುಂಗಾರು ಮಳೆ ಸಹ ಕೈಕೊಟ್ಟಿತ್ತು. ಸಂಪೂರ್ಣ ಮಳೆರಾಯನ ಅವಕೃಪೆಗೆ ಒಳಗಾಗಿದ್ದರೂ, ಹವಾಮಾನ ಕೃಪೆಯೋ ಇನ್ನೇನೋ ಮುಂಗಾರಿನಲ್ಲಿಬಿತ್ತನೆ ಮಾಡಿದ್ದ ಬೀಜ ಮೊಳಕೆಯೊಡೆದು ಕೊಂಚ ನೆಮ್ಮದಿ ಮೂಡಿಸಿದ್ದವು.ಈ ಬಾರಿಯಾದರೂ ಫಸಲು ಸ್ವಲ್ಪು ಮಟ್ಟಿಗೆ ಆಸರೆಯಾಗುತ್ತದೆ ಎನ್ನುವ ಭರವಸೆಯನ್ನಿಟ್ಟುಕೊಂಡಿದ್ದ ರೈತನಿಗೆ ಸತತ ಮಳೆಯಿಂದ ಹೊಲಗಳಲ್ಲಿಬೆಳೆ ಕೊಳೆಯಲಾರಂಭಿಸಿವೆ.

ಹಿಂಗಾರು ಬೆಳೆ ಕಡಲೆ ಬೀಜವನ್ನು ರೈತರು ಬಿತ್ತನೆ ಮಾಡಿದ್ದರು. ಸತತ ಮಳೆಯಿಂದ ಬೀಜಗಳು ಮೊಳಕೆಯೊಡೆಯದೇ ಹಾಳಾಗಿದ್ದರಿಂದ ಮತ್ತೆ ಬಿತ್ತನೆ ಮಾಡುವ ಸ್ಥಿತಿ ಬಂದಿದೆ ಎಂಬುದು ರೈತನ ಅಳಲು.