2 ಸಾವಿರ ಕೋಳಿಗಳಿಗೆ ವಿಷ ಕೊಟ್ಟ ಕುಟುಂಬ

ಗದಗ : ಕೋಳಿ ಫಾರ್ಮ ವಾಸನೆ ಹೆಚ್ಚಾಗಿದೆ ಎನ್ನುವ ಕಾರಣಕ್ಕೆ ಕೋಳಿಗಳಿಗೆ ಸರಬರಾಜು ಆಗುವ ನೀರಿಗೆ ವಿಷ ಬೆರಸಿ 2 ಸಾವಿರ ಕೋಳಿಗಳ ಸಾವಿಗೆ ಕುಟುಂಬವೊಂದು ಕಾರಣವಾಗಿರುವ ಘಟನೆ ನರಗುಂದ ತಾಲೂಕಿನ ಶಿರೋಳದಲ್ಲಿ ನಡೆದಿದೆ.

ಶಿರೋಳದ ಹೇಮರಡ್ಡಿ ವೆಂಕರಡ್ಡಿ ನಿಂಗರಡ್ಡಿಯವರ ಅವರಿಗೆ ಸೇರಿದ ಕೋಳಿ ಫಾರ್ಮ ಪಕ್ಕದಲ್ಲಿ ಬಸಪ್ಪ ಚಂದಣ್ಣವರ ಕುಟುಂಬ ವಾಸವಾಗಿತ್ತು. ಕೋಳಿ ಫಾರ್ಮ ವಾಸನೆ ಬರುತ್ತದೆ ಎನ್ನುವ ಕಾರಣಕ್ಕೆ ಫಾರ್ಮ ಮಾಲೀಕ ಹೇಮರಡ್ಡಿ ಜತೆ ಪದೇ ಪದೇ ವಾಗ್ವಾದ ನಡೆಸುತ್ತಲೇ ಇದ್ದರು.

ಇದರಿಂದ ರೋಸಿ ಹೋದ ಬಸಪ್ಪ ಚಂದಣ್ಣವರ (45), ಪತ್ನಿ ಸುಮಿತ್ರಾ, ಪುತ್ರರಾದ ಚೇತನ, ಶರಣು ಭಾನುವಾರ ಮಧ್ಯಾಹ್ನ ಕೋಳಿಗಳಿಗೆ ಸರಬರಾಜು ಆಗುವ ನೀರಿಗೆ ವಿಷ ಬೆರೆಸಿದ್ದಾರೆ. ಶನಿವಾರ ಬೆಳಗಿನ ವರೆಗೆ 2000 ಕೋಳಿಗಳು ಸಾವನ್ನಪ್ಪಿವೆ. ಮೊದಲಿಗೆ ಯಾವುದೇ ರೋಗದಿಂದ ಸಾವನ್ನಪ್ಪುತ್ತಿವೆ ಎಂದು ಅಂದಾಜಿಸಿದ್ದ ಫಾರ್ಮ ಮಾಲೀಕ, ನಂತರ ವಿಷ ಬೆರೆಸಿರುವುದು ಗೊತ್ತಾಗಿ, ಒಟ್ಟು 4 ಲಕ್ಷ ರೂ. ಹಾನಿ ಮಾಡಿದ್ದಾರೆ ಎಂದು ಆರೋಪಿಸಿ ಸೋಮವಾರ ಸಂಜೆ ನರಗುಂದ ಠಾಣೆಗೆ ದೂರು ನೀಡಿದ್ದಾರೆ.