ಎಸಿಬಿ ದಾಳಿ: ಪುರಸಭೆ ಮುಖ್ಯಾಧಿಕಾರಿ ಬಂಧನ

ರೋಣ (ಗದಗ) : ಇಲ್ಲಿನ ಲೋಕೋಪಯೋಗಿ ಇಲಾಖೆಯ ಪ್ರವಾಸಿ ಮಂದಿರದ ಕೊಠಡಿಯಲ್ಲಿ ಶನಿವಾರ ಮಧ್ಯಾಹ್ನ ಎಸಿಬಿ ಅಧಿಕಾರಿಗಳು ದಿಢೀರ್‌ ದಾಳಿ ನಡೆಸಿ ಲಂಚ ಪಡೆಯುತ್ತಿದ್ದ ಪುರಸಭೆ ಮುಖ್ಯಾಧಿಕಾರಿ ಲಕ್ಷ ್ಮಣ ಕಟ್ಟಿಮನಿ ಅವರನ್ನು ಬಂಧಿಸಿದ್ದಾರೆ.

ಪಟ್ಟಣದ ನೀರಾವರಿ ಇಲಾಖೆಯ ಪ್ರವಾಸಿ ಮಂದಿರದ ಕ್ಯಾಂಟಿನ್‌ ನಡೆಸುತ್ತಿರುವ ಶೇರಖಾನ್‌ ಚಿನಿವಾಲ ಎಂಬುವರು ಆಹಾರ ಪರವಾನಗಿ ನವೀಕರಿಸಲು ಪುರಸಭೆಗೆ ಅರ್ಜಿ ಸಲ್ಲಿಸಿದ್ದರು. ಈ ಕೆಲಸ ಮಾಡಿಕೊಡಲು ಮುಖ್ಯಾಧಿಕಾರಿ ಕಟ್ಟಿಮನಿ 6 ಸಾವಿರ ರೂ. ಲಂಚದ ಬೇಡಿಕೆ ಇಟ್ಟಿದ್ದರು. ಹೀಗಾಗಿ ಶೇರಖಾನ್‌ ಚಿನಿವಾಲ ಮುಖ್ಯಾಧಿಕಾರಿ ಕಟ್ಟಿಮನಿ ವಾಸ್ತವ್ಯವಿರುವ ಪ್ರವಾಸಿ ಮಂದಿರದ ಕೊಠಡಿಯಲ್ಲಿ ಹಣ ಕೊಡುತ್ತಿರುವ ಸಂದರ್ಭದಲ್ಲಿ ಎಸಿಬಿ ಅಧಿಕಾರಿಗಳು ದಾಳಿ ನಡೆಸಿ ಹಣದೊಂದಿಗೆ ಆರೋಪಿಯನ್ನು ಬಂಧಿಸಿದ್ದಾರೆ.

ಅಲ್ಲದೆ ಎಸಿಬಿ ಅಧಿಕಾರಿಗಳು ಕಟ್ಟಿಮನಿಯವರ ಬಳಿಯಿದ್ದ ಕಂಪ್ಯೂಟರ್‌, ಮೊಬೈಲ್‌ ಸೇರಿದಂತೆ ಅನೇಕ ವಸ್ತುಗಳನ್ನು ತಮ್ಮ ವಶಕ್ಕೆ ಪಡೆದಿದ್ದಾರೆ. ಸುಮಾರು ನಾಲ್ಕು ಗಂಟೆ ಪರಿಶೀಲನೆ ನಂತರ ಅವರನ್ನು ವೈದ್ಯಕೀಯ ತಪಾಸಣೆಗೆ ಒಳಪಡಿಸಲಾಯಿತು.

ಎಸಿಬಿ ಡಿವೈಎಸ್ಪಿ ವಾಸುದೇವ ನಾಯ್ಕ ಮಾರ್ಗದರ್ಶನದಲ್ಲಿ ನಡೆದ ದಾಳಿಯಲ್ಲಿ ಅಧಿಕಾರಿಗಳಾದ ಎಸ್‌.ಎಂ.ದಾನಪ್ಪಗೌಡ, ಬಿ.ಬಿ.ಜಕ್ಕಣ್ಣವರ, ರಮೇಶ ಹೆಬಸೂರ, ಮಂಜುನಾಥ ಕರಿಗಾರ, ಎಸ್‌.ಟಿ.ಅಣ್ಣಿಗೇರಿ, ಅಯ್ಯನಗೌಡ್ರ ಸೇರಿದಂತೆ ಅನೇಕರಿದ್ದರು.

ಉಂಡು, ತಿಂದು ಲಂಚ ಕೇಳಿದ : ಸದ್ಯ ಶೇರಖಾನ್‌ ಚಿನಿವಾಲ ನಡೆಸುತ್ತಿರುವ ಕ್ಯಾಂಟೀನ್‌ನಲ್ಲಿ ಮುಖ್ಯಾಧಿಕಾರಿ ಲಕ್ಷ ್ಮಣ ಕಟ್ಟಿಮನಿ ತಮ್ಮ ಹಿಂಬಾಲಕರೊಂದಿಗೆ ನಿತ್ಯ ಊಟ, ಉಪಾಹಾರ ಸೇವಿಸಿ 20 ಸಾವಿರಕ್ಕೂ ಅಧಿಕ ಹಣ ಬಾಕಿ ಮಾಡಿದ್ದಾರೆ. ಈ ಬಾಕಿ ಇಟ್ಟುಕೊಂಡು ಆಹಾರ ಪರವಾನಿಗೆ ನವೀಕರಿಸಲು 10 ಸಾವಿರ ರೂ. ಲಂಚದ ಬೇಡಿಕೆ ಇಟ್ಟಿದ್ದಾರೆ. ಬಾಕಿ ಇಟ್ಟುಕೊಂಡ ಹಣವನ್ನೂ ಕೊಡದೇ ಮತ್ತೆ ಲಂಚಕ್ಕೆ ಬೇಡಿಕೆ ಇಟ್ಟಿದ್ದರಿಂದ ಶೇರಖಾನ್‌ ಎಸಿಬಿ ಅಧಿಕಾರಿಗಳ ಮೊರೆ ಹೋಗಿದ್ದರು. ಅವರ ಸಲಹೆಯಂತೆ 6 ಸಾವಿರಕ್ಕೆ ವ್ಯವಹಾರ ಕುದುರಿಸಿ ಹಣ ನೀಡುತ್ತಿದ್ದಾಗ ಎಸಿಬಿ ಅಧಿಕಾರಿಗಳು ದಾಳಿ ಮಾಡಿದ್ದಾರೆ.