ನವಗ್ರಾಮದಲ್ಲಿ ಒಂದೇ ಕಡೆ ಮನೆಗಾಗಿ ವಾಗ್ವಾದ

ಹೊಳೆಆಲೂರ: ಸಮೀಪದ ಬಿ.ಎಸ್‌.ಬೆಲೇರಿ ನವಗ್ರಾಮದಲ್ಲಿ ಸವರ್ಣಿಯರಿಗೆ ಮತ್ತು ದಲಿತರಿಗೆ ಪ್ರತ್ಯೇಕವಾಗಿ ವಿಭಾಗ ಮಾಡಿ ಮನೆ ನೀಡುವ ವಿಷಯಕ್ಕೆ ಸಂಬಂಧಿಸಿದಂತೆ ಸೋಮವಾರ ಮಾತಿಗೆ ಮಾತು ಬೆಳೆದು ವಾಗ್ವಾದ ನಡೆದಿದೆ.

ಈ ಹಿಂದೆ ಆಗಸ್ಟ್‌ ತಿಂಗಳಿನಲ್ಲಿ ನೆರೆ ಬರುವ ಎರಡು ದಿನ ಮೊದಲು ಗಣಿ ಮತ್ತು ಭೂ ವಿಜ್ಞಾನ ಸಚಿವ ಸಿ.ಸಿ.ಪಾಟೀಲ ಗ್ರಾಮಕ್ಕೆ ಭೇಟಿ ನೀಡಿದ ಸಂದರ್ಭ ಸವರ್ಣಿಯರು ತಮಗೆ ಪ್ರತ್ಯೇಕವಾಗಿ ಮನೆಗಳನ್ನು ನೀಡುವಂತೆ ಮನವಿ ಮಾಡಿದ್ದರು. ಆಗ ಸಚಿವರು ನೋಡೋಣ ಎಂದಷ್ಟೇ ಹೇಳಿದ್ದರು.

ಆಸರೆ ಮನೆಗಳ ಹಂಚಿಕೆ ಸಮಯದಲ್ಲಿ ಏರಿಯಾಗಳನ್ನು ಬೇರೆ ಬೇರೆ ಮಾಡಬೇಕಿತ್ತು ಎಂಬ ವಾದ ಸೋಮವಾರ ಕೆಲವರಿಂದ ಕೇಳಿಬಂದಿದೆ. ಇದರಿಂದ ಕುಪಿತವಾದ ಕೆಲವರು ನೀವೊಂದು ಬದಿಯಲ್ಲಿ ಮನೆ ಮಾಡಿಕೊಳ್ಳಿ, ನಾವೊಂದು ಬದಿ ಒಟ್ಟಿಗೆ ಇರುತ್ತೇವೆ ಎನ್ನುತ್ತಿದ್ದಂತೆ ಎರಡೂ ಸಮುದಾಯಗಳ ನಡುವೆ ವಾಗ್ವಾದ ನಡೆಯಿತು. ಸಂಬಂಧಪಟ್ಟ ಅಧಿಕಾರಿಗಳು ಇತ್ತ ಗಮನಹರಿಸಿ ಆರಂಭಿಕ ಹಂತದಲ್ಲೇ ಈ ಜಗಳವನ್ನು ಬಗೆಹರಿಸಬೇಕೆಂದು ಪ್ರಜ್ಞಾವಂತರು ಆಗ್ರಹಿಸಿದ್ದಾರೆ.