ಬಸ್‌ನಲ್ಲಿ ಶುದ್ಧ ಕುಡಿಯುವ ನೀರು!

ಮುಳಗುಂದ : ಬೇಸಿಗೆ ದಿನದಲ್ಲಿ ನೀರು ಸಿಗುವುದು ವಿರಳ ಇಂಥ ಸಮಯದಲ್ಲಿ ತಮ್ಮ ಸ್ವಂತ ಖರ್ಚಿನಲ್ಲಿ ಪ್ರಯಾಣಿಕರಿಗೆ ಶುದ್ಧ ಕುಡಿಯುವ ನೀರೊದಗಿಸುತ್ತಿರುವ ಈ ಚಾಲಕ ಹಾಗೂ ನಿರ್ವಾಹಕರ ಸೇವೆ ಶ್ಲಾಘನೀಯ.

ಹುಬ್ಬಳ್ಳಿ -ಶಿರಹಟ್ಟಿ ರೂಟ್‌ ಬಸ್‌ ನಂ. ಕೆಎ 42 ಎಫ್‌ 1644ರಲ್ಲಿ ಹತ್ತಿದರೆ ಶುದ್ಧ ನೀರು ಲಭ್ಯ. ಹುಬ್ಬಳ್ಳಿ ಡಿಪೋಗೆ ಸೇರಿದ ಬಸ್‌ನಲ್ಲಿ ಚಾಲಕ ವಿ.ಎಸ್‌. ಬಡಿಗೇರ ಹಾಗೂ ನಿರ್ವಾಹಕ ವಿ.ಎಂ. ಹಾದಿಮನಿ ಅವರು ಪ್ರಯಾಣಿಕರಿಗೆ ಶುದ್ಧ ಕುಡಿಯುವ ನೀರನ್ನು ಪ್ರಯಾಣಿಕರಿಗೆ ನೀಡುತ್ತಿದ್ದಾರೆ

ಇವರಿಬ್ಬರೂ ಹಲವು ವರ್ಷಗಳಿಂದ ಇದೇ ಮಾರ್ಗದಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದು, ಈ ಮಾರ್ಗದ ಪ್ರತಿ ಪ್ರಯಾಣಿಕರಿಗೂ ಇವರು ಚಿರಪರಿಚಿತರು.

ಶುದ್ಧ ಕುಡಿಯುವ ನೀರು ಬಸ್‌ನಲ್ಲಿ ಕಾಲಿಯಾದ ತಕ್ಷ ಣ ಮಾರ್ಗದಲ್ಲಿರುವ ಯಾವುದಾದರೂ ನೀರಿನ ಘಟಕಕ್ಕೆ ಓಡಿ ಹೋಗಿ ನೀರು ತುಂಬಿಸಿಕೊಂಡು ಹೆಗಲ ಮೇಲಿಟ್ಟುಕೊಂಡು ಬಂದು ಬಸ್‌ನಲ್ಲಿಡುತ್ತಾರೆ.

ಇವರಬ್ಬರು ನೀರಿನ ವ್ಯವಸ್ಥೆ ಮಾಡಿರುವುದನ್ನು ನೋಡಿ ಕೆಎಸ್‌ಆರ್‌ಟಿಸಿ ಅಧಿಕಾರಿಗಳು ಎಲ್ಲ ಬಸ್‌ಗಳಲ್ಲಿ ಈ ತೆರನಾದ ವ್ಯವಸ್ಥೆ ಮಾಡಿದರೆ ಪ್ರಯಾಣಿಕರಿಗೆ ಅನುಕೂಲವಾಗಲಿದೆ ಎಂಬುದು ಪ್ರಯಾಣಿಕರ ಒತ್ತಾಸೆ.