ಪೇದೆ ಹುದ್ದೆಗೆ ಸ್ಪರ್ಧಾತ್ಮಕ ಪರೀಕ್ಷೆ

ಗದಗ : ರಾಜ್ಯ ಕೆಎಸ್‌ಆರ್‌ಪಿ ಹಾಗೂ ಕೆಎಸ್‌ಐಎಸ್‌ಎಫ್‌ ಪೇದೆ ಹುದ್ದೆಗಳ ಭರ್ತಿಗಾಗಿ ಭಾನುವಾರ ನಡೆದ ಸ್ಪರ್ಧಾತ್ಮಕ ಪರೀಕ್ಷೆಗೆ ಒಟ್ಟು 15 ಪರೀಕ್ಷಾ ಕೇಂದ್ರಗಳಲ್ಲಿ ಪರೀಕ್ಷೆ ನಡೆಯಿತು.

ಕೆಎಸ್‌ಆರ್‌ಪಿ ಕಾನ್ಸಟೇಬಲ್‌ ಹುದ್ದೆಗೆ ಜಿಲ್ಲೆಯಲ್ಲಿ 6,712 ಮಂದಿ ಅಭ್ಯರ್ಥಿಗಳು ಹೆಸರು ನೋಂದಾಯಿಸಿಕೊಂಡಿದ್ದರು. ಆ ಪೈಕಿ 5791 ಮಂದಿ ಪರೀಕ್ಷೆ ಎದುರಿಸಿದ್ದು, 991 ಅಭ್ಯರ್ಥಿಗಳು ಗೈರು ಹಾಜರಾಗಿದ್ದರು.

ಮಧ್ಯಾಹ್ನ ನಡೆದ ಕೆಎಸ್‌ಐಎಸ್‌ಎಫ್‌ ಪೇದೆ ಹುದ್ದೆಗಳಿಗೆ 5881 ಮಂದಿ ನೋಂದಾಯಿಸಿಕೊಂಡವರಲ್ಲಿ 5292 ಮಂದಿ ಹಾಜರಾಗಿದ್ದು, 589 ಮಂದಿ ಅಭ್ಯರ್ಥಿಗಳು ಗೈರು ಆಗಿದ್ದರು.

ಕೆಎಸ್‌ಆರ್‌ಪಿ ಹಾಗೂ ಕೆಎಸ್‌ಐಎಸ್‌ಎಫ್‌ ಸ್ಪರ್ಧಾತ್ಮಕ ಪರೀಕ್ಷೆಗಳ ಹಿನ್ನೆಲೆಯಲ್ಲಿ ಪರೀಕ್ಷಾ ಕೊಠಡಿಗಳಲ್ಲಿ ಸಿಸಿಟಿವಿ ಅಳವಡಿಸಲಾಗಿತ್ತು. ಸಿಸಿಟಿವಿ ಲಭ್ಯವಿಲ್ಲದೆಡೆ ಹ್ಯಾಂಡಿಕ್ಯಾಮ್‌ನಲ್ಲಿ ಪರೀಕ್ಷೆಯನ್ನು ಚಿತ್ರೀಕರಿಸಲಾಯಿತು. ಪರೀಕ್ಷಾ ಕೇಂದ್ರಗಳಲ್ಲಿ ಪರೀಕ್ಷಾ ಅಕ್ರಮಗಳು ನಡೆಯದಂತೆ ಪರೀಕ್ಷಾ ಕೇಂದ್ರಗಳ ಸುತ್ತ ಬಗಿ ಬಂದೋಬಸ್ತ್‌ ಕೈಗೊಳ್ಳಲಾಗಿತ್ತು ಎಂದು ಎಸ್ಪಿ ಕೆ.ಸಂತೋಷ ಬಾಬು ಮಾಹಿತಿ ನೀಡಿದರು.

ಜಿಲ್ಲೆಯ ವಿವಿಧ ಭಾಗಗಳಿಂದ ಅವಳಿ ನಗರಕ್ಕೆ ರೈಲುವೆ ಮೂಲಕ ಹಾಗೂ ಬಸ್‌ ಮೂಲಕ ಸಾವಿರಾರು ವಿದ್ಯಾರ್ಥಿಗಳು ಪರೀಕ್ಷೆ ಬರೆಯಲು ಶನಿವಾರ ಸಂಜೆ ಅವಳಿ ನಗರಕ್ಕೆ ಆಗಮಿಸಿದ್ದರು. ಕೆಲವರು ಬೆಳಗಿನ ಸಮಯಕ್ಕೆ ಆಗಮಿಸಿ ಪರೀಕ್ಷೆ ಬರೆದರು.