ಶಾಮಿಯಾನ ಉದ್ಯೋಗಿಗಳಿಗೆ ಹಾನಿ

ಲಕ್ಕುಂಡಿ: ಕಳೆದ ಶನಿವಾರ ಮತ್ತು ಭಾನುವಾರ ಗದಗ ನಗರಸಭೆಯು 54 ವಕಾರ ಸಾಲುಗಳನ್ನು ತೆರವು ಗೊಳಿಸಿದ್ದರಿಂದ ಹಲವು ವರ್ಷಗಳಿಂದ ಶಾಮಿಯಾನ ಉದ್ಯೋಗ ನಿರ್ವಹಣೆ ಮಾಡಿಕೊಂಡು ಬಂದಿದ್ದ 26 ಶಾಮಿಯಾನ ಉದ್ಯೋಗಿಗಳಿಗೆ ಲಕ್ಷಾಂತರ ಹಾನಿಯಾಗಿದೆ ಎಂದು ಗದಗ ಜಿಲ್ಲಾ ಶಾಮಿಯಾನ ಸಪ್ಲಾಯರ್ಸ್‌ ಸಂಘದ ಮಾಜಿ ಕಾರ್ಯದರ್ಶಿ ಸಂಗಮೇಶ ತಿಮ್ಮಾಪೂರ ಕಳವಳ ವ್ಯಕ್ತಪಡಿಸಿದ್ದಾರೆ.

ಈ ಕುರಿತು ಪತ್ರಿಕಾ ಪ್ರಕಟಣೆ ನೀಡಿರುವ ಅವರು ಗದಗ ನಗರಸಭೆಯ ದುರಾಡಳಿತದಿಂದಲೊ ಅಥವಾ ಬಾಡಿಗೆ ನೀಡಿದ ಮಾಲೀಕರ ಬೇಜವಾಬ್ದಾರಿತನದಿಂದಲೋ ಇಂದು ಶಾಮಿಯಾನ ಮಾಲೀಕರ ಬದುಕು ಬೀದಿಗೆ ಬಂದಿದೆ. ಜಿಸಿಬಿಯಿಂದ ವಕಾರ ಸಾಲಿನಲ್ಲಿ ಇದ್ದ ಶಾಮಿಯಾನ ಅಂಗಡಿಗಳಲಿದ್ದ ನೂರಾರು ಸಾಮಿಗ್ರಿಗಳು ಹಾನಿಯಾಗಿವೆ. ಅವರ ಮುಂದಿನ ದುಡಿಮೆಗೆ ತೊಂದರೆಯಾಗಿದೆ. ಈಗ ತರಾತುರಿಯಲ್ಲಿ ಜಾಗ ಸಿಗದೆ ಪರದಾಡುತ್ತಿದ್ದಾರೆ. ಆದ್ದರಿಂದ ಸರಕಾರವು ಬಾಡಿಗೆ ಕೊಟ್ಟ ಮಾಲೀಕರಿಂದ ಶಾಮಿಯಾನ ಉದ್ಯೋಗಿಗಳ ನಷ್ಟ ತುಂಬಿಸಿಕೊಡಬೇಕೆಂದು ಸಂಗಮೇಶ ತಿಮ್ಮಾಪೂರ ಆಗ್ರಹಿಸಿದ್ದಾರೆ.