ರೈತ ಹುತಾತ್ಮ ದಿನಾಚರಣೆ: ಬಿಜೆಪಿಯಿಂದ ಶ್ರದ್ಧಾಂಜಲಿ

ನರಗುಂದ : ಮಹದಾಯಿ, ಕಳಸಾ ಬಂಡೂರಿ ಯೋಜನೆ ಜಾರಿಗೆ ಸುದೀರ್ಘ ಹೋರಾಟದ ನಡುವೆ ನ್ಯಾಯಾಧೀಕರಣ ತೀರ್ಪು ನೀಡಿದ ನಂತರ ಕೇಂದ್ರ ಸರಕಾರ ಗಜೆಟ್‌ ಹೊರಡಿಸಲು ಸಿದ್ಧತೆ ಮಾಡಿಕೊಂಡಿದೆ, ಆದರೆ ರಾಜ್ಯ ಸರಕಾರ ಪೂರ್ವ ಸಿದ್ಧತೆ ಮಾಡಿಕೊಂಡಿಲ್ಲ ಎಂದು ಬಿಜೆಪಿ ಯುವ ಮುಖಂಡ ಉಮೇಶಗೌಡ ಪಾಟೀಲ ದೂರಿದರು.

39ನೇ ರೈತ ಹುತಾತ್ಮ ದಿನಾಚರಣೆಯಲ್ಲಿ ಪಾಲ್ಗೊಂಡು ಮಾತನಾಡಿ, ನ್ಯಾಯಾಧೀಕರಣ ಆದೇಶದ ನಂತರ ಗೆಜೆಟ್‌ ಹೊರಡಿಸುವ ನಿಟ್ಟಿನಲ್ಲಿ ಸಂಸದರು, ಕೇಂದ್ರ ಸಚಿವರಾದ ಪ್ರಹ್ಲಾದ ಜೋಶಿ, ಸುರೇಶ ಅಂಗಡಿ ಅವರು ಪ್ರಯತ್ನ ನಡೆಸಿದ್ದಾರೆ ಎಂದರು.

ಪುರಸಭೆ ಮಾಜಿ ಸದಸ್ಯ ವಾಸು ಜೋಗಣ್ಣವರ ಮಾತನಾಡಿ, ಕರ ರದ್ದತಿಗೆ ಒತ್ತಾಯಿಸಿ ನಡೆದ ಹೋರಾಟದಲ್ಲಿ ರೈತರು ಗೋಲಿಬಾರಿಗೆ ಪ್ರಾಣ ಕಳೆದುಕೊಂಡರು. ಹಲವರು ಜೈಲುವಾಸ ಅನುಭವಿಸಿದರು. ರೈತರ ಬದಕು, ಕೃಷಿಕರ ಬದುಕು ಹಸನಾಗಬೇಕು, ಅಂದಾಗಲೆ ಎಲ್ಲರ ಬುದುಕು ಸುಂದರವಾಗಲು ಸಾಧ್ಯ ಎಂದರು.

ಎ.ಎಂ.ಹುಡೇದ, ಬಿ.ಬಿ.ಐನಾಪುರ, ಶಿವಾನಂದ ಮುತವಾಡ, ಚಂದ್ರು ದಂಡಿನ ಇತರರು ಪಾಲ್ಗೊಂಡಿದ್ದರು.