ಗದಗ: ಜಿಲ್ಲೆಯ ಗ್ರಾಮೀಣ ಭಾಗದಲ್ಲಿ ಸದ್ಯ ಗಾಂಜಾ ಗಮ್ಮತ್ತು ಶುರುವಾಗಿದ್ದು, ಒಂದೂವರೆ ತಿಂಗಳಲ್ಲಿ 8 ಕಡೆ ಪೊಲೀಸರು ದಾಳಿ ನಡೆಸಿ ಗಾಂಜಾ ವಾಲಾಗಳನ್ನು ಬಂಧಿಸಿದ್ದಾರೆ.
ನಗರ ಪ್ರದೇಶದಲ್ಲಿ ಡ್ರಗ್ಸ್ ದಂಧೆ ಕುರಿತು ತನಿಖೆ ಆರಂಭವಾಗಿದೆ. ಅನೇಕ ಖ್ಯಾತನಾಮರು ಡ್ರಗ್ಸ್ ದಂಧೆಯಲ್ಲಿ ತೊಡಗಿರುವ ಸಂಗತಿ ಬೆಳೆಕಿಗೆ ಬರುತ್ತಿದ್ದಂತೆಯೇ, ಇತ್ತ ಗ್ರಾಮೀಣ ಭಾಗದಲ್ಲಿ ಗಾಂಜಾ ಪತ್ತೆ ಪ್ರಕರಣಗಳು ನಿಧಾನಕ್ಕೆ ಬೆಳಕಿಗೆ ಬರುತ್ತಿವೆ.
ಗದಗ ಜಿಲ್ಲೆಯ ಪೊಲೀಸರು ಮಾತ್ರವಲ್ಲದೇ ಅಬಕಾರಿ ಇಲಾಖೆ ಅಧಿಕಾರಿಗಳು ಸಹ ಗಾಂಜಾ ಬೆಳೆಯುತ್ತಿರುವ ಪ್ರಕರಣಗಳನ್ನು ಪತ್ತೆ ಹಚ್ಚುವ ಕಾರ್ಯದಲ್ಲಿ ನಿರತರಾಗಿದ್ದಾರೆ. ಇದರಿಂದ ಜಿಲ್ಲೆಯ ವಿವಿಧೆಡೆ ಗಾಂಜಾ ಬೆಳೆಯುತ್ತಿರುವ ಪ್ರಕರಣಗಳು ಪತ್ತೆಯಾಗುತ್ತಿವೆ.
19 ಕೆಜಿಗೂ ಅಧಿಕ ಗಾಂಜಾ ವಶ
ಗದಗ ಜಿಲ್ಲೆಯೊಂದರಲ್ಲೇ ಸೆಪ್ಟೆಂಬರ್ 3ರಿಂದ ಅ.17ರ ವರೆಗೆ ಒಟ್ಟು 8 ದಾಳಿ ನಡೆದಿವೆ. ಸೆ. 3ರಂದು ಬೆಟಗೇರಿ ಪೊಲೀಸರು ನಡೆಸಿದ ಕಾರ್ಯಾಚರಣೆಯಲ್ಲಿ ಗಾಂಜಾ ಮಾರಾಟ ಮಾಡುತ್ತಿದ್ದ ವ್ಯಕ್ತಿಯಿಂದ 1,358 ಗ್ರಾಂ ಗಾಂಜಾ ವಶಪಡಿಸಿಕೊಂಡಿದ್ದಾರೆ.
ಅದೇ ರೀತಿ ಸೆ. 11ರಂದು ಗಜೇಂದ್ರಗಡ ಪೊಲೀಸರು ನಡೆಸಿದ ದಾಳಿಯಲ್ಲಿ 3.5 ಕೆಜಿ ಹಸಿ ಗಾಂಜಾ ವಶಕ್ಕೆ ಪಡೆದಿದ್ದಾರೆ. ಸೆ. 15ರಂದು ಡೋಣಿ ಗ್ರಾಮದ ವ್ಯಾಪ್ತಿಯಲ್ಲಿ 1.2 ಕೆಜಿ, ಸೆ. 17ರಂದು ಲಕ್ಷ್ಮೇಶ್ವರದಲ್ಲಿ 3.9 ಕೆಜಿ, ಅ. 14ರಂದು ಮುಳಗುಂದದಲ್ಲಿ 1.7 ಕೆಜಿ , ಅ. 15ರಂದು ಹಿರೇವಡ್ಡಟ್ಟಿಯಲ್ಲಿ 1.25 ಕೆಜಿ, ಅ. 16ರಂದು ಕೊಟುಮಚಗಿಯಲ್ಲಿ 5 ಕೆಜಿಗೂ ಹೆಚ್ಚು ಹಸಿ ಗಾಂಜಾ ಸಹಿತ ಸುಮಾರು 19 ಕೆಜಿಗೂ ಹೆಚ್ಚು ಗಾಂಜಾ ವಶಪಡಿಸಿಕೊಳ್ಳಲಾಗಿದೆ.
12 ಜನರ ಬಂಧನ
ಗಾಂಜಾ ಅಡ್ಡೆಗಳ ಮೇಲೆ ನಡೆದ ದಾಳಿಗೆ ಸಂಬಂಧಿಸಿದಂತೆ ಈವರೆಗೆ ಒಟ್ಟು 12 ಜನರನ್ನು ಪೊಲೀಸರು ಬಂಧಿಸಿದ್ದಾರೆ. ಅಲ್ಲದೇ ಗಾಂಜಾ ಬೆಳೆಯಲು ಮತ್ತು ಮಾರಾಟಕ್ಕೆ ಬಳಕೆಯಾದ ವಾಹನ, ಮೊಬೈಲ್ಗಳು ಸೇರಿದಂತೆ ಒಟ್ಟು 2.5 ಲಕ್ಷ ರೂ.ಗೂ ಅಧಿಕ ಮೌಲ್ಯದ ವಸ್ತುಗಳನ್ನು ಪೊಲೀಸರು ಜಪ್ತಿ ಮಾಡಿದ್ದಾರೆ.
ಬೆಳೆಗಳ ನಡುವೆ ಗಾಂಜಾ..!
ಜಿಲ್ಲೆಯ ಗಜೇಂದ್ರಗಡ, ಲಕ್ಷ್ಮೇಶ್ವರ, ಮುಂಡರಗಿ, ರೋಣ ಮತ್ತು ಗದಗ ತಾಲೂಕಿನ ಗ್ರಾಮೀಣ ಭಾಗದಲ್ಲಿ ಗಾಂಜಾ ಭಾರಿ ಸದ್ದು ಮಾಡುತ್ತಿದೆ. ಗಾಂಜಾ ಮಾರಾಟದ ಜತೆಗೆ ಗಾಂಜಾ ಬೆಳೆಯುವ ಪ್ರಕರಣಗಳು ಹೆಚ್ಚಾಗಿವೆ. ಗೋವಿನ ಜೋಳ, ಹತ್ತಿ, ತೋಟದ ಮನೆಯಲ್ಲಿ ಗಾಂಜಾ ಬೆಳೆಯುತ್ತಿರುವ ಖಚಿತ ಮಾಹಿತಿ ಆಧರಿಸಿ ಪೊಲೀಸರು ದಾಳಿ ನಡೆಸಿದ್ದಾರೆ.
ಹೂ ಬಿಡುವ ಸಮಯ
ಮಳೆಗಾಲ ಆರಂಭವಾಗುತ್ತಿದ್ದಂತೆ ಗಾಂಜಾ ಗಿಡಗಳನ್ನು ನಾಟಿ ಮಾಡಲಾಗುತ್ತದೆ. ಸೆಪ್ಟೆಂಬರ್ ಅಕ್ಪೋಬರ್ ವೇಳೆಗೆ ಹೂ ಬಿಡುವ ಸಮಯ. ಇನ್ನೇನು ಗಾಂಜಾ ಗಿಡಗಳನ್ನು ಕಿತ್ತು ಮಾರಾಟ ಮಾಡುವ ಹಂತದ ಸಂದರ್ಭದಲ್ಲಿ ಖಚಿತ ಮಾಹಿತಿ ಆಧರಿಸಿ ದಾಳಿ ನಡೆಸಲಾಗಿರುತ್ತದೆ. ಹೀಗಾಗಿ ಈ ಸಮಯದಲ್ಲಿ ಹೆಚ್ಚು ಪ್ರಕರಣಗಳು ಪತ್ತೆಯಾಗುತ್ತವೆ ಎನ್ನುತ್ತಾರೆ ಪೊಲೀಸರು.