ಬಸ್‌ ಮೇಲೆ ಸರಕಾರಿ ನಾಮಫಲಕ

ಮುಂಡರಗಿ : ರಾಜ್ಯದಲ್ಲಿ ಭಾನುವಾರವೇ ಲೋಕಸಭೆ ಚುನಾವಣೆ ನೀತಿ ಸಂಹಿತೆ ಜಾರಿಗೊಂಡಿದೆ. ನಾನಾ ಸರಕಾರಿ ಕಚೇರಿ ಎದುರು ಸರಕಾರದ ಪ್ರಚಾರದ ನಾಮಫಲಕಗಳನ್ನು ಭಾನುವಾರದಿಂದಲೇ ತೆರವುಗೊಳಿಸುವ ಪ್ರಕ್ರಿಯೆ ನಡೆದಿದೆ. ಮುಂಡರಗಿ ಪುರಸಭೆ, ತಹಸೀಲ್ದಾರ ಕಚೇರಿ, ಸಮಾಜ ಕಲ್ಯಾಣ ಇಲಾಖೆ, ಸಿಡಿಪಿಒ ಸೇರಿದಂತೆ ಅನೇಕ ಕಡೆಗೆ ಸರಕಾರದ ಯೋಜನೆಗಳ ಪ್ರಚಾರದ ನಾಮಫಲಕಗಳನ್ನು ತೆರವುಗೊಳಿಸಲಾಗಿದೆ.

ಆದರೆ ಮುಂಡರಗಿ ಕೊಪ್ಪಳ ಸಾರಿಗೆ ಸಂಸ್ಥೆ ಬಸ್‌ಗಳಲ್ಲಿ ಕೈಗಾರಿಕೆಗಳ ಕುರಿತು, ಮುಖ್ಯಮಂತ್ರಿ ಕುಮಾರಸ್ವಾಮಿ, ಉಪಮುಖ್ಯಮಂತ್ರಿ ಡಾ.ಜಿ.ಪರಮೇಶ್ವರ್‌ ಅವರ ಭಾವಚಿತ್ರ ಮತ್ತು ಕೈಗಾರಿಕೆಗಳ ಕ್ಲಸ್ಟರ್‌ ಸ್ಥಾಪನೆ ಮಾಹಿತಿ, ನಿರುದ್ಯೋಗಗಳಿಗೆ ಉದ್ಯೋಗ ನೀಡುವ ಭರವಸೆ ಕುರಿತು ಹಾಕಿದ ಪ್ರಚಾರ ಫಲಕಗಳು ಸೋಮವಾರ ದಿನವೂ ರಾರಾಜಿಸಿದ್ದವು. ಉಳಿದ ಬಸ್‌ಗಳಿಗೆ ಹಾಕಿದ ಫಲಕಗಳು ಮಾಯವಾಗಿವೆ. ಆದರೆ ಈ ಮಾರ್ಗದಲ್ಲಿ ಸಂಚರಿಸುವ ಬಸ್‌ಗಳಲ್ಲಿ ಫಲಕ ಹಾಗೆ ಇವೆ. ನೀತಿ ಸಂಹಿತೆ ಸಾರಿಗೆ ಸಂಸ್ಥೆಗೆ ಅನ್ವಯವಾಗುವುದಿಲ್ಲವೆ ಎಂದು ಸಾರ್ವಜನಿಕರು ಚರ್ಚೆಯಲ್ಲಿ ತೊಡಗಿದ್ದರು.