ಸೈನಿಕರಿಗೆ ನಮನ ಸಲ್ಲಿಸುವುದು ಎಲ್ಲರ ಕರ್ತವ್ಯ

ಗಜೇಂದ್ರಗಡ : ಕಾರ್ಗಿಲ್‌ ವಿಜಯೋತ್ಸವ ಹಿಂದೆ ಸೈನಿಕರ ತ್ಯಾಗ, ಬಲಿದಾನ ಅಡಗಿದೆ. ಹುತಾತ್ಮ ಯೋಧರ ದೇಶಪ್ರೇಮ ಎಲ್ಲರಿಗೂ ಮಾದರಿ ಎಂದು ಗಜೇಂದ್ರಗಡ ಮಾಜಿ ಸೈನಿಕರ ಸಂಘ ಅಧ್ಯಕ್ಷ ಎಸ್‌.ಆರ್‌. ರಾಮಜಿ ಹೇಳಿದರು. ಸ್ಥಳೀಯ ಮೈಸೂರಮಠದಲ್ಲಿ ಕನ್ನಡ ಸಾಹಿತ್ಯ ಪರಿಷತ್‌ನಿಂದ 159ನೇ ವಾರದ ಸಾಹಿತ್ಯ ಚಿಂತನಾಗೊಷ್ಠಿಯಲ್ಲಿ ಮಾತನಾಡಿದರು.

ಕಾರ್ಗಿಲ್‌ ಯುದ್ಧ ದೇಶದ ಪ್ರತಿ ನಾಗರಿಕರೂ ಹೆಮ್ಮೆ. ಶತ್ರು ರಾಷ್ಟ್ರಗಳ ವಿರುದ್ಧ ಹೋರಾಡಿ ದಿಗ್ವಿಜಯ ಸಾಧಿಸಿದ ಕ್ಷ ಣವನ್ನು ಪ್ರತಿವರ್ಷ ಸಂಭ್ರಮದಿಂದ ಮತ್ತು ಯುದ್ಧದಲ್ಲಿ ಮಡಿದ ಸೈನಿಕರಿಗೆ ನಮನ ಸಲ್ಲಿಸುವುದು ಪ್ರತಿಯೊಬ್ಬ ನಾಗರಿಕರ ಕರ್ತವ್ಯ ಎಂದರು.

ಕಾರ್ಗಿಲ್‌ ಯುದ್ಧ 1999 ಮೇ ನಲ್ಲಿ ಆರಂಭವಾಗಿ ಎರಡು ತಿಂಗಳ ಕಾಲ ನಡೆಯಿತು. ಲೇಹ್‌ ಹೆದ್ದಾರಿವರೆಗೆ ಅಕ್ರಮಿಸಿಕೊಂಡಿದ್ದ ಪಾಕ್‌ ಸೇನೆಯನ್ನು ಹಿಮ್ಮೆಟ್ಟಿಸುವಲ್ಲಿ ಭಾರತೀಯ ಸೇನೆ ಯಶಸ್ವಿಯಾಯಿತು. ಸೇನೆಯ ಅಧಿಕಾರಿಗಳು ಸೇರಿದಂತೆ 527 ಭಾರತೀಯ ಯೋಧರು ಹುತಾತ್ಮರಾದರು.ಪಾಕಿಸ್ತಾನಕ್ಕೆ ತಕ್ಕ ಪ್ರತ್ಯುತ್ತರ ನೀಡಿದ ಸೇನೆ ಜು. 26 ರಂದು ಆಪರೇಷನ್‌ ವಿಜಯ ಯಶಸ್ವಿ ಎಂದು ಘೋಶಿಸಿತು. ಅಂದಿನಿಂದ ಕಾರ್ಗಿಲ್‌ ವಿಜಯೋತ್ಸವ ಆಚರಿಸಲಾಗುತ್ತದೆ. ಎಷ್ಟೋ ಜನರು ವಿಕಲಚೇತನರಾಗಿದ್ದಾರೆ, ವಿಧವೆಯರಾಗಿದ್ದಾರೆ ಎಂದರು.

ಕಸಾಪ ಮಹಿಳಾ ಘಟಕ ಅಧ್ಯಕ್ಷೆ ಶರಣಮ್ಮಾ ಅಂಗಡಿ ಮಾತನಾಡಿ, ಕಾರ್ಗಿಲ್‌ ಯುದ್ಧದಲ್ಲಿ ಮಡಿದಂತಹ ಯೋಧರ ಕುಟುಂಬಗಳಿಗೆ ನೆರವಾಗುವುದು ಎಲ್ಲರ ಕರ್ತವ್ಯ. ಹುತಾತ್ಮ ಯೋಧರ ತಾಯಂದಿರು, ಕುಟುಂಬದ ಕಣ್ಣೀರು ಒರೆಸುವ ಕಾರ್ಯ ಎಲ್ಲರೂ ಮಾಡಬೇಕು ಎಂದರು.

ಮಾಜಿ ಯೋಧರಾದ ಎಸ್‌.ಎಸ್‌. ಆಚನೂರ, ಎಂ.ಎನ್‌. ವೈದ್ಯ, ಎಸ್‌.ಬಿ. ಮಾರನಬಸರಿ, ಬಿ.ಎನ್‌. ಗುಡ್ಡದ, ವಿ.ಬಿ. ಕುಂಬಿ, ಬಿ.ಎಚ್‌. ಕುರಿ, ಎಸ್‌.ಪಿ. ಕುರುಬನಾಳ, ಎಲ್‌.ಬಿ. ದುಮ್ಮಾಳ, ನಾಗರಾಜ ಗೋಡಿನಾಳ, ರಾಘವೇಂದ್ರ ಶಿಂಗಾರಿಪುರ ಎಂ.ಎಸ್‌. ಮಕಾನದಾರ, ಹುಚ್ಚಪ್ಪ ಹವೇರಿ ಇನ್ನಿತರು ಉಪಸ್ಥಿತರಿದ್ದರು.