ಆ್ಯಪ್ನಗರ

ನರಗುಂದದಲ್ಲಿ ಮೂರು ಕಡೆ ಭೂ ಕುಸಿತ

ನರಗುಂದ : ತಾಲೂಕಿನಲ್ಲಿ ಒಂದು ಕಡೆ ಪ್ರವಾಹ ಆವರಿಸಿ ಆತಂಕ ಸೃಷ್ಟಿಸಿದ್ದರೆ ಇನ್ನೊಂದು ಕಡೆ ಭೂ ಕುಸಿತ ಘಟನೆ ಜನರಲ್ಲಿ ಭೀತಿ ಹುಟ್ಟಿಸಿದ್ದು ಅರ್ಭಾಣ, ಕಸಬಾ ಗ್ರಾಮದ ಮೂರು ಸ್ಥಳದಲ್ಲಿ ಭೂ ಕುಸಿತವಾಗಿದೆ.

Vijaya Karnataka 13 Aug 2019, 5:00 am
ನರಗುಂದ : ತಾಲೂಕಿನಲ್ಲಿ ಒಂದು ಕಡೆ ಪ್ರವಾಹ ಆವರಿಸಿ ಆತಂಕ ಸೃಷ್ಟಿಸಿದ್ದರೆ ಇನ್ನೊಂದು ಕಡೆ ಭೂ ಕುಸಿತ ಘಟನೆ ಜನರಲ್ಲಿ ಭೀತಿ ಹುಟ್ಟಿಸಿದ್ದು ಅರ್ಭಾಣ, ಕಸಬಾ ಗ್ರಾಮದ ಮೂರು ಸ್ಥಳದಲ್ಲಿ ಭೂ ಕುಸಿತವಾಗಿದೆ.
Vijaya Karnataka Web GDG-12NRD1


ಕಳೆದ ಶನಿವಾರ ಬೆಳಗಿನ ಜಾವ ನಗರದ ಅರ್ಭಾಣ ಗ್ರಾಮದ ಬಸವರಾಜ ಹಲಗತ್ತಿ ಅವರ ಮನೆ ಹಿತ್ತಲದಲ್ಲಿ, ಬಸವರಾಜ ಮುದೇನಗುದಿ ಅವರ ಮನೆ ಪಕ್ಕ ಹಾಗೂ ಇಲ್ಲಿಂದ ಐವತ್ತು ಮೀಟರ್‌ ಅಂತರದಲ್ಲಿರುವ ಈಶ್ವರಗೌಡ ಪಾಟಿಲ ಅವರ ಅಡುಗೆ ಮನೆಯಲ್ಲಿ ಭೂ ಕುಸಿತ ಘಟನೆ ನಡೆದಿರುವುದು ಜನರಲ್ಲಿ ಆತಂಕ ಮೂಡಿಸಿದೆ.

ಭಾರಿ ಭೂ ಕುಸಿತ: ಬಸವರಾಜ ಹಲಗತ್ತಿ ಅವರ ಹಿತ್ತಲದಲ್ಲಿ ಐದು ಅಡಿ ಅಗಲ, 30 ಅಡಿಗೂ ಹೆಚ್ಚು ಆಳದಲ್ಲಿ ಭೂಮಿ ಕುಸಿದಿದೆ. ಕೇವಲ ಐದು ಅಡಿ ಅಂತರದಲ್ಲಿ ನೀರು ತುಂಬಿಕೊಂಡಿತ್ತು. ಇದನ್ನು ತಿಳಿದ ಪುರಸಭೆ ಅಧಿಕಾರಿಗಳು ಶನಿವಾರದಿಂದ ಕುಸಿದ ಭೂಮಿಗೆ ಮಣ್ಣು ಹಾಕುತ್ತಿದ್ದು ಶುಕ್ರವಾರವೂ ಮುಂದುವರೆದಿತ್ತು. ಎಂಟು ಟ್ರ್ಯಾಕ್ಟರ್‌ ಮಣ್ಣು ಹಾಕಿ ಬಿದರಿನಿಂದ ಆಳ ಹುಡುಕುವ ಪ್ರಯತ್ನ ಮಾಡಿ ವಿಫಲರಾದರು. ಸುಮಾರು ಇಪ್ಪುತ್ತು ಟ್ರ್ಯಾಕ್ಟರ್‌ ಮಣ್ಣು ಹಾಕಿದರೂ ಕಂದಕ ತುಂಬದಿರುವುದು ಜನರಲ್ಲಿ ಆಶ್ಚರ್ಯ ಮುಡಿಸಿದೆ. ಸೋಮವಾರ ಪಕ್ಕದ ಮುದೇನಗುಡಿ ಅವರ ಮನೆಗೆ ಹೊಂದಿಕೊಂಡು ಮುಳ್ಳು ಕಂಟಿಗಳ ಮಧ್ಯ ಕುಸಿದ ಕಂದಕಕ್ಕೆ ಮಣ್ಣು ಹಾಕಿ ಮುಚ್ಚುವಲ್ಲಿ ಪುರಸಭೆ ಸಿಬ್ಬಂದಿ ಮುಂದಾಗಿದ್ದಾರೆ.

ಅಡುಗೆ ಮನೆಯಲ್ಲಿ ಕುಸಿತ: ಗ್ರಾಮ ದೇವಿ ಗುಡಿ ಪಕ್ಕದ ಈಶ್ವರಗೌಡ ಪಾಟೀಲ ಅವರ ಅಡುಗೆ ಮನೆಯಲ್ಲಿ ಭೂಮಿ ಕುಸಿದಿದೆ. ರಾತ್ರಿ ಊಟ ಮಾಡಿ ಮಲಗಿದ್ದಾರೆ, ಬೆಳಗ್ಗೆ ಎದ್ದು ಅಡುಗೆ ಮನೆ ಮೂಲೆಯಲ್ಲಿ ನೆಲ ಪಾಟಿಗಲ್ಲು ಕುಸಿದಿದ್ದನ್ನು ಗಮನಿಸಿದ ಈಶ್ವರಗೌಡ ಕುಸಿದ ಪಾಟಿಗಲ್ಲು ಬಡಿದಿದ್ದಾರೆ. ಆಗ 10 ಅಡಿ ಆಳದಲ್ಲಿ ಭೂ ಕುಸಿತಗೊಳ್ಳುತ್ತಿದ್ದಂತೆ ಭಯದಿಂದ ಹೊರಗೆ ಬಂದಿದ್ದಾರೆ. ನಂತರ ಪುರಸಭೆ ಅಧಿಕಾರಿಗಳ ಗಮನಕ್ಕೆ ತಂದು ಮಣ್ಣು ಹಾಕಿ ಮುಚ್ಚಿದ್ದು ಭೂ ಕುಸಿತಗೊಂಡ ಮನೆಯಲ್ಲಿ ವಾಸಗಿರುವ ಕುಟುಂಬ ಆತಂಕದಲ್ಲಿ ಮುಳುಗಿದೆ.

ಭೂ ಕುಸಿತಕ್ಕೆ ಹತ್ತು ವರ್ಷ:
2009ರಲ್ಲಿ ಒಂದು ಕಡೆ ಮಲಪ್ರಭಾ ನದಿ, ಬೆಣ್ಣೆ ಹಳ್ಳ ಉಕ್ಕಿ ಹರಿದು ಹಲವು ಗ್ರಾಮಗಳು ಮುಳುಗಡೆಯಾಗಿದ್ದರಿಂದ ನರಗುಂದದಲ್ಲಿ ಭಾರಿ ಮಳೆ ಅಂತರ್ಜಲ ಹೆಚ್ಚಳದಿಂದ ಭೂ ಕುಸಿತದಿಂದ ಮನೆಗಳು ನೆಲಕ್ಕಪ್ಪಳಿಸಿದ್ದವು. ಪ್ರತಿ ಮಳೆಗಾಲದಲ್ಲೂ ಭೂ ಕುಸಿತಗಳು ಘಟನೆಗಳು ನಡೆಯುತ್ತಲೆ ಇವೆ. ಭೂಮಿಯಲ್ಲಿ ಅಂತರ್ಜಲ ಹರಿವು ಹೆಚ್ಚಾಗಿದ್ದರಿಂದ ಭೂ ಕುಸಿತಕ್ಕೆ ಕಾರಣ ಎನ್ನಲಾಗುತ್ತಿದೆ.

ತಜ್ಞರಿಗೂ ಸಿಗದ ಉತ್ತರ:
ಭೂಕುಸಿತಗೊಂಡ ಜಾಗದಲ್ಲಿ ಭಾರಿ ನೀರು ತುಂಕೊಂಡಿರುವುದು ಬೆಳಕಿಗೆ ಬಂದಿದೆ. 5 ಅಡಿ ಆಳದಲ್ಲಿ ನೀರು ತುಂಬಿಕೊಂಡಿರುವುದನ್ನು ನೋಡಿದರೆ ಕಸಬಾ, ಅರ್ಭಾಣ, ಹಗೇದಕಟ್ಟಿ ಓಣಿಗಳ ಸುತ್ತಮುತ್ತ ಅಂತರ್ಜಲ ಹೆಚ್ಚಳವೇ ಕಾರಣ. ಆದರೆ ಇಷ್ಟೊಂದು ಮೇಲ್ಮಟ್ಟದಲ್ಲಿ ಅಂತರ್ಜಲ ಹೆಚ್ಚಳಕ್ಕೆ ಕಾರಣ ಏನು? ಎಲ್ಲಿಂದ ನೀರು ಹರಿದು ಬರುತ್ತದೆ ಎಂಬುದಕ್ಕೆ ಈ ವರೆಗೆ ಯಾವುದೆ ಪುರಾವೆ ಸಿಕ್ಕಿಲ್ಲ. ಭೂ ಕುಸಿತಕ್ಕೆ ಕಾರಣ ಏನು? ಇದಕ್ಕೆ ಪರಿಹಾರ ಕ್ರಮಗಳೇನು? ಎಂಬುದರ ಬಗ್ಗೆ ತಾಲೂಕು ಆಡಳಿತ, ಭೂಗರ್ಭ ತಜ್ಞರು ಗಮನ ಹರಿಸದಿರುವುದು ಭೂ ಕುಸಿತ ಪ್ರದೇಶ ಜನರಲ್ಲಿ ಆಕ್ರೋಶಕ್ಕೆ ಕಾರಣವಾಗಿದೆ.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ