ಕಾನೂನು ಬಾಹಿರ ಆಸ್ತಿ ಲೀಜ್‌: ಆರೋಪ

ಮುಂಡರಗಿ: ವಕ್ಫ್ ಬೋರ್ಡ್‌ ವ್ಯಾಪ್ತಿಯಲ್ಲಿರುವ ಇಲ್ಲಿನ ಅಂಜುಮನ್‌ ಇಸ್ಲಾಂ ಎ ಕಮೀಟಿಯ ಆಸ್ತಿಯನ್ನು ಪರಭಾರೆ ಮತ್ತು ಲೀಜ್‌ ಕೊಡಲು ಅವಕಾಶ ಇರುವುದಿಲ್ಲ. ಹೀಗಿದ್ದಾಗಲೂ ಅಂಜುಮನ್‌ ಎಜುಕೇಶನ್‌ ಟ್ರಸ್ಟ್‌ಗೆ 30 ವರ್ಷ ಲೀಜ್‌ ನೀಡಿದ್ದು ಕಾನೂನು ಬಾಹಿರ ಎಂದು ಇಸ್ಲಾಂ ಸಮಾಜದ ಹಿರಿಯ ಎಂ.ಜಿ.ವಡ್ಡಟ್ಟಿ ಸೇರಿದಂತೆ ಇತರರು ಆರೋಪಿಸಿದ್ದಾರೆ.

ಈ ಕುರಿತು ಗುರುವಾರ ಸಂಜೆ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಅಂಜುಮನ್‌ ಕಮೀಟಿ ಅಧ್ಯಕ್ಷ ರು ಸ್ವಹಿತಾಸಕ್ತಿಯಿಂದ ದುರುಪಯೋಗ ಪಡಿಸಿಕೊಂಡಿದ್ದಾರೆ. ಇದು ಅಪರಾಧವಾಗುತ್ತದೆ ಎಂದಿರುವ ಅವರು ಅಂಜುಮನ್‌ ಇಸ್ಲಾಂ ಆಸ್ತಿಯಲ್ಲಿ ಶಾಲೆ ಮಾಡಿ ಇದು ಕಮೀಟಿಯದೇ ಎಂದು ಸಮಾಜಕ್ಕೆ ತಪ್ಪು ಕಲ್ಪನೆ ಮೂಡಿಸಿದ್ದಾರೆ. ಹೀಗಾಗಿ ಕಮೀಟಿ ಅಧ್ಯಕ್ಷ ರು, ಇತರ ಪದಾಧಿಕಾರಿಗಳು ಸ್ವಯಂಪ್ರೇರಣೆಯಿಂದ ರಾಜೀನಾಮೆ ನೀಡಬೇಕು. ಇಲ್ಲದಿದ್ದರೆ ಜಿಲ್ಲಾ ವಕ್ಫ್ ಕಮೀಟಿ ಗಮನಕ್ಕೆ ತಂದು ಇಸ್ಲಾಂ ಸಮಾಜದವರು ಪ್ರತಿಭಟನೆ ಮಾಡಬೇಕಾಗುತ್ತದೆ ಎಂದು ಎಚ್ಚರಿಸಿದ್ದಾರೆ.

ಈ ಸಂದರ್ಭದಲ್ಲಿ ಇಸ್ಲಾಂ ಸಮಾಜದ ಹಿರಿಯರಾದ ಖಾದರಸಾಬ ವಡ್ಡಟ್ಟಿ, ಆರ್‌.ಎಂ.ಸೈದರ್‌, ಮರ್ದಾನಸಾಬ ತಳಗಡೆ, ಮೋದಿನಸಾಬ ಡಂಬಳ, ಎ.ಪಿ.ದಂಡಿನ, ಲಾಡಸಾಬ ಕಾತರಕಿ, ಡಿ.ಎಂ.ಕಾತರಕಿ, ಇಮ್ತಿಯಾಜ್‌ ಇತರರು ಉಪಸ್ಥಿತರಿದ್ದರು.