ಸಾವಿನ ಮನೆಗೆ ಬಂದು ಹೆಗಲಿಗೆ ಒರಗಿಸಿಕೊಂಡು ಸಾಂತ್ವನ ಹೇಳುವ ಕಪಿ!

ಗದಗ: ಸತ್ತರೆ ಸಂಬಂಧಿಕರೇ ಬರಲು ಹಿಂದೆ ಮುಂದೆ ನೋಡುವ ಕಾಲವಿದು. ಆದರೆ ಮೂಕ ಪ್ರಾಣಿ ಮಂಗವೊಂದು ಊರಲ್ಲಿ ಯಾರಾದರು ಸತ್ತರೆ ಅಂತವರ ಮನೆಗೆ ಹೋಗಿ ಸಾಂತ್ವನ ಹೇಳುತ್ತಿರುವ ಹೃದಯಸ್ಪರ್ಶಿ ದೃಶ್ಯ ಇತ್ತೀಚಿನ ಕೆಲ ದಿನಗಳಿಂದ ಗದಗದಲ್ಲಿ ಕಂಡು ಬರುತ್ತಿದೆ.


ನರಗುಂದ ಪಟ್ಟಣದಲ್ಲಿ ಇತ್ತೀಚಿಗೆ ದೇವೇಂದ್ರಪ್ಪ ಕಮ್ಮಾರ್ (80) ಎಂಬುವವರು ಸಾವನ್ನಪ್ಪಿದ್ದವು. ಅವರ ಪರಿವಾರ ಶೋಕದಲ್ಲಿ ಮುಳುಗಿದ್ದ ಸಂದರ್ಭದಲ್ಲಿ ಕಪಿಯೊಂದು ಅವರನ್ನು ಸೇರಿಕೊಂಡಿದೆ. ಶವದ ಮುಂದೆ ಅಳುತ್ತಿದ್ದ ಮಹಿಳೆಯೊಬ್ಬರ ತಲೆ ಮುಟ್ಟಿದ ಕಪಿ ಬಳಿಕ ಹೆಗಲಿಗೆ ಕೈ ಹಾಕಿ ನಿಧಾನಕ್ಕೆ ತನ್ನ ಹೆಗಲ ಮೇಲೆ ಅವರ ತಲೆಯನ್ನು ಒರಗಿಸಿ ಕೊಂಡು ಸಾಂತ್ವನ ಹೇಳಿದೆ.

ಬಳಿಕ ಸ್ವಲ್ಪ ಹೊತ್ತು ಶವದ ಮುಂದೆ ಕುಳಿತು ತಾನು ಕೂಡ ಶೋಕಾಚರಣೆ ಮಾಡಿ, ಯಾರಿಗೂ ತೊಂದರೆ ನೀಡದೆ ಅಲ್ಲಿಂದ ಮರಳಿದೆ.

ಕಪಿಗೆ ಜನರು ಜೋರಾಗಿ ಕೂಗುತ್ತ ಗೋಳಾಡುತ್ತಿರುವುದು ಕಾಣಿಸಿದೆ. ಏನಾಗಿದೆ ಎಂದು ನೋಡಲು ಅಲ್ಲಿಗೆ ಬಂದ ಮಂಗ ಇತರರನ್ನು ಅನುಕರಿಸುತ್ತ ತಾನು ಕೂಡ ನೊಂದವರಿಗೆ ಸಮಾಧಾನ ಮಾಡಿದೆ, ಎಂದು ಸ್ಥಳೀಯ ನಿವಾಸಿ ಪರಮೇಶ್ವರ್ ನಾಯಕ್ ತಿಳಿಸಿದ್ದಾರೆ.

ಈ ಹಿಂದೆ ಕೂಡ ಈ ಮಂಗ ಮೃತರೊಬ್ಬರ ಮನೆಗೆ ಹೋಗಿ , ಮನೆಯ ಹಿರಿಯ ಮಗನ ತಲೆ ಸವರಿ ಸಮಾಧಾನ ಮಾಡಿತ್ತು. ಊರಲ್ಲಿ ಯಾರೇ ಮೃತಪಟ್ಟರೂ ಮಂಗ ಅಲ್ಲಿಗೆ ಹಾಜರಾಗಿ ಸಾಂತ್ವನ ಹೇಳುವುದು ಸಾಮಾನ್ಯವಾಗಿದೆ ಎಂದು ಸ್ಥಳೀಯರು ಹೇಳಿದ್ದಾರೆ. ಈ ವೀಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಫುಲ್ ವೈರಲ್ ಆಗಿದೆ.