ಉಕ್ಕಿಹರಿಯುತ್ತಿರುವ ಮಲಪ್ರಭೆ

ಹೊಳೆಆಲೂರ: ನವಿಲು ತೀರ್ಥ ಜಲಾಶಯದಿಂದ ಹೆಚ್ಚುವರಿ ನೀರು ಹರಿಬಿಟ್ಟ ಕಾರಣ ಮಲಪ್ರಭಾ ನದಿ ಉಕ್ಕಿ ಹರಿಯುತ್ತಿದೆ. ಪ್ರವಾಹದ ಆತಂಕದಲ್ಲಿಸಂತ್ರಸ್ತರಿದ್ದಾರೆ. ಭಾನುವಾರ ನದಿಯು ಸಂಪೂರ್ಣ ತುಂಬಿ ಈಗಲೋ ಆಗಲೋ ಗ್ರಾಮಗಳಿಗೆ ನೀರು ನುಗ್ಗುವ ಸಾಧ್ಯತೆ ಇದೆ.

ಇಷ್ಟೆಲ್ಲಬೆಳವಣಿಗೆ ನಡುವೆ ತಾಲೂಕು ಹಾಗೂ ಜಿಲ್ಲಾಡಳಿತ, ಕಂದಾಯ ಇಲಾಖೆಯ ಆಧಿಕಾರಿಗಳು ಹೋದ ತಿಂಗಳು 8 ರಂದು ನೆರೆ ಬಂದಾಗ ಓಡಾಡಿದಷ್ಟು ಈ ಬಾರಿ ಯಾರೂ ಕಾಣ ಸಿಗುತ್ತಿಲ್ಲಎಂಬ ಆರೋಪ ಕೇಳಿಬರುತ್ತಿದೆ.

ಶನಿವಾರ ಹೊಳೆಆಲೂರು ಬದಾಮಿಗೆ ಹೋಗುವ ರಸ್ತೆಯ ಮೇಲೆ ಸ್ವಲ್ಪವೇ ನೀರು ಇತ್ತು. ಭಾನುವಾರ ಬೆಳಗಾಗುವಷ್ಟರಲ್ಲಿಸಣ್ಣ ಸೇತುವೆ ಮೇಲೆ ನಾಲೈ್ಕದು ಅಡಿ ನೀರು ಹೆಚ್ಚಾಗಿದ್ದರಿಂದ ಸಂಚಾರ ಸ್ಥಗಿತವಾಗಿದೆ. ಪ್ರತಿನಿತ್ಯ ಬದಾಮಿ ತಾಲೂಕಿನ ನೀರಲಗಿ, ತಮಿನಾಳ, ಕಾತರಕಿ, ಹೆಬ್ಬಳ್ಳಿ, ಮುಮರಡ್ಡಿ ಕೊಪ್ಪ, ಬೂದಿಹಾಳ, ಖ್ಯಾಡ ಸೇರಿದಂತೆ ಮುಂತಾದ ಹಳ್ಳಿಗಳ ಜನರು ತಮ್ಮ ಅವಶ್ಯಕತೆ ಹಾಗೂ ವ್ಯಾಪಾರಕ್ಕೆ ಹೊಳೆಆಲೂರಿನ ಮಾರುಕಟ್ಟೆಯನ್ನು ಆಶ್ರಯಿಸಿದ್ದರು. ಸೇತುವೆ ಮುಳಗಡೆಯಾಗುವುದರೊಂದಿಗೆ ಈ ಗ್ರಾಮಗಳಿಗೂ ನೀರು ನುಗ್ಗುವ ಸಂಭವವಿದ್ದು ಹೊಳೆಆಲೂರ ಕಡೆಗೆ ಹೋಗದಂತಹ ಸಂಕಷ್ಟ ಎದುರಾಗಿದೆ.

ಮಲಪ್ರಭಾ ನದಿ ದಂಡೆ ಮೇಲೆ ಇರುವ ಗ್ರಾಮಗಳಾದ ಹೊಳೆಆಲೂರು, ಅಮರಗೋಳ, ಹೊಳೆಹಡಗಲಿ, ಬಸರಕೋಡ, ಬಿ.ಎಸ್‌. ಬೇಲೇರಿ ಗ್ರಾಮಗಳ ಪಕ್ಕದಲ್ಲಿರು ರಸ್ತೆಯನ್ನು ಮಲಪ್ರಭಾ ನದಿ ನಿಧಾನವಾಗಿ ಆಕ್ರಮಿಸುತ್ತಿದೆ. ಅಲ್ಲದೆ ರೈತರು ಹೊಳೆಯಲ್ಲಿನಿರ್ಮಿಸಿಕೊಂಡಿರುವ ಪಂಪ್‌ ಹೌಸ್‌ಗಳು ಈಗಾಗಲೇ ಮುಳುಗಿವೆ.

ಪ್ರವಾಹ ಕಡಿಮೆಯಾದ ಕೆಲವು ದಿನಗಳಲ್ಲಿಮರಳಿ ತಮ್ಮ ಗ್ರಾಮಗಳಲ್ಲಿವಾಸವಿದ್ದ ಸಂತ್ರಸ್ತರು 2 ದಿನಗಳಿಂದ ನದಿಯಲ್ಲಿನ ನೀರಿನ ಪ್ರಮಾಣ ಕ್ಷಣ ಕ್ಷಣಕ್ಕೂ ಹೆಚ್ಚಾಗುತ್ತಿದ್ದರಿಂದ ಈಗ ಮತ್ತೆ ತಮ್ಮ ಅವಶ್ಯಕ ವಸ್ತುಗಳನ್ನು ಕಟ್ಟಿಕೊಂಡು ನವಗ್ರಾಮಕ್ಕೆ ತೆರಳುತ್ತಿದ್ದಾರೆ.

ನೆರೆ ಪ್ರಮಾಣ ವೀಕ್ಷಿಸಲು ಜನ ತಂಡೋಪ ತಂಡವಾಗಿ ರೈಲ್ವೆ ಸೇತುವೆ ಹಾಗೂ ಬದಾಮಿ ಸಣ್ಣ ಸೇತುವೆ ಕಡೆ ನಿರಂತರ ಜಮಾಯಿಸುತ್ತಿದ್ದಾರೆ.