ಜಿಮ್ಸ್‌ ಹೊರಗುತ್ತಿಗೆ ಸಿಬ್ಬಂದಿ ವೇತನ ಪಾವತಿಸಿ

ಗದಗ: ಹೊರಗುತ್ತಿಗೆ ಆಧಾರದಲ್ಲಿನೇಮಕವಾಗಿರುವ 402 ಜನ ಜಿಮ್ಸ್‌ ಸಿಬ್ಬಂದಿಗೆ ತಕ್ಷಣ ವೇತನ ಪಾವತಿಸಿ. ವೇತನ ನೀಡುವುದು ವಿಳಂಬವಾದರೆ ಗುತ್ತಿಗೆ ಕಂಪನಿ ಠೇವಣಿ ಮುಟ್ಟುಗೋಲು ಹಾಕಿ, ಕಪ್ಪು ಪಟ್ಟಿಗೆ ಸೇರಿಸಿ ಎಂದು ಗಣಿ ಮತ್ತು ಭೂವಿಜ್ಞಾನ ಇಲಾಖೆ ಸಚಿವ ಸಿ.ಸಿ. ಪಾಟೀಲ ಸೂಚನೆ ನೀಡಿದರು.

ಸೋಮವಾರ ಜಿಪಂ ಸಭಾಂಗಣದಲ್ಲಿನಡೆದ ಅಧಿಕಾರಿಗಳ ಸಭೆಯಲ್ಲಿಮಾತನಾಡಿದ ಅವರು, ಕೋವಿಡ್‌ -19 ಸೋಂಕು ನಿಯಂತ್ರಣ ಸಂಕಷ್ಟ ಪರಿಸ್ಥಿತಿಯಲ್ಲಿವೈದ್ಯಕೀಯ ಸಿಬ್ಬಂದಿಗೆ ಯಾವುದೇ ಕಾರಣಕ್ಕೂ ವಿಳಂಬವಾಗಬಾರದು. ಈ ಕುರಿತು ಜಿಲ್ಲಾಧಿಕಾರಿ ತಕ್ಷಣ ಕ್ರಮ ವಹಿಸುವಂತೆ ಸೂಚನೆ ನೀಡಿದರು.

ಜಿಮ್ಸ್‌ ನಿರ್ದೇಶಕ ಡಾ.ಪಿ.ಎಸ್‌. ಭೂಸರಡ್ಡಿ ಮಾತನಾಡಿ, 2020ರ ಜನವರಿಯಲ್ಲಿ289 ಸಿಬ್ಬಂದಿ ಪೈಕಿ 277 ಸಿಬ್ಬಂದಿಗೆ ವೇತನ ಪಾವತಿಯಾಗಿದೆ. ಫೆಬ್ರವರಿಯಲ್ಲಿ290ರ ಪೈಕಿ 276 ಜನರಿಗೆ ಹಾಗೂ ಮಾರ್ಚ್ನಲ್ಲಿ296 ಜನರ ಪೈಕಿ 275 ಜನರಿಗೆ ವೇತನ ಪಾವತಿಯಾಗಿದೆ. 47 ಜನ ಸಿಬ್ಬಂದಿ ವೇತನ ಪಾವತಿಯಾಗಿಲ್ಲ. ಇದಲ್ಲದೇ 104 ಜನ ಸಿಬ್ಬಂದಿ ದಾಖಲೆ ನೀಡದಿರುವ ಕಾರಣ ವೇತನ ಬಾಕಿ ಉಳಿದಿದೆ. ಸಿಬ್ಬಂದಿ ಒದಗಿಸುವ ಗುತ್ತಿಗೆ ಸಂಸ್ಥೆಗೆ ಸಂಬಳ ಬಾಕಿ ಇರುವ ಪ್ರಕರಣಗಳಿಗೆ ಈಗಾಗಲೇ ಮೂರು ಬಾರಿ ಕಾರಣ ಕೇಳುವ ನೋಟಿಸ್‌ ನೀಡಲಾಗಿದೆ ಎಂದು ಜಿಮ್ಸ ನಿರ್ದೇಶಕರು ವಿವರಣೆ ನೀಡಿದರು.

ಜಿಲ್ಲಾಧಿಕಾರಿ ಎಂ.ಜಿ. ಹಿರೇಮಠ, ಜಿಪಂ ಸಿಇಒ ಡಾ.ಆನಂದ ಕೆ., ಜಿಲ್ಲಾಪೊಲೀಸ್‌ ವರಿಷ್ಠಾಧಿಕಾರಿ ಯತೀಶ ಎನ್‌., ಉಪವಿಭಾಗಾಧಿಕಾರಿ ರಾಯಪ್ಪ ಹುಣಸಗಿ ಇತರರು ಉಪಸ್ಥಿತರಿದ್ದರು.