ಗುಣಮಟ್ಟದ ಕಾಮಗಾರಿಗೆ ಆದ್ಯತೆ ನೀಡಿ ; ಶಾಸಕ ಲಮಾಣಿ

ಮುಂಡರಗಿ: ಬಹು ವರ್ಷಗಳ ಜನರ ಬೇಡಿಕೆ ಮತ್ತು ಅಗತ್ಯವಾದ ಸಿಸಿ ರಸ್ತೆಯಿಂದ ಸುಗಮ ಸಂಚಾರಕ್ಕೆ ಅನುಕೂಲವಾಗಲಿದೆ. ಗುಣಮಟ್ಟದ ರಸ್ತೆ ನಿರ್ಮಾಣಕ್ಕೆ ಆದ್ಯತೆ ನೀಡಬೇಕು ಎಂದು ಶಿರಹಟ್ಟಿ ಶಾಸಕ ರಾಮಣ್ಣ ಲಮಾಣಿ ಹೇಳಿದರು.

ತಾಲೂಕಿನ ಕೊರ್ಲಹಳ್ಳಿ ಬಳಿಯ ಮದ್ಲಗಟ್ಟೆ ಸೇತುವ ಹತ್ತಿರದ 1 ಕೋಟಿ ಸಿಸಿ ರಸ್ತೆ ಕಾಮಗಾರಿಗೆ ಚಾಲನೆ ನೀಡಿ ಮಾತನಾಡಿದರು.

ಕೊರ್ಲಹಳ್ಳಿ ಹಮ್ಮಿಗಿ ಪ್ರಮುಖ ರಸ್ತೆಯಾಗಿದ್ದು, ಈ ಭಾಗ ಸಿಂಗಟಾಲೂರು ಇತರ ಗ್ರಾಮಗಳನ್ನು ಸಂಪರ್ಕ ಮಾಡುತ್ತದೆ. ಮಳೆ ಬಂದರೆ ತುಂಗಭದ್ರ ನದಿ ನೀರು (ಮದ್ಲಗಟ್ಟಿ) ನಿಂತು ಈ ಭಾಗದ ರಸ್ತೆ ಸ್ಥಗಿತಗೊಂಡು ಸಾಕಷ್ಟು ತೊಂದರೆ ಅನುಭವಿಸಬೇಕಾಗುತ್ತಿದೆ. ಇದನ್ನು ತಪ್ಪಿಸಲು ಉತ್ತಮ ಸಿಸಿ ರಸ್ತೆ ನಿರ್ಮಾಣವಾಗುತ್ತದೆ. 640 ಮೀಟರ್‌ ರಸ್ತೆ ಮಾತ್ರ ಈಗ ನಿರ್ಮಾಣವಾಗುತ್ತಿದ್ದು, ಮುಂದಿನ ಹಂತಗಳಲ್ಲಿಮುಂದಿನ ರಸ್ತೆಗೆ ಅನುದಾನ ಬಿಡುಗಡೆಗೊಳಿಸಿ ಕಾಮಗಾರಿ ಕೈಗೆತ್ತಿಕೊಳ್ಳಲಾಗುವುದು ಎಂದರು.

ಸಿಂಗಟಾಲೂರು ಗ್ರಾಮದಲ್ಲಿಪಿಎಂಜಿಎಸ್‌ವೈ ಯೋಜನೆಯಲ್ಲಿ60 ಲಕ್ಷದ ಕಾಮಗಾರಿಗೆ ಕೂಡಾ ಶಾಸಕ ರಾಮಣ್ಣ ಲಮಾಣಿ ಚಾಲನೆ ನೀಡಿದರು. ಸಿಂಗಟಾಲೂರು ವೀರಭದ್ರೇಶ್ವರ ದೇವಸ್ಥಾನ ಟ್ರಸ್ಟ್‌ ಅಧ್ಯಕ್ಷ ಕರಬಸಪ್ಪ ಹಂಚಿನಾಳ, ಎಪಿಎಂಸಿ ಅಧ್ಯಕ್ಷ ರವೀಂದ್ರ ಉಪ್ಪಿನಬೆಟಗೇರಿ, ಎಸ್‌.ವಿ.ಪಾಟೀಲ, ಸೀತಾರಾಮ ರಾಜು, ಪ್ರಶಾಂತ ಗುಡದಪ್ಪನವರ, ಆರ್‌.ಎಂ.ತಪ್ಪಡಿ, ಬುಟ್ಟು ಹೊಸಮನಿ, ಈರಣ್ಣ ಗುತ್ತಲ ಶೆಟ್ಟರ, ಕೊರ್ಲಹಳ್ಳಿ, ಶಿಂಗಟಾಲೂರು ಗ್ರಾಮದ ಹಿರಿಯರು ಪಾಲ್ಗೊಂಡಿದ್ದರು.