ಆಸ್ಪತ್ರೆಯೇನೋ ಸುಂದರ, ವೈದ್ಯರೇ ಇಲ್ಲ!

ಮಾಳಿಂಗರಾಯ ಪೂಜಾರ, ಲಕ್ಷ್ಮೇಶ್ವರ: ತಾಲೂಕಿನ ಸೂರಣಗಿ ಗ್ರಾಮದಲ್ಲಿ ಪ್ರಾಥಮಿಕ ಆರೋಗ್ಯ ಕೇಂದ್ರ ಸುಂದರ ಕಟ್ಟಡ, ಔಷಧ ಸೇರಿದಂತೆ ಎಲ್ಲ ಸೌಲಭ್ಯಗಳನ್ನು ಹೊಂದಿದ್ದರೂ ವೈದ್ಯರೇ ಇಲ್ಲ!

ಸುಮಾರು 2 ತಿಂಗಳಿಂದ ವೈದ್ಯರು ಇಲ್ಲದೇ ಇಲ್ಲಿ ನರ್ಸ್‌ಗಳೇ ಡಾಕ್ಟರ್‌ಗಳಾಗಿದ್ದಾರೆ. ರೋಗಿಗಳಿಗೆ ಕೆಲ ಔಷಧಿಗಳನ್ನು ನೀಡಿ ಕಳುಹಿಸುತ್ತಾರೆ. ಏನಾದರೂ ಹೆಚ್ಚಿನ ಮಟ್ಟದ ರೋಗ ಹಾಗೂ ತುರ್ತು ಸಂದರ್ಭದಲ್ಲಿ ಲಕ್ಷ್ಮೇಶ್ವರ, ಶಿಗ್ಲಿ ಅಥವಾ ಬೆಳ್ಳಟ್ಟಿಗೆ ಬರೆದು ಕೊಡುತ್ತಾರೆ. ದಾರಿಯ ಮಧ್ಯದಲ್ಲಿ ಏನಾದರೂ ಆದರೆ ಯಾರು ಹೊಣೆ ಎನ್ನುವಂತಾಗಿದೆ.

ಈ ಆರೋಗ್ಯ ಕೇಂದ್ರಕ್ಕೆ ನಿತ್ಯವೂ ಸುತ್ತಮುತ್ತಲಿನ ಹುಲ್ಲೂರ, ಅಮರಾಪೂರ, ಬೂದಿಹಾಳ, ನೆಲ್ಲೂಗಲ್ಲು, ಸುವರ್ಣಗಿರಿ ತಾಂಡಾ, ಯಲ್ಲಾಪೂರ ಹೀಗೆ ಅನೇಕ ಗ್ರಾಮಗಳಿಂದ ನೂರಾರು ರೋಗಿಗಳು ಬರುತ್ತಾರೆ. ಸರಕಾರಿ ಆಸ್ಪತ್ರೆಗೆ ಬರುವ ರೋಗಿಗಳು ಬಡವರೇ ಹೆಚ್ಚು. ಅದರಲ್ಲೂ ಗ್ರಾಮೀಣ ಭಾಗದ ಜನರು ಕಡು ಬಡವರಾಗಿದ್ದಾರೆ.

ಆಸ್ಪತ್ರೆಯಲ್ಲಿ 3 ನರ್ಸ್‌, ಒಬ್ಬರು ಫಾರ್ಮಾಸಿಸ್ಟ್‌ ಮಾತ್ರ ಇದ್ದಾರೆ. ವೈದ್ಯರೇ ಇಲ್ಲದರಿಂದ ಚುಚ್ಚು ಮದ್ದನ್ನು ಅಲ್ಲಿನ ಸಿಬ್ಬಂದಿ ಮಾಡುವದಿಲ್ಲ. ಆಸ್ಪತ್ರೆಯಲ್ಲಿ 24/7 ಸೇವೆ ಎಂದು ಬರೆಯಲಾಗಿದೆ. 6 ಹಾಸಿಗೆ ಆಸ್ಪತ್ರೆಗೆ ಆಸ್ಪತ್ರೆ ಇದಾಗಿದೆ. ಅದಲ್ಲದೇ ಗ್ಲುಕೋಸ್‌ ಬಾಟಲ್‌ ಸ್ಟಾಕ್‌ ಇವೆ. ಹೀಗೆ ಎಲ್ಲ ಸೌಲಭ್ಯಗಳಿದ್ದರೂ ವೈದ್ಯರ ಕೊರತೆಯಿಂದಾಗಿ ಉತ್ತಮ ಚಿಕಿತ್ಸೆ ದೊರೆಯದೆ ರೋಗಿಗಳು ಪರದಾಡುವಂತಾಗಿದೆ.