ದೌರ್ಜನ್ಯ ಮರುಕಳಿಸಿದರೆ ಕಠಿಣ ಕ್ರಮ

ಗದಗ : ರೋಣ ತಾಲೂಕಿನ ಹೊಳೆಆಲೂರ ಸಮೀಪದ ಕರಮುಡಿ, ಮೆಣಸಗಿ, ಅಸೂಟಿ ಗ್ರಾಮದಲ್ಲಿದ್ದ ಅಸ್ಪೃಶ್ಯತೆ ಹೋಗಲಾಡಿಸುವಲ್ಲಿ ಅಧಿಕಾರಿಗಳು ಯಶಸ್ವಿಯಾಗಿದ್ದು, ದಲಿತರ ಮೇಲೆ ದೌರ್ಜನ್ಯ ನಡೆದರೆ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಅಧಿಕಾರಿಗಳು ಎಚ್ಚರಿಕೆ ನೀಡಿದ್ದಾರೆ.

ಶನಿವಾರ ಜಿಲ್ಲಾ ಸಮಾಜ ಕಲ್ಯಾಣ ಇಲಾಖೆ, ತಹಸೀಲ್ದಾರ ಮತ್ತು ಸಿಪಿಐ ಸಹಿತ ಅನೇಕ ಅಧಿಕಾರಿಗಳು ಕರಮುಡಿ ಗ್ರಾಮಕ್ಕೆ ಭೇಟಿ ನೀಡಿ ಗ್ರಾಮಸ್ಥರ ಶಾಂತಿಸಭೆ ನಡೆಸಿದರು. ನಂತರ ದಲಿತರಿಗೆ ಗ್ರಾಮದ ಬಾವಿಯ ನೀರು ಸೇದಿಸಿ, ಆಂಜನೇಯ ಮತ್ತು ಲಕ್ಕಮ್ಮ ದೇವಸ್ಥಾನಗಳಿಗೆ ಪ್ರವೇಶ ಮಾಡಿಸುವ ಮೂಲಕ ಅಸ್ಪೃಶ್ಯತೆ ನಿವಾರಣೆಗೆ ಕ್ರಮ ಕೈಗೊಂಡಿದ್ದಾರೆ.

ಕರಮುಡಿ ಗ್ರಾಮದಲ್ಲಿ ದಲಿತರನ್ನು ಕೀಳರಿಮೆಯಿಂದ ಕಾಣಲಾಗುತ್ತಿದೆ. ನೀರು, ಕ್ಷೌರದಂಗಡಿ ಮತ್ತು ದೇವಸ್ಥಾನಗಳಿಗೆ ಪ್ರವೇಶ ನೀಡದಿರುವುದನ್ನು ಖಂಡಿಸಿ ವಿವಿಧ ದಲಿತಪರ ಸಂಘಟನೆಗಳು ದೂರು ನೀಡಿದ್ದವು.

ದಲಿತ ಸಂಘರ್ಷ ಸಮಿತಿ ಮುಖಂಡ ಮಂಜುನಾಥ ಹಾಳಕೇರಿ ಮಾತನಾಡಿ,ಹಲವು ವರ್ಷಗಳಿಂದ ಕರಮುಡಿಯಲ್ಲಿ ದಲಿತ ವರ್ಗದ ಜನರ ಮೇಲೆ ಶೋಷಣೆ ನಡೆಯುತ್ತ ಬಂದಿದೆ ಎಂದು ಆರೋಪಿಸಿದರು.

ಜಿಲ್ಲಾ ಸಮಾಜ ಕಲ್ಯಾಣ ಇಲಾಖೆ ಅಧಿಕಾರಿ ಖಾಜಾಹುಸೇನ ಮುಧೋಳ ಮಾತನಾಡಿ, ಅಸೂಟಿ, ಮೆಣಸಗಿ, ಗುಳಗುಂದಿ ಸೇರಿದಂತೆ ವಿವಿಧ ಗ್ರಾಮಗಳಲ್ಲಿ ಜನರು ಕಾನೂನು ಅಡಿಯಲ್ಲಿ ಎಲ್ಲರೂ ಒಂದೇ ಎಂಬ ಭಾವನೆಯಿಂದ ಬಾಳಬೇಕು ಎಂದರು.

ತಹಸೀಲ್ದಾರ ಶರಣಮ್ಮ ಕಾರಿ, ತಾಪಂ ಕಾರ್ಯನಿರ್ವಾಹಕ ಅಧಿಕಾರಿ ಎಂ.ವಿ. ಚಳಗೇರಿ, ಪಿಎಸ್‌ಐ ಎಲ್‌.ಕೆ. ಜೂಲಕಟ್ಟಿ, ದಲಿತ ಮುಖಂಡ ವೀರಪ್ಪ ತೆಗ್ಗಿನಮನಿ, ಹನುಮಂತ ಪೂಜಾರ, ಮಂಜುನಾಥ ಚಲುವಾದಿ, ಮುತ್ತು ಚಲುವಾದಿ, ಶರಣಪ್ಪ ಚಲುವಾದಿ, ಗ್ರಾಮಸ್ಥರು ಉಪಸ್ಥಿತರಿದ್ದರು.